Tamazight Tura 11

TAMAZIƔT TURA Tasɣunt s Tmaziɣt n Usqamu Unnig n Timmuzɣa

IMḌEBBER N TESƔUNT Youcef MERAHI AGRAW N TIRA Hamid BILEK Abdenour HADJ-SAID Said CHEMAKH Samir ARKAM Ramdane ABDENBI URAN DEG WUṬṬUN-AGI :

Yasmina FOURALI, Inelmaden n lmajister n tmaziɣt-Bgayet, Lydia GUERCHOUH, Mohand Arab AIT KACI, Mourad ZIMU, Nacera KEDDACHE, OUSSANE, Ramdane ABDENBI, Mokrane CHIKHI, Saïd CHEMAKH, Islam BESSACI

19, avenue Mustapha El-Ouali (ex Debussy) Alger Tél : 021-64-29-10/11 - Fax : 021-63-59-06 B.P. 400, 16070, El Mouradia - Alger

TAGDUDA TAZZAYRIT TAMAGDAYT TAƔERFANT TASELWIT N TEGDUDA ASQAMU UNNIG N TIMMUZƔA

TAMAZIƔT TURA

tamazi$t tura

Tasɣunt s Tmaziɣt n Usqamu Unnig n Timmuzɣa Tamaziɣt tura Un 11 / yebrir 2013

ISSN : 1112-9417 Dépôt légal : 4832-2008

Tamaziɣt, imira, teḥwaǧ kan ad tt-naru ad tt-nɣer.

AGBUR TULLIST

Nekk d arra n wagga

Yasmina FOURALI

11

Inelmaden n lmajister n tmaziɣt - Bgayet

23

Lydia GUERCHOUH

35

Mohand Arab AIT KACI

40

Mourad ZIMU

65

Nacera KEDDACHE

68

OUSSANE

83

Ramdane ABDENBI

91

Mokrane CHIKHI

96

Saïd CHEMAKH

105

Islam BESSACI

110

Ur ddiɣ akked Rebbi, ur ferrǧeɣ iḍebbalen Amyexdem yaf-it Iqrucen Lweḥc

Ruḥen deg leɣlaḍ Akured

Yenher neɣ yezzuɣer !

Muḥend yettarun akked tewkilin-is Lmelzum

Deɛwessu n yimawlan

TIGEJDIT

“

Aql-i da, aql-i yid-wen, aql-i gar yifassennwen, sdat wallen-nwen, mazal ur mmuteɣ ara. D nekk, d tasɣunt Tamaziɣt Tura, tasɣunt-nwen, tin tennumem, tin yeddren yis-wen, s tiranwen, s yeḍrisen-nwen. Ma ɛeṭṭleɣ akka tikkelt-a i wakken kan ad d-awiɣ amaynut d aya, ɣas mačči d lebɣi i ixuṣṣen, maca tikwal akka. Wicqa. Nekk, tasɣunt Tamaziɣt Tura aql-i gar yifassen-nwen”. Akken ara tegrem tamawt, ad tafem d akken d takemmict n tullisin. I tikkelt tamezwarut ara nbudd uṭṭun-agi wis 11 i tewsit-agi n tsekla imi nebɣa ad tennerni i wakken wid yettarun deg uḥric-agi yetteldin abrid i tira n yiḍrisen ɣezzifen, abrid yettawin s annar n tira n wungalen ad ṭṭuqten. Akka i nebɣa ad nernu afud i wid iqeddcen, yeɣɣaren, yettarun s tmaziɣt i tmaziɣt.

Tamazight Tura akken teẓram, d aya i nesɛa d ayla-nneɣ,

d aya i tesɛa tmaziɣt d tasɣunt s tmaziɣt. Llant tid ideg nettaf iḍrisen s tmaziɣt maca ulac tin yettwarun s taginneɣ irkelli.

Akken i as-yenna winna : aniɣer i t-tettedduḍ ay aḍar, yenna-as : s aẓar. Ihi atan llqeḍ atan uqamum. Ma nebɣa ayla-nneɣ ad yili, ad yidir, ad yeflali, d nekkni ara yenneflen s annar, d nekkni ara yegren iman-nneɣ ad nellexs i wakken ur dtettili ara takewt n tirga, takewt n tikta i wakken azekka ad yelhu i tarwa. Asirem meqqer, timerjiwt ugar. Yid-wen, yis-wen ay imyura ay imeɣriyen, afus deg ufus, tamaziɣt tura, tamaziɣt n tira, tamaziɣt n tura, tamaziɣt n uzekka, ad tidir i lebda. Ar tufat

TULLIST

Nekk d arra n wagga Yasmina FOURALI

Y

iwen yiḍ tlul-d yiwet n targit, ɣef yiwen n ublaḍ tbedd yiwet n teqcict, yura fell-as “lḥif n tudert”. Mi d-tuki, kra n yimeṭṭi yellan tessureg-it. Ɛeddan kra n wussan, targit tugi ad tt-temḥu tannumi, di yir ṭṭlam taqcict tezga tečča lqerḥ s tsusmi. Tuɣal am ufrux yeǧǧan lɛecc-is, yettnadi ccna ur nelli lemtel-is. Yesrafeg ufrux ɣef yiwet n tezwit, temɣi-d deg yiwen ufurk tjeǧǧigt, tɣurr-it tfenda-s, ziɣ d asennan i yellan ddaw-as. Ibedd fell-as, asennan yufa abrid ɣer wul-is, yebda icennu, irennu di ṣṣut-is ; zzind medden fell-as, akken ad slen i tmeɣrut-is, yiḥnin-d ṣṣut-is ; yeggugem yigenni, yekkussem uzwu-s. Yerra-d ufrux nnehta, ɣilen d anya-s ; ziɣ d tin i d taggara-s. Jeɛlen medden mi iɛedda usigna, yerfed iferrawen-is, yessureg-d imeṭṭi, yessared anezgum-is. Aḥlil ay aqraḥ n llufan, mi ara d-yeggri war imawlan, am ufrux yecnan, ur yelli wi as-yeslan, deg-s yefruri unegman, yeggra-d d tadyant i yimennan. Ad d-zzin waktayen i tewwurt, taqcict-nni tettraǧu tatut, i talwit ur tufi tasarut ! Aḥlil ! Mi ara temmet tyemmat, i tegrudt d acu ara d-yeqqimen ? Ad d-teggri weḥd-s, deg yirebbi n temẓi-s, azekka ur d-yettban yixef-is, ad tettargu rrif n timunin. Iḍ-is yezga yettgani imeṭṭawen, tagujilt tudert-is tessawen, ma d ifadden-is kkawen, lḥif fell-as yezdel, itran i tafat d ilmawen.

Tamaziɣt tura – Un 11 – H.C.A / yebrir 2013

- 11 -

Tasɣunt s Tmaziɣt n Usqamu Unnig n Timmuzɣa

Tuki-d War-isem tuɣwas : - A yemma rfed lhemm-iw ! A yemma rfed lhemm-iw ! Mi d-teldi allen-is, ur d-tufi win yellan rrif-is, slid targit i dyeskeflen lhemm-is, d awezɣi ad tettu temẓi-s. Amek ara tettu tullist n lḥif i as-yeḍran, nettat i d tasaḍt n waggas yennernan, tɛac d tawḥidt ulac imawlan. Hata d acu i as-yeḍran : War-isem, d yiwet n tallest yettidiren deg yiwet n taddart i wumi qqaren Tala Waɛmer. Taddart-a teṭṭef mliḥ deg leɛwayed n zik, mi akken tameṭṭut ur tesɛi izerfan, awal ur tt-id-yettali ; txeddem segmi iṭṭij ad d-yeflali, ḥedd ur yezmir ad t-twali ! D aggas-is kan i tettsami. Ma izad fell-as uqraḥ, ad t-tessebleɛ, ur d-teqqar “aḥ”, ladɣa ma tecceḍ d win nettat akked netta mḥemmalen ! Fell-as ur d-yettili rrbeḥ. Yemma-s n War-isem Taseɛdit i d isem-is, tettidir akked Saɛid argaz-is, ussan ssiɣzifen di lhemm-is, d netta i as-irennun tabɣest-is, akken nettat ad tbedd ɣef uxxam-is, ɣas ulamma tazmert teffeɣ ifadden-is. Nettat i turǧa kan d lmut, d aya i d asirem n talwit, ad tterfed gar yiferrawen-is, ma yella-d wass ad tt-yeǧǧ umaray-is. Tallest-a War-isem mi d-tlul, d jeddi-s Ɛmer i as-igan isem-a, assnni teččur-as, ula d zzher-is yenna : isem-a d isem i am-iga uḥalfi, ɣas ulamma lḥif deg-m yettsami. Ass ideg akken zewǧen yimawlan-is, tella yemma-s Taseɛdit terfed yis-s s tadist, imir kan i yeɣli baba-s Saɛid deg yiwen n waṭṭan amcum, d yiwen n lehlak i qqaren ur iḥemmel ara tafat le cancer. Saɛid, d ameɣbun n Rebbi, ur yesɛi zzher, ɣas akken netta akked tmeṭṭut-is icurek-iten “sseɛd” deg yisem. Yella iḥemmel Taseɛdit, maca ur yufi talwit, acku yuɣ tasga, tawla ur t-texḍi. Wwin-as-d at uxxam amejjay, maca ayen yexdem yid-s ur ifad ; imir yuyes-it umejjay-nni, yenna-asen : - Ǧǧet-t i lɣerḍ-is, ad yexdem lebɣi-s, slid Rebbi i yeṭṭfen deg wussan-is ! Saɛid yesla-d i umejjay-is, ur yeṣbir i uqraḥ-is, imeyyez deg tezmertis, yeḥṣa ifadden-is kkawen, d leɛtab kan ad d-yernu i twacult-is, ay t-yerǧan d ussan ilmawen.

