Pagsusuri Sa Taguan

Christy Jean I. Ruiz MAEd Filipino Pagsusuri sa Taguan Ni Rolando Bernales I. Pamagat: Taguan Ni Rolando Bernales II. Mga Tauhan: Openg- ang batang bakla na tumutulong sa kanyang ina na magtinda, nagtatanggol sa kapatid, pangarap maging guro at nakagawa ng masama sa kanyang tatay gamit ang kutsilyo. Kristal- ang nakababatang kapatid ni Openg na naabuso ang kamusmusan. Nanay- ina ng magkapatid, gagawin ang lahat para sa kanyang mga anak at para maipagtanggol ang mga ito. Tatay- si Castrol/ Castor na ama ng dalawang magkapatid, ang tatay na pahilikhilik at nakahilata lang sa bahay na may ginawang masama sa anak na si Kristal. Milet- kaibigan ng magkapatid, kaklase ni Kristal.  Aling BethBeth- ina ni Milet Milet Noknok- kaibigan din ng magkapatid at nahuling namumuso sa kanyang mga kaklase na umiihi, may amang pulis ngunit iniwan sila dahil sa babae III. Tema: “Buhay ng mga kapus-palad”. Ito ang tema sapagkat ang kwento ay nakatuon sa mga ginagawa ng simpleng bata halimbawa na si Openg na sa murang edad ay napilitang magtrabaho upang makatulong sa pamilya dahil ang tatay niya ay iresponsable. May pangarap din siya ngunit parang nawalan siya ng pag-asa dahil sa ayaw siyang suportahan ng kanyang Itay.

IV. Tagpuan: Sa bahay ang tagpuan sapagkat doon maraming mga pangyayaring naganap. Doon sinugod si Openg ni Aling Beth, doon nangyari ang kahalayan ng kanilang tatay at doon din inundayan ni Openg ang kanyang ama.

V. Banghay: Simula- Nanaginip si Openg na naglalaro silang magkakaibigan ng taguan at bigla siyang ginising ng kanyang Tatay para magtrabaho at tulungan ang Nanay sa pagbenta ng karne habang ito ay nakatihaya lang sa bahay. Gitna- Inaway ni Milet si Kristal. Ipinagtanggol ni Openg ang kapatid at nakapagsalita ng tungkol kay Aling Beth na ina ni Milet. Nagsumbong ang Ale sa kanilang Tatay at binugbog sila. Nagsumbong si Kristal ng tungkol sa ginawa ng kanyang Tatay sa kaniya. Umuwi si Openg at ang ina, naabutan nila ang aktuwal na ginawa ni Castro sa bata. Sinugod ng Nanay ang Tatay ngunit natumba ito kaya hindi napigilan ni Openg ang sarili at nagawa ang karumal-dumal na pangyayari. Wakas- Matapos ang ginawa ni Openg sa kanyang Tatay ay nanaginip siyang muli ngunit sa pagkakataong ito hinahanap niya ang Nanay na wala sa kanilang bahay. VI. Mga Bisa Bisa sa Isip: “Sabi ni Nanay, hindi naman daw dating ganyan si Tatay. Dati’y nagtatrabaho daw si Tatay doon sa pabrika ng sabon sa Makati. Nang magbawas ng mga trbahador sa pabrika, isa siya sa mga minalas na nasisante. Mula noon, nagsimula nang makitagay si Tatay sa kung saan-saang kanto, hanggang sa magsawa ang kanyang mga kainuman at matuto siyang makipagkwentuhan sa sarili habang solong nagpapakalasing. ”

May Bisa sa Isip dahil ang isang padre de pamilya pala kapag nawalan ng trabaho at hindi agad naka-move on sa nangyari ay dinibdib ito hanggang sa mapariwara dahil sa walang inisip na paraan para makahanap ng iba pang trabaho upang may maipakain sa pamilya. Bisa sa Damdamin: “At kapwa kami nagitla ni Nanay sa aming nakita… si Tatay, halos hubo’ t hubad na nakakubabaw kay Kristal at sapu-sapo ang bibig ng kaawa-awa kong kaptid na walang-muwang sa pang- aabuso sa kanyang kahinaa’t kawalang -muwang”

Dito talaga ang may pinakamatinding damdamin sapagkat maging ako ay naramdaman ang galit na nararamdaman ng mga tauhan dahil labis naman talagang kasuklam-suklam ang ginawa ng tatay sa kanyang musmus na anak.

Bisa sa Kaasalan: “Nandilim ang aking paningin. Dali -dali kong kinapa ang laman ng bitbit kong bayong. Sumakamay ko ang kutsilyong gamit ni nanay sa palengke. Nagsusuot ng pantaloon si Tatay nang siya’y aking sugurin. Ubod -lakas ko s’yang inundyan sa kanyang likuran. ”

May Bisa sa Kaasalan sapagkat si Openg ay may pusong babae na aakalain mong malamya ngunit dahil sa pagkakataong iyon nagawa niya ang isang brutal na paggamit ng kutsilyo laban sa kanyang Tatay. Mga Teorya

Teoryang Realismo- ang pananalig na ito ay nagpapakita ng mga karanasan at nasaksihan na hindi namimili ng mga bagay na nadarama at napag-uukulan ng pagmamasid. Inilalarawan nito ang buhay sa katotohanan nito at walang idealismo. Teoryang Feminismo- ito ay ang pananalig na nauukol sa kakayahan ng isang babae, sa kwento ay ipinapakita kung ano ang kayang gawin ng isang babae para sa kanyang anak. Teoryang Arkitaypal- ang pananalig na ito ay nagpapakita ng mahalagang bahagi ng akda sa pamamagitan ng simbulo. Inilahad ang mga bagay, damdamin at kaisipan sa pamamagitan ng mga sagisag. Teoryang Eksistensyalismo- sa paniniwalang ito ay inihahanap ng katibayan ang kahalagahan ng personalidad, kapangyarihan at kapasyahan ng tao laban sa katwiran ang binibigyan ng timbang o halaga. Teoryang Romantisismo- ito ay ang pananalig na ipinamalas ang iba’ t ibang paraan ng tao sa pag-aalay ng kanyang pag-ibig. Ipinakita rin sa akda na gagawin at gagawin ng isang nilalang ang lahat upang maipaalam ang kanyang pag-ibig sa tao. Teoryang Queer- ipinakikita ng pananalig na ito na iangat at pagpantayin sa paningin ng lipunan ang mga homosexual. Teoryang Moralistiko- inilahad ng paninialang ito ang iba’t ibang pamantayang sumusukat sa moralidad ng isang tao- ang pamantayan ng tama at mali. Sa madaling sabi, ang moralidad ay napagkakasunduan ayon na rin sa kaantasan nito.