- 12 -



Yerǧa Saɛid tujjya deg wussan, ggumman ad kksen iziɣer-is, ad yertiḥ i unezgum-is. Yessuter amrar, yenna i tmeṭṭut-is : - Cuddet-t ɣer yiwet seg tmiwa i izegren i usalas, ma bɣiɣ ad senndeɣ ɣer lḥiḍ, ad ṭṭfeɣ deg-s, ad d-sbeddeɣ iman-iw. Tameṭṭut-is imi d nniya, deg wawal-is tedda, nndama ur tesɛi lfayda, s lmut-is i d-tejba. Ass-nni, d acer, Taseɛdit izad waqraḥ-is, llufan yebɣa ad iẓer tudertis, tɛedda ɣer tesga ad tḍil argaz-is, ad as-tawi lexbar, ad yezhu cwiṭ wul-is, tga ad as-tini deg uqerru-is : “ay argaz ass-a ahat ad twaliḍ mmi-k, ara irefden isem-ik ! Tameṭṭut ur d-tekfi tirga-s nettat tuki, argaz-is yeǧǧa-tt yuli. Tuɣwas tmeṭṭut, teɣli ɣer lqaɛa. Aḥlil a Rebbi, anwa aggas i tt-yesseɣlin : argaz i tt-yeǧǧan yemmut, neɣ d nndama mi as-tcudd tamrart, neɣ ahat d aqraḥ n llufan ur nban anwa-t, d aqcic neɣ d taqcict ! Tesla-as-d temɣart tuzzel-d, tufa-tt-id tɛumm deg yidamen, la trebbu ; yiwen ufus yeṭṭef ixef n umrar anda yenneḍ uqerru n urgaz-is, wayeḍ ɣef uɛebbuḍ-is, amzun tebɣa ad tsami aqraḥ-is, allen-is ččurent d imeṭṭawen. Tessawel temɣart i umɣar, tenna-as : - Ɛjel ay amɣar, yya-d mmi-tneɣ wis d acu i t-yuɣen ! Nettat ur tebɣi ara ad yexleɛ. Teṭṭef-d nettat llufan-nni, ma d amɣar yefsi acidi ɣef yiri n mmi-s, icehhed-as, iɣumm-it ; tewwi-d nettat tegzem timiṭ i llufan-nni, imir iɛawen-itt umɣar refden tislit ɣer texxamt-is, yessuter ad tseyyeq agens-nni, akken ad iruḥ ad d-yawi amrabeḍ i mmi-s. Llufan ilul-d, d taqcict i d-tesɛa ; Taseɛdit ur tečči, ur teswi, imeṭṭi ur d-yeɣli ! Allen-is jeɛrent kan, tettezzi deg-sent tugna n urgaz i ttyeǧǧan. Llufan ur tt-id-temmekta yemma-s, slid tamɣart mi tenna i teslit-is : - Mudd tura i teqcict ad teṭṭeḍ !. Tislit ur tḥerrek ara, dɣa terfed temɣart llufan-nni, tga-tt deg yirebbi n yemma-s, tmekken-itt ad teṭṭeḍ iman-is. Zrin kra n wussan ɣef tmettant n Saɛid, tameṭṭut ur tessin ass, ur tessin iḍ, tegguni lɣiḍ, tafekka-s simmal tettdubu. Llufan-nni teggan ɣur jidda-s, d atiwel deg-s am yiḍ am wass, tettak-as ayefki n


- 13 -


tfunast, ma di yemma-s tuyes deg-s tudert. Tamɣart, terfed tislit-is, imi ur tettu lxir texdem di mmi-s ɣas akken nitni uysen-t, ma d nettat tezga tettlaɛi-t, akken ad yeḍmeɛ ddunit ! Wwḍen rebɛin n wussan si tmettant n Saɛid, terfed-d temɣart taqcict, tewwi-tt-id i yemma-s akken ad tt-twali, ad as-tmudd isem lɛali, ahat ad tettu lhemm-is ; mi tewweḍ ɣur-s, tamɣart kkawen yifadden-is, awal ur tt-id-yuli, tḥar aniɣer ad twali ! Taneffut n tyemmat ɣer yigenni tuli, di leɛfu n Rebbi tegguni. Ur iban ma d anezgum n urgaz i yennernan, neɣ d lhemm n teqcict i tt-yenɣan ? Tessawel temɣert i urgaz-is Ɛmer, yeṭṭef taqcict gar yifassen-is, yenna : - Ula i am-yerna sseɛd-im, ass-a ad am-geɣ isem-im, d War-isem i d lbext-im, ɣas ulamma yezzem-ikem zzher-im, gar-neɣ d imawlanim, azekka Rebbi ad am-iger amur-im. Ttɛeddin wussan, War-isem tettimɣur, teqfel sḍis n yiseggasen di leɛmer-is. Tallest-a iḥemmel-itt jeddi-s Ɛmer, tesselhuy-it, tetteg-as lɣerḍ. Tura mi yeɛya yuɣal yettazen-itt ad d-teqḍu si tḥanut, tebɛed cwiṭ ɣef taddart ; tama-s yella uɣerbaz n tullas. Yal tikkelt mi ara dtɛeddi tama-s, ad tsel i tmeɣriyin n uɣerbaz-nni cennunt, neɣ tturarent deg wannar n uɣerbaz-nni. Yetteɛǧab-as lḥal, tzehhu cwiṭ ɣur-sent, maca din din ad temmekti ur tezmir ara ad tili yid-sent, imi jeddi-s ur yezmir ara ad as-ixelleṣ almud-ines, daɣen ulac win ara ibedden d jidda-s deg uxxam ! Dɣa yal mi ara d-tuɣal, ad yakez Jeddi-s, yennuɣna lxaṭer-is. Yettḥar ma ad tt-yesteqsi, neɣ ad ttyeǧǧ i teswiɛt, maca d ayen nettat i d-yeggran deg yijifer-is. Iḥemmel-itt aṭas, lemmer yettaf ur tettixir ara seg tama-s. Ma yella d jidda-s Taseɛdit, tessakay-itt tikwal fell-as, ɣas akken ur tuksan, akken i d-tetturebba fell-as, taqcict yessefk ad taɣ tannumi d leɛtab, akken ad timɣur, ad tizmir i unqab. Dɣa mi ara akken ad tuɣal si berra, ad tɛeyyeḍ ad as-tini : - Nniɣ-am-d awi-d aɣrum mačči d lqahwa ; awi-d ṣṣker mačči d ṣṣabun ; ruḥ ad tessuffɣeḍ akraren ; awi-d alim ; agem-d aman… Lḥaṣul, akken texdem yid-s War-isem teḥṣel. Acu ur tt-yettɣaḍ ara lḥal yal ass, imi tessen ṭṭbiɛa n jidda-s ; ma yella tikwal, tettmektay-

- 14 -



d imawlan-is, lemmer di lin, ahat ad tettruḥu ɣer uɣerbaz, ad tifsus teɛkemt am uneznaz. War-isem tfaq-d d tagujilt i tella, dɣa ad tt-terr i lweɛd n yimeṭṭi, ad tessugen awalen n tayri ad d-iquddren seg wul n yemma-s ur tessin, neɣ ad tili d baba-s mi akken ara as-d-imudd talelluct ur teṭṭif di leɛmer-is. Ad d-taki ulac win ara d-isefḍen asureg-is. Ad teqqim tgujilt tegguni amnar, ulac win ara as-igen leqrar ! Tiɣri ara d-yeffɣen seg wulawen, ad d-tban ɣef wudmawen. Dɣa mi akken ara d-tuɣal si tḥanut, ad tergagi tasa n jeddi-s, yettḥulfu i waggas-is, ad as-isiwel ad teqqim rrif-is, as-d-yales timucuha ara yesselhun ul-is, ɣef tasaḍt yuɣ mmi-s n ugellid, neɣ tin uɣur ad dteffeɣ tewkilt… War-isem ad tebdu tessugun tella deg wadeg n tasaḍt, imir kan ad tesfeḍ imeṭṭawen-is. Llufan yerrẓen ṣṣber-is, din kan ad yettu lhemm-is. Ussan tezzin, leɛmer n tgujilt yettmar deg yiceqfan, aḥlil fell-as ma ad idewwer zzman, nettat tgemmu s lemḥan, ad d-tegri i yimennan, d tidet : leɛmer ugujil deg uceqquf, tudert-is tezga di lxuf. Ass-nni d ahad, tesṭuqqet-itt fell-as jidda-s s ccɣel, yerna teǧǧa-tt i laẓ, acku tɛeṭṭel mi truḥ ɣer tḥanut. Nettat, tella tzehhu ɣur tullasnni mi ara d-ffɣent ɣer unnar n uɣerbaz, akken kan ara asent-tsel cennunt taɣect n Baba-inu ba, ad tebdu ad tettargu tella d tasaḍt, tesčenčin tizebgatin amzun tella di tmacahut n Ɛruba i as-d-yettales jeddi-s. War-isem tennuɣna imi ulac d acu i tt-id-iṣaḥen gar tmeɣriyin-nni, tessaram ad tili yid-sent, maca ulac win ara d-yeslen i tirga-s. Mi tesla i tninayt n uɣerbaz, ad twali timeɣriyin-nni setfent iman-nsent, d lawan ad uɣalent ɣer tesmilt, ad d-taf tmeɣbunt tarwiḥt-is am ucalaw, deg yiḍ i as-d-irezzu s tfenda n leḥzen, imi tuɣ tannumi tsessaw-it s yimeṭṭi tessurug fell-as. Ad tesfeḍ imeṭṭawen-is, ad d-rnun wiyaḍ, dɣa ad teṭṭef allen-is medlent akken ad teqqim deg usugen-is ; maca din din ad d-tḍil tugna n jidda-s, ad d-temmekti ayen i tt-yettraǧun... I telha tirga, lemmer ulac win ara k-id-yessakin ! Tameɣbunt taneffut-is iḍuref-itt zzhu n ddunit, ur tecbi igerdan n lǧiran, yal ass acu n takat yelhan sɣur yimawlan ; ma d nettat d tawḥidt n tudert, ḥedd ur yettili tama-s akken ad yesfeḍ


- 15 -


imeṭṭi-is, xerṣum s yiwet n tlelluct ara as-yilin d tamwanest ! Ad dteggri War-isem weḥd-s, ad tt-terr ɣer lxaṭer-is, ad d-temmekti jeddi-s Ɛmer d leɣbayen-is ; yettɣaḍ-itt, imi ula d netta aḥlil, texdeɛ -it tezmert-is. Teggra-d War-isem di lhemm trennu, ul-is deg ungaz yettagem yettru, am teɣrast ugayemru, taččart teččur, maca tanulya deg-s txellu. Mi d-tewweḍ tmeddit n wass-nni, truḥ War-isem ɣer tama n jeddis, tessuter-as tamacahut-is n lebda : - A jeddi, alles-iyi-d di leɛnaya-k tamacahut n Ɛruba, d tin i iḥubb lxaṭer-iw. Jeddi-s ɣas akken yenqes-as yiẓri, iḥulfa i War-isem yenzef lxaṭer-is. Yetteddu-as di lebɣi, yettara-tt d Ɛruba, imi am tin i tḥemmel ad tili. Ɛruba d yiwet n tasaḍt, d tagujilt ula d nettat, yemmut baba-s, yeḍfer-itt-id waɣzen ad tt-yečč, terwel-as ; temlal-d mmi-s n sselṭan, isellek-itt, imir yewwi-tt ɣer teɣremt yiwel yid-s… akka i d-tessugen War-isem tudert-is. Akken i d-yekfa jeddi-s Ɛmer allus-is, nettat teɣli ɣef yimeṭṭi, ad tru ɣef zzher-is. Yeṭṭef-as-d afus jeddi-s, yesteqsa-tt, yenna-as : - Ayɣer i la tettruḍ akka a War-isem a yelli ? Deg War-isem tegma-d yiwet n tgulelt d tilawayt, d tamafrakt, imi tudert tga-as tilas i tumert ; dɣa tenṭeq, tenna-as : - Ayɣer a jeddi iqrar n taddart , ma ur sɛin baba-tsen, sɛan yemmatsen, nekk ur sɛiɣ yiwen. Ur sɛiɣ anwa ara d-iḍillen fell-i, ulac win ara yi-wansen di lemḥayen, ulac win ara yi-iṣebbren mi akken medden ččan deg-i s tmuɣli ? Aḥlil a jeddi mi ara ruḥeɣ ɣer lɛinṣer, ad iyi-d-ḍefrent tsednan s tmuɣli, ad iyi-ḍerfent, ad as-inint “meskint”, d aṭan n baba-s i d-tewwi ; ur ḥṣiɣ d acu-t wawal-a. Tegriɣ-d gar-asent am tecmuxt iɣusan, s ufella taḍsa tettban, ɣer daxel d anezgum i d-yernan ! Ayɣer a jeddi s kra ttarguɣ deg yiḍ yelha, mi d-tḍal tfukt ad d-afeɣ yal cci yemḥa ! Ayɣer a jeddi di lɛid ikerri yemmezlen i medden d leḥlal, ma d nekkni am wid yessutren lmuḥal ! Ayɣer a jeddi iqrar azekka-nni iṭij fell-asen ad d-iḍil, nekkni iḍ yid-neɣ d amellal! Ayɣer a jeddi zzher-nsen yettali d

- 16 -



asawen, nekkni i wussan neɣ d ilmawen ! Ayɣer tumert tbennu degsen ayen ɛlayen, nekkni lḥif nesɛedda ad d-yuɣal d aktayen !... Yegzem-as awal jeddi-s akken ad as-yini : - Nekkni d imeɣban a yelli... - Ayɣer a jeddi d imeɣban i nella ? Yessusem umɣar acku ula d netta ur yeẓri acimi d ameɣbun i yella ! Yezzegzew wudem-is si lḥir, mi i t-twala akken War-isem, teḍleq-d asirem-a : - Bɣiɣ a jeddi ad d-teffeɣ ɣur-i tewkilt, ad iyi-d-tefk ayen bɣiɣ ! Teẓriḍ a jeddi ayen bɣiɣ ? Bɣiɣ ad ak-d-yuɣal yiẓri am zik, ad iyi-dtettmagareḍ mi ara d-ffɣeɣ seg uɣerbaz, akken wiyaḍ ur iyi-ḥeqqren ara s tmuɣli neɣ s kra n umeslay. Bɣiɣ ad d-ffɣeɣ d tamejjayt, ad issineɣ aṭṭan yenɣan baba akked yemma, yal lehlak ara k-id-isamin, din din ad mḥuɣ iziɣer-is. Jeddi-s yeggugem maḍi, ur yufi d acu ara d-yini, lmerta tesskew-as imi-s. Tekcem-d temɣart-is, tufa-t-id yennuɣna, testeqsa-t d acu i tyuɣen, dɣa yenna-as-d : - Cbiɣ amejruḥ n rrṣaṣ, mi t-luwan medden yeḥlu ; wala amejruḥ n tasa, mi t-luɛan medden yettru. Tamɣart tefhem d War-isem i d-yeɛna deg wawal-nni, tessusem. Ma d netta iban-d am wakken yettḥezzib deg wussan ara d-yernun, neɣ ahat deg lhemm ur nseɛɛu tawwurt !... War-isem tebda tettak tamuɣli akkin i yigli, ziɣ yewɛer walluy d asawen, nettat tudert-is tezga di lemḥayen, mi yefra lhemm ad diḍill wayeḍ, dɣa din kan i d iɣimi n yimɣaren, ur teɛsɛi amḥaddi slid imeṭṭawen. War-isem iceqqeq wul-is, am tmenfit n sebɛa watma, mi tbedd ɣef yiblaḍen, terra nnehta yeqqaren : - Ɛlu, ɛlu ay aẓru ! Ur sɛiɣ baba, ur sɛiɣ yemma, ass-a tezdeɣ-iyi lmerta. D awezɣi, ma yella, ad d-afeɣ lehna. Nekk d tameɣbunt n lebda, ttɛiciɣ din da. Zrin sin n yiseggasen, War-isem teqfel ṭam n yiseggasen di leɛmeris; ur tekcim ara ɣer uɣerbaz, taneffut-is tettquddur d aneznaz. Tezga deg uxemmem, ul-is yesselqaf, taneffut-is am yijdi n wasif, gar yifassen ad d-iɣelli. Jeddi-s simmal yettwali-tt akken, simmal


- 17 -


tettdubu tneffutt-is seg unezgum fell-as. Ur yezmir ad as-imudd i yelli-s ayen ur yesɛi, slid imeṭṭawen i d-iɣellin ɣef tsumta-s, imi tazmert teffeɣ-it ; yal mi ara d-yemmekti belli War-isem ur tesɛi ḥedd d amwanes n uzekka, netta tazmert ulac, tamɣart-is tezga d axbac, am win yettraǧun nnfeɛ seg uqelwac ! Yelken umɣar belli tḥemmel-itt ula d nettat, maca tecba tasa yessuddumen. Am wakken qqaren ur yeksan ḥedd i t-yuɣen ma yella ul d aɛudar, yuḍen. Tḍall-d fell-as temɣart-is, twala udem-is yenxar, tenṭeq : - Acu i k-yuɣen ay amɣar ? - Asmi lliɣ d aɛejmi, ḥedd ma inager-i, tura ussan ggran-iyi-d, tibbib yeḥqer-iyi ! Tamɣar tebɣa ad t-tṣebber : - A baba ɛzizen fell-i, am txatemt n lfeṭṭa i iɛelleq uḍad lɛali, mi dyekka deg yimi n tewwurt, yekfa lhemm fell-i. Amek ad yeg wul iweḥcen, imi imesla di lhemm ur ssilqiqen. Taɛkemt n War-isem ur telli d ayen wezzilen ! Ad d-teggri d acewwiq, ara yettwarun s yidim n lemḥayen. Yettnerni leɛmer n War-isem yettquddur, simmal tettimɣur, simmal tawenza-s i unegman d abaɣur ; a lḥir yettbabba uqrur, netta zzheris yeqqur, ma d anezgum yeččur. D lawan ul ad d-yeggri deg uqraḥ, d awezɣi ad yertaḥ, ur yesteɛfay ur yettaf amraḥ. Yewweḍ-d wass n lǧemɛa, War-isem tekker-d seg yiḍes akken ad truḥ ɣer tkessawt, maca ul-is yenneqbaḍ, ur tebɣi ara ad truḥ ass-a, imi turga jeddi-s, ur tefhim d acu ? Tekcem-d jidda-s, ad tt-idtessaki, tufa-tt tuki, maca tennuɣna. Testeqsa-tt jidda-s : - Acu i kem-yuɣen a yelli ? Armi d ass-nni i tḥulfa War-isem jidda-s yeḥnin-d ṣṣut-is. Terra-as War-isem : - Urgaɣ yir targit, am wakken jeddi Ɛmer la yettali d asawen, yettweṣṣi-yi ad qqimeɣ yid-m, ur ttaggadeɣ ara, yeǧǧa-yi-d taɛekkazt, yenna-yi-d yal mi ara tḥasseḍ iman-im weḥd-m, sbedditt, ad d-rzuɣ ɣur-m ad am-d-alseɣ tamacahut i tḥemmleḍ ! Imir bdiɣ sawaleɣ-as ad d-yuɣal, yeqqar-iyi-d ur zmireɣ ara, ilaq ad awḍeɣ ɣer tmurt-iw… imir ḥulfaɣ kecmeɣ deg yiwen yifri, ṭṭlam

- 18 -



iḍall-d fell-i si yal tama, bdiɣ ttruɣ, ttuẓẓafeɣ, maca yiwen ur iyi-dyesli ! Dɣa dduqqseɣ-d, ur ẓriɣ amek tekfa targit… Tamɣart tefhem targit, yuli-tt-id lɣiḍ, yebda-tt-id facal seg yiḍarren, maca teṭṭef imeṭṭawen-is, ma ulac kra yellan deg wul-is, ad t-idsmiren. Tekker, tenna i War-isem : - Ur tesɛiḍ d acu, d targit kan, jeddi-m ur yelli d acu i t-yuɣen, atan di tesga yeqqim, ruḥ tura ɣer tkessawt, ad tafeḍ heggaɣ-am-d aɣrum d yiɣi, suffeɣ actal ad ksen, uqbel ad yexreb lḥal mllḥ, hatan ula d igenni yennuɣna…! Dɣa teḥbes awal, am wakken tfaq tettkellix i yiman-is, dɣa terna-as deg wawal : - Ur ttbeɛɛid ara. Truḥ War-isem tessuffeɣ actal-nni, ma d tamɣart tuɣal ɣer tesga anda i yeẓẓel umɣar-is, tufa-t ula d netta yennuɣna, tdub ṣṣura-s, allen-is ldint s tmara ! Terra tabɣest i yiman-is, teqqim ɣer tama-s, tenna-as : - Acu i k-yuɣen akka ay amɣar ! Kra tebɣiḍ ad ak-t-id-awiɣ ! Netta yessusem kan, imuqel-itt, imir iga-as leɛnaya, yenna-as : - Ḥulfaɣ amzun ussan-iw kfan… Tegzem-as-d awal temɣart-is : - Ah ay amɣar, acu i k-yeblan ula d keččini taṣebḥit-a, ur tesɛiḍ d acu ara ak-yaɣen ! - Amɣar yefhem belli d acu i as-d-tenna fell-as War-isem, acku ula d netta yurga ad yemmet. Di lawan-a ideg ttmeslayen, War-isem tella teqqim ɣer tama n wactal tegguni, tugna n jeddi-s gar wallenis tettezzi, anezgum deg wul-is yettnerni ; ɣellin-d yimeṭṭawen, tegguma ad ten-temḥu tannumi. Tessugen iman-is d jeddi-s, tikkelt tetturar yid-s, tikkelt yettales-as-d, yal tikkelt amek ! Am wakken d asegrew n waktayen-is i d-yettemseḍfaren. Tserreḥ asugen-is ; din kan yenneqbaḍ wul-is, amzun tesla i wanza n ṣṣut n jeddi-s yessawal-as-d ! Tekker War-isem tcudd ikerri-nni d uɛejmi ɣer tzemmurt, imir terfed iman-is tettazal-d ɣer uxxam, tra ad tḍil s tuffra ɣef jeddi-s, ma ulac ma twal-tt-id jidda-s ad tuẓẓaf fell-as. Mi tewweḍ ɣer umnar n tewwurt n unekcum ɣer uxxam, tebda tleḥḥu


- 19 -


xmat, xmat tga tameẓẓuɣt ɣer tewwurt n tesga, ad tsel i ṣṣut n jeddi-s, nettat ur tebɣi ara ad tnewwec, tra kan ad telken ulac d acu i t-yuɣen ; imir kan nettat tettḥessis, tesla i jeddi-s yerna-d deg wawal i jidda-s : - Ur ttɛeṭṭileɣ ara ad kent-ǧǧeɣ, ɣef waya bɣiɣ ad kem-weṣṣiɣ ɣef War-isem, slid nettat ara am-d-yeqqimen ad tsenndeḍ fell-as, ad tsenned fell-am, ɣur-m i as-tḥekkuḍ terfed-itt yemma-s uqbel ma ad tt-yaɣ mmi-tneɣ. Ah ! Tisselbi n temẓi ur tettḥezzib deg wayen ara d-yeḍrun, iḥemmel-itt tḥemmel-it, yeḍra-d wayen ur bnin, ur ḥṣin di tcurkaḍt xedmen ; lameɛna ɣas akken terfed yebɣa-tt d tameṭṭut-is, yebɣa llufan-nni ad yimɣur gar-sen, acu taggara ur ddiren di sin, d yelli-tsen i irefden taẓeyt ! Ula d nekk terra-yi tmara imir qebleɣ ad zewǧen, acku netta yezga yettaḍen, bɣiɣ ad yezhu d tin iḥemmel, yerna meyyzeɣ di llufan-nni ur yesɛi ddnub, d arra n tayri-nsen ; meskint ur tuksan i as-iḍerrun, tezga tettxemmim deg wussan-is, tebɣa ad tecbu tanada-s, maca aḥlil di zzher-is ! Ɣur-m i As-teqqareḍ ɣef yizri-s, ma ulac ad teḥqer iman-is ; ɣur-m ad ttḥeqren wiyaḍ… Ur ɛad i d-yekfi awal, nettat am wakken teḥṣa, ul-is mi d-yenna, ass-a tenger texla, ɣef jeddi-s Ɛmer mi t-twala, yeẓẓel di lqaɛa, tessureg imeṭṭi yekfa, imir ad tebdu lmerta. Tuɣwas mi tesla ayen ur tenwi, jeddi-s ur yezmir i wayen-nni, yeḥbes wul-is, leɛmer-is am di tirga mi tuli. Tbedd ɣer tama n jeddi-s, terra-d nnehta, tenna : - Ayɣer a jeddi, txedɛeḍ-iyi, deg usirem n tasaḍt tezzuzneḍ-iyi, nekk d jidda teǧǧiḍ-iyi. Teɣli tmeɣbunt ɣef tgecrar, terfed afus n jeddi-s yeqquren, tsuk yiss imeṭṭi aneggaru i d-yeqqimen ; deg waggas ur yelli win i ttyugaren. Tga-tt-id jidda-s gar yifassen-is, ur d-tufi kra ad tesfeḍ seg wallen-is, tebɣa ad tṣebber deg-s, tenna : - Ur ttarra ɣer lxaṭer-im, ttu ayen i d-yenna jeddi-m, ayen tesliḍ kkes-it si lbal-im, ur tesɛiḍ d acu ara ibeddlen gar-aneɣ, jeddi-m yeǧǧa-aɣ, yexdeɛ-ikem, yexdeɛ-iyi, tura deg-s ad aɣ-iṣebber Rebbi ; ur ttaggad a yelli, aql-i yid-m !.

- 20 -



Tenṭeq War-isem, ɣas akken lḥif yugar-itt, tigullet di tfekka-s i dtegma, tuɣal am tafukt yerna usigna, ɣer daxel-is tekker-d lɣimra, imir tenna : - Ḥṣiɣ a jidda tḥemmleḍ-iyi ɣas akken ur teɛdil tasa d turet, maca d awezɣi ad ttuɣ, ɣas ula ma tatut tella ; amek ara ttuɣ ayen teẓẓa degi tannumi, jeddi Ɛmer deg wuffad-iw am yiṭij mi ara d-yeflali ! Amek ara ttuɣ asmi i yi-d-yenna : ɣur-m ad tayseḍ taḍsa deg wulim, ɣas ula ma tafukt tettɣab, s tafat azekka yid-s ad d-tali. Ur ttaggad ccetwa ma teshab, lhemm-im am udfel mi ara d-yeɣli, ɣef yiri n usirem-im ad yefsi. Ur ttaggad, leɛtab-im d tidi uḥerri, win leɛmer yekni, d tameṭṭut i d-ttrebbint lemḥani. Aktayen-im yeččuren d akukem, ad uɣalen d anya, ad yefruri deg yigenwan am tfenda yessejjayen aqlileḥ. Amek ara ttuɣ a jidda, ul-iw netta i d tasdarit n yal aktay agujil ; amek ara ttuɣ ma yella tatut tella anda ma nella, ma d aggas-iw ur t-temḥa ! Ul-iw yuɣal am telt lxali, s tafat-is mi ara d-teflali, d rruḥ i tenwa ad tawi. Cbiɣ afrux mi yebda iɣelli, ar lɛecc-is mi yebɣa ad yali, d leɛli i yenwa ad iwali, maca annect yebɣu yali yeɣli, zziɣ d netta i d lfani !. Terra-d temɣart nnehta tuyes, tenna : - Ah ya ddunit tɣedreḍ-iyi, d imeṭṭi kan i ttruɣ, deg yiɣeblan tessemrirɣeḍ-iyi, ur ufiɣ ḥedd ad as-ḥkuɣ, ɣur-k a sidi Rebbi, kečč i d Awḥid ɛawen-iyi. Tuɣal tenna i War-isem : - Semmeḥ-iyi a yelli, ma ur rfideɣ di lhemm-im, ur nwiɣ akka i iga deg-m imɣi ; semmeḥ-iyi ma yella rniɣ-am-d lḥif n uxxam, nwiɣ deg-m ttelqim, akka i aɣ-rebban di zzman, tameṭṭut d tin ara isefḍen lɣim. Terfed War-isem s wallen ɣer jidda-s, tenna-as : - Ẓriɣ a jidda, ayen i iɛeddan fell-aɣ d aṭas, ur t-ttettuɣ yal aseggas. Lliɣ ttnadiɣ tasa i yi-gan tansa, tura ggriɣ-d deg yimi n tlafsa ; ḥṣiɣ tura a jidda nekk d arra n waggas. Teɣli War-isem deg yirebbi n jidda-s, tefsi tfekka-s am tcemmaɛt mi ara tt-tessenseḍ ; ur d-teggri teftilt i tudert-is... Irebbi-nni wis


- 21 -


ma ad as-d-yeglu s lxiḍ iffaw, neɣ s telqeq ara yuɣalen yal iḍ am ucallaw, neɣ d tajbirt i lǧerḥ ur nettkaw ! War-isem d yiwet n tirget yellan di lkanun yensan, yessefk ad suḍen fell-as yimennan, ad tuɣal d acaɛil, deg wul iḥerreq, deg yiḍ yezga ineqqer, ma d imi yeggumma ad yehḍer. Aggas n War-isem, d aggas n yal llufan, deg umaḍal ad yuɣal d leqrar, seg tneffut n tyemmat ma teǧǧa-t ad d-yeqher, allen-is i yimeṭṭi surugent am lebḥer, lḥir ad as-yuɣal d taɛkemt n ṣṣber, d abrid n lemḥayen ara d-yenǧer. Aḥlil ! Llufan ma yettru-d, ul ad yefriwes, ɣer tama n waggas n tudert neqqar-as d asirem ur nettayes. Imi ad yeggugem, ul ad yeṭṭef deg lxiḍ n telqeq i d-yeqqimen ; di lbext n War-isem, i d-tella tayri mellulen. Afrux tegri-id tugna n lɛec-is, trennu tuẓma i wul-is. Aktayen d iferrawen-is, ad d-tejmeɛ tudert acewwiq-is ; ahat ad iɣiḍ imdanen, ad t-id-smektin yimruyen, fell-as ur keffun yisekkilen ! Angaz mi ara yaweḍ ɣer yixf n tneffut, d tigzi i d-irennun, akken ad d-yegmer si leḥzen tumert ur yessin yiwen ; ad d-yesnulfu seg yimeṭṭi-s tafenda ur ksiben yijeǧǧigen. Seg waggas alqayan i dttlalent tekta timeqqranin, tid yettawin ɣer tegrawliwin, tid ara dyilin d tagejdit i unadi n yizerfan n llufan, win yeskerker yir zzman. Tullist-a d yiwen yizri angazan, ideg nessarem akmas amtiwan, segs neḍmeɛ ad tmer taluɣt d tnufli i yal llufan… Ta d yiwet n teɣti s wayes ara nedder.

- 22 -


Ur ddiɣ akked Rebbi, ur ferrǧeɣ iḍebbalen Inelmaden n lmajister n tmaziɣt - Bgayet

Tamawt ɣef tira n tullist-a Tullist-a “Ur ddiɣ akked Rebbi, ur ferrǧeɣ iḍebbalen” tura-tt, deg tazwara, Djamila Mimeche s uzwel “Gar tudert akked lmut” i dyeddan deg tesɣunt “Tamaziɣt tura”, uṭṭun wis 2, yebrir 2002, isebtar 99 ar 107. Deg ulemmud n tenfalit n lmagister n useggas 2011/2012 i d-yellan s lmendad n Mass Zahir Meksem, fernen-tt yinelmaden-a akken ad tili d aḍris iɣef ara rsent kra n temsirin yerzan tifukstin n tenfalit (techniques d’expression). Dɣa mtawan akken ad as-beddlen cwiṭ i wudem n tullist-a akken ad ssiwḍen ad d-skecmen kra seg tudert n yinelmaden akked tedyanin iḍerrun deg tesdawit. Ilmend n waya, ɛerḍen ad as-rnun kra n yiḥricen iss ssawḍen sbedden-d tullist temgarad akked tmezwarut i as-yellan d llsas. Mi yekfa usenfar-a, ssutren deg turagt deg lall-is, Djamila Mimeche i asen-yunfen ad tt-id-ssuffɣen deg tesɣunt “Tamaziɣt tura”1 i d-yessuffuɣ Usqamu Unnig n Timmuzɣa. Nessaram ad telhu, ad teḍbeɛ am usaru, i yimeɣriyen ad tehwu Tamawt : Yuɣ lḥal, deg tegnit am ta, alemmud n tenfalit, teffeɣ-d yiwet n tullist s uzwel “Taqbaylit” i yuran yinelmaden n lmagister: n tesga n tmaziɣt n Bgayet : Amarouche Khelfia, Bellal Nourdine, Benallaoua Anissa, Boudia A. Rezzak, Ighit Md Ouremtane, Mehdi Nacer, Mehdioui, Nabil, Meziani Yassine, Moulai Zoulikha, Sadou Smail, Said Miria., Bellache takfarinas, deg tesɣunt “Tamaziɣt tura” uṭṭun 04, yennayer 2010, i yura deg tazwara Saïd Chemmakh s uzwel “Ɛecrin duru”. 1


- 23 -


N

ezdeɣ deg yiwet n txebbut deg tnac d aɛeggal : yemma, baba, nekkni deg ɛecra yid-nneɣ ; nlul-d wa deffir wa, setta n teḥdayin d timezwura akked rebɛa n warrac d ineggura, nettembibbi am yiqermuden… “D lḥif n uqcic i aɣ-yessawḍen ɣer da !” Akka i teqqar yemma. Seg wasmi i aɣ-d-yefka Rebbi, leɛyaḍ werǧin yensi deg uxxam-nneɣ, cwi kan weḥḥed-neɣ i nettili deg leɛzib am wuccanen ! Tili yal ass ad aɣ-dttawḍen lǧiran… Tidet kan, mi ara nettɛeyyiḍ d lxiq i nxaq, ur nesɛi ḥedd ara aɣ-iwansen, leqrib-nneɣ akk beɛden neɣ sbeɛden imannsen… Rnu, baba yettagi ad neffeɣ. Гas aṭas yid-neɣ, iḥemmel ad aɣ-d-yaf deg uxxam, yuggad ad nezreɛ lbaḍna-s deg taddart ! Ma yella win ixuṣṣen ad t-id-yessekfel imir ad yeɣli fell-as… Ulac win ara t-imenɛen acku win i d-yegren iman-is kra din ad yuɣal ɣef uɛrur-is… Ur as-yettserriḥ alamma yerra-t d idim, rnu imeṭṭi ulac ! Tafekka-nneɣ akk yesdegdeg-itt, yal yiwen deg-neɣ yeǧǧa-as-d ccwami akked ccfawi… Iḥun Rebbi yella uɣerbaz ! Akken i t-idteǧǧa yemma “fket lweɛda, yella wanda trewwlem… tili teḍra yidwen am yiderwicen…”. Neẓra, ɣef waya nḥemmel aɣerbaz… ula d wid yeqqaren yid-neɣ ttwehhimen kan deg-neɣ... deg yimuras ulawen-nneɣ ḥebbsen… yi-cban, wellah ma gganeɣ uḍan… d nekk i d tameqqrant, ɣef waya beddeɣ d tiqenṭert gar-asen… Ayen yellan d Tilelli i d xellas. Umneɣ d ayen i aɣ-yuran maca tikwal tettaweḍ tfidi s iɣes, yettawi layas amkan n usirem, ṣṣber icuba lmut s ttawil… acu kan nnif yettagar-iten akk ! Yak nettidir s nnif, akka i d Leqbayel… Nettimɣur s rrehba akked lxuf, baba yezdeɣ daxel n yal yiwen degneɣ am Waɣzen… Nettaggad ula d tili-s, anda nruḥ ibedd-d d aɛessas fell-aɣ ɣas ulac-it, ladɣa tiḥdayin, yesserẓeg-aɣ ddunit-nteɣ, ad as-tiniḍ ḥala netta i yesɛan tullas ! Lḥaṣun skud nella ddaw leɛnaya-s rray d rray-is, awal d awal-is… Ḥala aɣerbaz i aɣ-yessefraḥen, neẓwer di tɣuri, ula d baba yettzuxxu yis-neɣ maca ɣur medden kan ! Yettcuffu aqendur-is, yettarra tajmilt i yiman-is am wakken dɣa d ṣṣeḥ yessɣer-aɣ ! S wudmawennneɣ, ur aɣ-yettaǧǧa acemma s llqub akked uqejjem… yeḥqer-aɣ,

- 24 -



yeḥseb-aɣ amzun d izan… ɣas yerka seg yidrimen, yessels-aɣ talaba n lḥif, yura fell-aɣ tigellelt akked lexṣaṣ… Di lferḥ n wass-nni yexleḍ yimeṭṭi akked uneggez : “wwiɣ-d lbak” ! Tameɣra yeḍran deg wul-iw tugar urar n taddart ! (Akka i as-neqqar deg uxxamnneɣ acku werǧin nekka din ḥala zzhir-is i aɣ-d-yettawḍen !). Ukt ! Ad ifak fell-i udrar-a n twaɣit ! Maca tin i tent-yifen akk, ur ttwaliɣ “bururu” n baba ɣef wacḥal ! Tikkelt-a iferreǧ-d fell-i s tehri. Wwiɣ-d lbak rnu ad ɣreɣ anda bɣiɣ, d acu i bɣiɣ ! D ayen icuban targit ! Ad ɣreɣ tadamsa rnu deg Bgayet… D ṣṣeḥ werǧin ttyeɛfis uḍar-iw maca ḥefḍeɣ akk imukan-is… Ayen jemɛeɣ deg tkerḍiwin-is ar din ! Ttsebbireɣ iman-iw yis-sent ar d-yas wass n tuɣalin ɣer tesdawit, imir ad d-ɛiwdeɣ talalit… Ʃeddan yimuras, tesqerbeb-d tuɣalin ɣer tesdawit. Heyyan-iyi-d ayen i ḥwaǧeɣ acku ad qqareɣ, ad ttnusuɣ din… d baba i yi-yewwin, yessken-iyi-d abrid. Am leɛwayed-is d aweṣṣi kan ! Ma d nekk la ttwaliɣ akka d wakka ad as-tiniḍ seg lḥebs i d-ffɣeɣ... Mi d-nekfa ccɣel-nneɣ, yenna : - Ddurt ad tɛeddi am waḍu, ass n lexmis ad d-aseɣ ad kem-awiɣ... ma yella kra i teḥwaǧeḍ siwel-n, akka ? - Anɛam a baba ! Ur ttaggad ara fell-i... Ḥemdeɣ Rebbi cekkreɣ-t imi d-ɣliɣ akked teḥdayin lɛali deg texxamt, d ayen akk i d ṣṣeḥ ɣur-i… Σedleɣ akk yid-sent maca Wiza izad… akken i neqqar, akken i neddukul am yiḍudan n ufus… rnu ula d nettat d aɛekkaz i yiyewwten i tt-yewwten ! Yemmut baba-s, yeǧǧa-tt-id gar sin n watmaten-is d lewḥuc, ur tt-id-yettali ara wawal sdat-sen… Baba, am leɛwayed-is, ur ttuḥtameɣ ara alamma ibedd-d nnig uqerru-w… ula ɣer da yettaweḍ-iyi-d akken ad iẓer d acu i la sserwateɣ… Ahat ad iyi-yeṭṭef akked walbaɛḍ ! Ruḥ kan a baba ruḥ. Tesbeɛdeḍ aṭas ! Σni yella kra n yiḥulfan i aɣ-d-teǧǧiḍ ? Nekreh irgazen seg-k ! Argaz icuba tili-w, yeẓra anda qqareɣ, yeẓra anda gganeɣ, d wumi… yessen timeddukal-iw n texxamt… ula d netta icekker-d Wiza… i tikkelt tamezwarut i as-ɛeǧben leḥbab-nneɣ ! Wissen amek ?!


- 25 -


Taggara-ya, uɣaleɣ ur ttwaliɣ ara aṭas Wiza am zik, kcem ffeɣ, ula ɣer tɣuri ur d-tettas ara. - A Wiza ! D acu i d-tesnulfaḍ akka ? Anda i tettarraḍ ? Σni tebɣiḍ ad nnḍen yiḍarren-im deg tesdawit ? Teḍsa-tt-id seg wul, tenna : - Mazal ur tfaqeḍ ara ! D acu ara d-tefk tɣuri ? Teɣriḍ neɣ teqqimeḍ ur iban anda nteddu ! Rnu temẓi d afares, yak qqaren mi ara d-iruḥ lxir ilaq ad as-nefk afus, neɣ ala a Tilelli ?! Wehmeɣ d acu akka i d-yennulfan maca ḍsiɣ-tt-id ! Гas Wiza annect n tsebbalt atan tufa-d argaz ! Maca, wellah ar tuklal acku d tafeḥcuct, yelha wul-is… Wiza teɣreq deg lebḥer n tayri ! tegguma ad terr aḍar ɣer deffir ! Telha-d kan akked tlufa timeqqranin akken i as-neqqar ! Maca terbeḥ tesserbeḥ-aɣ ! Ad teqqim kan ad aɣ-d-tbibb aɛwin ! Ṭṭablanni-nteɣ iɣef ttezzin yikafaren zik, ttnadin ɣef telqimt n uɣrum ma tella ! Tuɣal tsettef d iyuẓaḍ, d tteffaḥ… atg. Newhem anwa-t ugellid-a i tessen, nesteqsa-tt : - Waqila d albaɛḍ n yimɣaren i yesɛan l’Eurο i d-tṣeydeḍ ? - Σni tusmemt ? - Ḥaca a Wiz !... Nebɣa kan ma yesɛa gma-s ad aɣ-t-id-tawiḍ ! Neṭṭerḍeq d taḍsa akken ma nella, ideg tella ula d Wiza ! Mačči tikkelt, mačči snat i tt-nḥell ad neddu yid-s akken ad t-id-nẓer, maca yal tikkelt tettaf-aɣ-d tasebbiwt… ur yektib ara. Yiwen n wass, wissen anwa i as-d-yessawlen i Wiza, yuɣ-itt lḥal tessirid… iban anwa, i wacu asteqsi ! Tɛeṭṭel dɣa ddmeɣ-d tilifun-is ad as-iniɣ akken ur yettqelliq ara… Akken walaɣ uṭṭun-nni n tilifun, teɣli-d fell-i tawla, iles yeggugem yugi ad d-yenṭeq, iɣes yeffeɣ-it wadif ; ɣli-d ay adrar fell-i. Ḥulfaɣ i ddunit tezzi yis-i am tin i ikecmen deg uqemmuc n wanu, leεyaḍ ttεeyyiḍeɣ, timesliwt ulac win ara d-yeslen. D awezɣi wannect-a, ugiɣ ad qebleɣ ayen ẓriɣ, ammer d yenna-tt yenna n medden, tili ur umineɣ ara. Uɣaleɣ ttnaɣeɣ akked yiman-iw, qqareɣ-as : ahat d nekk i ur nettwali ara. Rǧu ad εiwdeɣ tamuɣli ; wellah ar d netta ! ayuh ayuh ! a sidi Rebbi amek ara as-geɣ i rray-

- 26 -



iw. Yuɣal yettnaɣ leɛqel akked lmeɛqul, ma yella ad d-ṭṭreḍqeɣ fellas, ad d-iniɣ ayen ẓriɣ, neɣ ad tt-ččeɣ kan i wul akked yidmaren ad ssusmeɣ ! Anwa ara d-yessugnen annect-a ? Tin ɣileɣ d ultma, tuɣal teɣza-yi tasraft. Ur ḍlimen ara yimenza ; lexdeε si laman i d-yekka. Ṭṭfeɣ tilifun-nni deg ufus-iw, ruḥeɣ deg-sent… Cwiṭ kan tuɣal-d Wiza ɣer texxamt terfa cwiṭ, iban ɣef wudem-is, wissen acuɣer ? Mi tt-ẓriɣ, yenna-yi-d wul-iw tuklal tiɣrit iɣef ara tecfu i lebda. Maca ṭṭfeɣ iman-iw, ɣas akken ɣer daxel tuɣ deg-i tmes. - Yella wi d-yessawlen a Wiza ! D ameddakel-im ulac ccek. Wiza tmuqel tilifun-ines, tenna-d : - Ala, mačči d netta. - D anwa ihi ? - Uuuuh ! Tuɣaleḍ testeqsayeḍ aṭas, ɛni yella kra n lbabur i amiɣerqen ? - Dayen dayen, ur am-d-nniɣ kra, ɣileɣ ulac tuffra gar-anteɣ, ziɣ kemm ulac nniya deg-m. Rǧu ad ffɣeɣ send ad nemsawaḍ ɣer wayen i yugaren aya. Ffɣeɣ seg texxamt ur ẓriɣ anida i tedduɣ, tuɣal-iyi tudert d taberkant, am win yettwawwten s ujenwi, d tiyita ur rǧiɣ. Ayen i yiiɣaḍen ugar, tekka-yi-d seg yimdanen iɣef ur zmireɣ ad rewleɣ. Yiwen d baba, ɣas akken ur ɛziz ara fell-i seg zik, maca ur nwiɣ ara ad yaweḍ ɣer texnanasin am ti ; ma d tayeḍ d tameddakelt ukkud sɛeddaɣ taẓiḍant akked tqerḥant, d awezɣi nwiɣ ad d-yekk waya seg tama-nsen. Deg lawan anda lliɣ ttemyuzzameɣ akked yiman-iw, sliɣ sawalen-iyi-d. - Azul a Tilelli ! - Aaah ziɣ d Dida, azul fell-am ! Akka i as-nessawal deg tesdawit ; maca isem-is n tidet Linda. - Atan truḥeḍ akk deg-sent, ɛni yella wayen i kem-yuɣen ? - Wellah ar d tidet, ur gerrzeɣ ara maḍi, yerwi wallaɣ-iw. - D lxir kan ! - Msefqaɛeɣ akked tmeddakelt-iw ukkud zdiɣ taxxamt, ur iyi-dyenni ara akk wul-iw uɣal ɣer din. Dayen yeɣli uɛeqqa-nni n lemleḥ.


- 27 -


- Ma tebɣiḍ ad tedduḍ yid-i ɣer texxamt-iw ulac akk aɣilif, d acu kan nekk mačči deg tmezduɣt-a tasdawant i ttiliɣ. - Tanemmirt tameqqrant a Dida, wellah ar tekkseḍ fell-i aɣbel ad tyekkes Rebbi fell-am. - Ulac fell-as a Tilelli, ur tufiḍ i xedmeɣ. Nekcem ɣer texxamt, ur yelli wayen ara d-yini yimi, seg wasmi i dwwḍeɣ ɣer tesdawit ur walaɣ taxxamt yecban ta, ufiɣ deg-s snat n teqcicin, lsant ayen ur ttlusuɣ ara nekk ɣer tmeɣra, ula d leḥyuḍ n texxamt ur d-yettban ara yini-nsen seg tugget n tugniwin i yersen fell-asen. - Bonjour les filles ! - Bonjour Dida ! - Ass-a wwiɣ-d yid-i tinebgiwt, d tameddakelt-iw, qqaren-as Tilelli. - Salut Tilelli ! ansuf yis-m ɣer texxamt-nteɣ, nekk d Susu, ma d ta d Fifi. - Azul fell-akent, tanemmirt tameqqrant imi tqeblemt ad iliɣ yidkent, ssarameɣ ad iliɣ d tafessast. - Ulac aɣilif, axxam d axxam-im a Tilelli. Fais comme chez-toi. Ufiɣ-tent ssewǧadent imensi n yennayer, iiiiih, wellah ar t-ttuɣ akk, yal aseggas sɛeddayeɣ-t deg uxxam-nneɣ, aseggas-a sɛeddaɣ-t s wurrif akked yimeṭṭi. Mi d-yewweḍ lawan n yimensi, yal lxir yers-d, ur ǧǧint seksu, ur ǧǧint iyuzaḍ, ur ǧǧint lfakya... Ṭṭseɣ ass amezwaru din, yeɛjeb-iyi lḥal, tiqcicin-nni ttqessirent aṭas, ulac taqsiḍt ur d-wwint, ulac tamsalt iɣef ur mmeslayent. Γas akken ayen i ɛeddan fell-i mačči d ayen ara ssettunt teqsiḍin-a, maca kksent-iyi ɣef wul. Azekka-nni, uɣaleɣ ɣer texxamt-iw, send ad kecmeɣ dduriɣ yiwen n ssur armi i walaɣ Wiza teffeɣ, kecmeɣ wwiɣ-d akk lqecc-iw. Ṭṭfeɣ abrid n tuɣalin ɣer texxamt-iw tamaynut. Zrin wussan, uɣeɣ tannumi akked tmeddukal timaynutin, s taḍsansent i yezgan ɣef yimawen-nsent. Γas tikwal ur tent-ẓerreɣ ara, tteffɣent, ahat zehhunt neɣ xeddment ; maca ur yi-ǧǧint ara ad dmmektiɣ iɣeblan-iw s uqesser, d ufus n tallalt i yi-d-fkant.

- 28 -



Yiwen n wass, Fifi tga-d cwiṭ n tebɣest, tenna-yi-d : - Ad tedduḍ ad neffeɣ ad nmerreḥ kra ? - Wellah ma ḥsiɣ, iruḥ lḥal, ur uɣeɣ ara tannumi tteffɣeɣ imir-a. - Ulac fell-as, medden akk atnan deg berra, tamdint ur tesɛi lawan n tuffɣa. Tebɣiḍ ad temteḍ deg texxamt gar yidlisen-im ? - Suref-iyi kan, ar ass-nniḍen ma yebɣa Rebbi, ass-a welleh ar ɛyiɣ, bɣiɣ ad ṭṭseɣ. - Ulac aɣilif, ar ass-nniḍen, yessefk ad d-temmektiḍ tudert yiwet kan i yellan ; dder-itt neɣ eǧǧ-itt, talemmast ur telli. Ar azekka, ihi, iḍ ameggaz, tirga lɛali. - Tanemmirt tameqqrant. Teffeɣ, awal i yi-d-teǧǧa yettenneḍ deg uqerru-w. Refdeɣ, serseɣ nniɣ-as : wi ẓran ? Ahat sɛant sswab, ahat d nutenti i iwalan tidet anda tella. Ddan kra n wussan, ffɣeɣ-d seg tzeqqa, tessawel-iyi-d yiwet n teqcict, tella tettas-d ɣer texxamt-iw tamezwarut, d tameddakelt n Wiza. - Azul a Tilelli ! - Azul fell-am ! - Amek i tettiliḍ ? - Yelha kan, lḥemdulleh, i kemm ? - Aql-aɣ. Bɣiɣ kan ad am-d-mmeslayeɣ ɣef Wiza, sɛiɣ izen i am-dwwiɣ. - Tuɣal-iyi-d daɣen teq... - D acu yeḍran, nettat acḥal d asteqsi d anezgum ur teẓri d acu i texdem yalmi tewweḍ taluft ar da. Гur-s, izad wawal gar-akent, ur yezmir ad d-yarew aɣunzu-ya. - D aya kan i am-d-teḥka ? - Ih, ayɣer yella wayen-nniḍen ? - Suref-iyi kan ur bɣiɣ ara ad mmeslayeɣ ɣef usentel-a, fiḥel ma snedfeɣ-d leǧruḥ, nettat teẓra nekk ẓriɣ, yal yiwet ad tawi abrid-is. Uɣaleɣ-d ɣer texxamt nnuɣnaɣ, mmektaɣ-d ayen yeḍran yid-i. Yerna tettcebbiḥ deg umeslay ɣer medden. Akken qqaren, tewwetiyi tezwar ɣer yimeṭṭi, texdem-itt tezwar ɣer ucekti.


- 29 -


Iḍ-nni kan, kkrent teqcicin-nni ad ffɣent, ḥulfaɣ amzun ḍaqeɣ deg texxamt-nni, dɣa ddiɣ yid-sent ɣer berra, s usirem ad ttuɣ cwiṭ ayen i yeḍran yid-i. Neffeɣ, ufiɣ tamdint teččur d imdanen, ad as-tiniḍ yiwen ur yeqqim deg uxxam-is. Wa netta, tameṭṭut-is akked warraw-is ; wa netta akked yimeddukal-is. Ttaḍsan akk, zhan akk. Ḥulfaɣ anagar nekk i yesɛan iɣeblan gar-asen ; ala nekk ur nezhi ara. Ula d tiqcicin-nni ukkud ddiɣ, ulac win i wumi ur mmeslayent ; ulac win ukkud ur ḍsint, acku nutenti uɣent tannumi d tuffɣa, ssnent aṭas n medden, yya a wa, yya a wihin. Yidir yakan yezga ɣef yimi-nsent, segmi i yiyeẓra yugi ad yekkes allen-is fell-i, yebda yettezzi-yi-d sya wesya, ahat ad iyi-d-yesseɣli, maca ur as-fkiɣ ara tagnit. Γas akken ur ḍsiɣ ara nekk, maca dhiɣ deg wid yettaḍsan, sɛeddaɣ-d iḍ igerrzen, kkseɣ cwiṭ ɣef wul-iw, teɛjeb-iyi tuffɣa yid-sent, tessettuy iɣeblan. - Yeɛjeb-am lḥal neɣ xaṭi a Tilelli ? I yi-d-tenna Susu. - Wellah ar d taxlaft, tanemmirt-nkent. Kunnemti d tidet tfaqemt i tudert. - Ulac aɣilif, mazal ussan, mi am-d-yehwa ad teffɣeḍ ini-d kan, ddunit ur tesɛi talast ama deg wadeg, ama deg wakud. Taxxamt ur am-d-teskan imal-im anda yella. Ula d at zik qqaren : bedd, ad twaliḍ ; ddu, ad d-tawiḍ ; qqim, ulac. - Ad am-yeɛfu Rebbi ɣef yimeslayen-a, rran srid ɣer wul-iw. Tanemmirt-nkent merra ; akka meqqar ur ttɣimiɣ ara iman-iw am tderwict deg texxamt. Ass yettawi-d wayeḍ, tuffɣiwin rennunt-d, atan ɣer temdint, atan ɣer tmeɣra n umulli, atan ɣer ccḍeḥ gar leḥbab deg tmecḍeḥt (Discothèque )... lḥasun, ur tufiḍ ara teǧǧeḍ ay ul. Deg tazwara d tarewla kan i rewleɣ seg terẓeg n wussan i ttidireɣ, maca tuɣal-iyi tudert-a tamaynut d tannumi, acku lxaṭer yefreḥ, tafekka tertaḥ, ulayɣer ara nadiɣ ɣef lqerḥ. Zgiɣ ttaḍsaɣ, ferḥeɣ. Uɣaleɣ ssneɣ aṭas n medden gar yilemẓiyen akked tlemẓiyin. Yal taɣawsa tla ass-is amezwaru. Am yiwen n yiḍ, atta tessawel-iyi-d Dida. - Lili ! rwaḥ rwaḥ !

- 30 -



Ula d nekk ur qqimeɣ ara war isem amecṭuḥ. - Oui, yella umaynut ? - Anagar annect-a i yettilin, tkeyyfeḍ yakan kra n wass ? - Buh fell-i ! wamma ssawḍeɣ ar da, anda ara keyyfeɣ ? - Ax tra ɛreḍ, d ta i d tagnit ad tissineḍ amek-it. - Ala ur cukkeɣ ara ad izmireɣ, ur ssineɣ ula amek i xeddmen. - Ur ttaggad ara, yeshel maḍi, jbed nnefs, tessuffɣeḍ-t-id. - Aha awi-d akka ad ɛerḍeɣ, ma ad yeffeɣ fell-i, ur lliɣ d tamezwarut, ur ttiliɣ d taneggarut ! Jebdeɣ abrid, iruḥ-iyi nnefs : Kuḥ kuḥ kuḥ... - Hahahahaha... akka akk i aɣ-teḍra tikkelt tamezwarut, maca mi ara tennameḍ, ur tzemmreḍ ara ad am-yexḍu. Ad am-yuɣal d amwanes, d arfiq n ddiq. D tidet ayen iyi-d-tenna Dida, yuɣal-iyi ddexxan am win yennumen lqahwa taberkant, zgiɣ ttkeyyifeɣ. Ih, ssuliɣ ula d aswir, rniɣ ɛerḍeɣ ula d tissit. Ass amezwaru mi i swiɣ ur d-wwiɣ ara s lexbar armi i dufiɣ iman-iw deg texxamt-iw s ufella n wussu. Ziɣ d timeddukal-iw i yi-d-yewwin, ta teṭṭef-iyi-d sya, ta sya yalmi i yi-d-ssawḍent ɣer texxamt. Mi d-kkreɣ, ufiɣ-d lxaṭer-iw d afessas, yefres kra yellan d anezgum, amzun ssardeɣ-d allaɣ-iw, ssazedgeɣ-t. Ula d leqraya-nni rriɣ-tt ɣer rrif, tikwal kan i d-ttaddameɣ idlisen-iw ttekkseɣ-asen aɣebbar. Гer tesdawit tikkelt kan akka ar i yi-yawi ubrid, ur ttruḥuɣ ara. Rriɣ-tt kan i tuffɣiwin, amerreḥ akked ssehrat deg berra. Yiwen n yiḍ nruḥ ɣer tmecḍeḥt, d ayen izaden, d amaḍal-nniḍen i yellan din, imdanen la ceṭṭḥen, wiyaḍ la ttessen, wa ur yecliɛ seg wa. Ass-nni yif akk ussan. Ceḍḥeɣ armi i yi-teccef tidi. Imi d abrid yenǧer i zzhu acuɣer ara gganiɣ am tgujilt. Dɣa ɛniɣ Yidir, acḥal netta yettezzi-d ɣur-i maca ur as-fkiɣ ara tagnit. Saẓḍeɣ yid-s tiɣimit, ayen ceḍḥeɣ, ayen ceḍḥeɣ, ddiɣ di lebɣi i lebɣi-w. Serrḥeɣ i tfekka tulwa, ziɣ ccḍeḥ d tilelli, am win i iẓuren yedɛa. Sgunfaɣ, yeffeɣ uqdim, yeffeɣ ujenniw agensan, iɣeblan ur ẓriɣ anda nsan. Ayen yettezzin deg uqerru meqqer. Ulayɣer ara saẓẓiɣ tudert. Ur d-ukiɣ neɣ ukiɣ-d yehwa-yi, fkiɣ lkar i rray-iw. Ssabenneɣ iḍes akked Yidir.


- 31 -


Ssneɣ tuzzuft, semmdeɣ yis-s tameɣra n yiman-inu. Tiẓedt n wassnni ala wi tt-yeddren ara yissinen azal-is. Wwḍen-d yimuras n tefsut, yessefk fell-i ad uɣaleɣ ɣer uxxam, ɣas akken nnig n wul, am win yetteddun ɣer yizem ad t-yečč, imi ẓẓay wudem n baba ad t-waliɣ. Seld akk ayen i yeḍran akked wayen i yexdem, yuɣal ur yeswi ara ɣur-i iclem. Wḍeɣ, cwi kan d yemma kan i yellan. - Lɛeslama, s yelli n tasa ! - Azul a yemma, amek i tettiliḍ, acḥal i kem-jjmeɣ a yemma ? - Aql-aɣ a yelli, sswal fell-am kemm, acḥal ur neẓri udem-im. Atan aglim-im yenṭeḍ ɣef yiɣes, ayɣer ? ɛni tuḍneḍ ? - Ala, d leqraya kan i yi-yessefnan, d tudert-a i yuɛren. Deg lawan ideg i lliɣ ttmeslayeɣ akked yemma, yekcem-d baba, s taẓẓayt kan i sserseɣ leḥnak-iw ɣef wayla-s. Mi t-ẓriɣ ḥulfaɣ s lǧerḥiw yendef, mi ara d-mmektiɣ baba, ifetti lqid i yi-icudden, beqquɣ ad srifgeɣ s anda ur ẓerreɣ ayen ara yi-t-id-yesmektin. Tettɣaḍ-iyi yemma yenwan tuɣ argaz afeḥli, yenwan tuɣ bu tissas. Ttɣaḍen-iyi wayetma yenwan sɛan baba-tsen d win yesseḥbibiren ɣef uxxam. Гaḍen-iyi imi nwan baba-tsen d amecḥaḥ acku yebɣa ad yeḥrez cwiṭ akken ad asen-yexdem ttawil, ad ddren deg talwit. Tawaɣit asmi ara ẓren wat uxxam timucuha-s. Tɣaḍ-iyi terwiḥt-iw, amek i lliɣ amek i yuɣaleɣ ! D netta i d ssebba n wayen ɣer wacu i wwḍeɣ akka. Ʃeddan wussan n yimuras s tmara, uyseɣ melmi ara ǧǧeɣ axxamnni i yeččur baba s tebrek akked terẓeg. Uɣaleɣ-d ɣer Bgayet, ɣer tmezduɣt tasdawant, ad kemmleɣ ayen akken i ǧǧiɣ, ad uɣaleɣ ɣer tudert n zzhu akked tuffɣa. Amalas-nni dɣa seld imuras, nheyya iman-nteɣ ad neffeɣ, ncebbeḥ akken ilaq, nruḥ ɣer tmecḍeḥt, necḍeḥ, neṣker, eǧǧ ayen ur nexdim ass-nni daɣen. Mi i d-neffeɣ, deg ubrid n tuɣalin, ntant wallen-iw deg tid n Wiza, tella akked yiwen n yilemẓi. - Akka a Tilelli i tuɣaleḍ ? Mačči akka i kem-nwiɣ !

- 32 -



- Гurem ad d-ternuḍ awal, wehmem a medden, walit kan anta d ḥaǧǧa-ya i d-yettmeslayen ! Ad d-heḍren akk medden kemm ad tessusmeḍ a yelli-s n leḥram. - Ttqis d acu i d-teqqareḍ, wzen imeslayen-im send ad ten-idtessuffɣeḍ. - Imeslayen-iw weznen yerna meslen, ur d-heddreɣ ara kra ɣef yiwen alamma d tidet. - D acu i am-xedmeɣ imi i d-teggareḍ akka ɣur-i am yir aqjun ? - Ad kem-id-ɛezzint, a tafuḥant, tettarraḍ iman-im amzun ur teẓriḍ kra ! A times ddaw n walim, a tamakurt n yirgazen, a timseddremt n yixxamen ; ur tettsetḥiḍ ara, tettedduḍ d tizya n baba-m, yerna terniḍ-d wayeḍ ar wannar-im. - A Tilelli xzu cciṭan qerriḥ wayen d-teskerkiseḍ akka. - Ulac cciṭan nnig-m ara xzuɣ, ulac win i kem-yugaren kemm ? - Ad yenɛel Rebbi kra i akem-irebban, aha tura suffeɣ-d i yellan deg-m, ḥku-t-id sdat medden. Nekk ur fhimeɣ iqiḥ. - Ur tebɣiḍ ara mi d-faqeɣ s txidas-im kemm d baba a kra ur nettneḥcam ! - D acu i d-yegren baba-m deg umeslay-nteɣ ? Atan tebdiḍ tessexlaḍeḍ ceɛban deg remḍan. - Tenwiḍ ur faqeɣ ara, tettedduḍ yid-s ? Asmi akken i am-dyessawel, kemm telliḍ tessirideḍ, ẓriɣ s wallen-iw uṭṭun-is, mačči d medden i yi-d-yennan i wakken ad ten-skiddbeɣ. Ur kem-id-steqsaɣ ara tugiḍ ad iyi-d-tiniḍ anwa ? - Wellah ma tettneḥcameḍ, ziɣ zur wudem-im, d nekk ara yeddun d wuɛwij-nni n baba-m ! Xdem tura lxir, ah ! Kemm wis anda tefkiḍ rray i rray-im, tessawel-d yemma-m kkseɣ-as anezgum, ziɣ kemm tesbubbeḍ-iyi-d igejduren ! - Nniɣ-am nker ma ad tnekreḍ, ayen i tebɣiḍ ad as-tesleḍ nniɣ-amt-id. - Yah, mazal imi-m meqqer, ur zmireɣ ad sleɣ i rregmat-im, taneggarut steqsi yemma-m ɣef wass-nni. Ahat nettat ad tt-tamneḍ. Teṭṭef ameddakel-is seg ufus, ruḥen.


- 33 -


Uɣaleɣ-d ɣer texxamt, kecmeɣ ɣer wussu ad ṭṭseɣ, maca ugint ad medlent wallen-iw, tessexreb-iyi–tent Wiza, ddewwiren yimeslayenis deg uqerru-iw. Mi yuli wass, ḥareɣ, ssawleɣ-as i yemma i wakken ad waliɣ ma d tidet ayen i d-tenna Wiza. - Allo ! A lxir a ye ! - Sbeḥ lxir a yelli, amek i tettiliḍ ? - Labas, bɣiɣ kan ad kem-id-steqsiɣ ma yella kra n wass i as-dtessawleḍ i Wiza s ttilifun n baba ? - Ih, d tidet a yelli, yella ubrid-nni, ma ur i yi-yeǧǧi ara Rebbi ad skidbeɣ, ass-nni d amenzu n yennayer, bɣiɣ ad ẓreɣ ma yella ad dtaseḍ neɣ xaṭi, ttilifun-inem yella isekker, ttqelqeɣ fell-am, ma yella kra i kem-yuɣen, dɣa ssawleɣ-as-d i Wiza. Allo, allo, la yi-d-tselleḍ a yelli !... D awalen-a i d-sliɣ d ineggura, tewwet-iyi-d yiwet n lɣemma, ruḥeɣ deg-sent am wass-nni i walaɣ uṭṭun n baba deg ttilifu n Wiza, ɣliɣ. Ih, akken qqaren : Ur ddiɣ d Rebbi, ur ferrǧeɣ iḍebbalen...

- 34 -


Amyexdem yaf-it Lydia GUERCHOUH

A

kken yebɣu iweǧǧel-ak Rebbi, ayen i txedmeḍ ad ak-yuɣal ɣas ad d-yeqqim yiwen wass i umaḍal. Nesselḥeq ar yiwen n wakud anda wa ur iɛeqqel wayeḍ, tagmat temḍel-itt teḥraymit, imdanen akk ttazzalen ɣef nnfeɛ-nsen, ma ufan-k deg ubrid-nsen ur k-ttqilin ara, ma zemren ad wwten yis-k ur ak-ttcuḥḥun ara, awi-d ad awḍen anda d-ɣlint wallen-nsen lemmer dɣa ulac Rebbi tili nemsengar gar-aneɣ, neqbel ad tedderɣel tiṭ-nneɣ ma yella ad ddreɣlent wallen n watmatennneɣ! Dda Saɛid d yiwen n umarkanti di taddart maca yemgarad ɣef yimarkantiyen-agi nniḍen imi leɛmer iqass iman-is s wayen i yekseb. Am netta am yirgazen n taddart neɣ ahat yeḥqer iman-is sdat-sen imi ur d-yeǧǧi ara aqcic ara irefden isem-is, ulac win ara tid-yaddren asmi ara medlent wallen-is, ayla-s ad iruḥ d iftaten, ad tɣellten wid ahat ur t-nuklal. Maca yefka-as-d Rebbi Wiza tecba argaz, tekkat ddreɛ, tettawi-d lḥeqq-is ula anda yella yiɣil, tgellu-d ula s wayen ur nelli d azref-is ! ɣef ɛecrin n yiseggasen i tedda d tislit. Seg wakken tewɛer, yeqbeḥ yiles-is, yezga ccwal deg uxxam n yimɣaren-is, ur hennan ara seg wasmi sen-tekcem axxam. Nettat twulef, akken i tga yerna ulac win i tt-id-yesrusun asmi meẓẓiyet, tettidir s ccwal, maca anwa i terra tmara ad as-yessusem ?!


- 35 -


Ɛeddan sin wagguren ɣef tiddin n Samya, ultma-s taneggarut, tebra-d Wiza tewwi-d yid-s aqcic n sin yiseggasen. Ula akken mi ttid-yerra lḥiḍ ur terri ara aḍar, tezga d amennuɣ akked yemma-s, yessetma-s, lǧiran… tin i s-yessewwen taɛebbuḍt-is d Nina, yelli-s n tǧaret-is i yuɣ mmi-s n ɛemmi-s n Wiza, ur tethenna ara armi i mɣunzant twaculin-nsent. Zrin yiseggasen, teɣli yemma-s akken ur tettnekkar, ur terni ara ddurt mi terra rruḥ. Wiza d tafeḥlit, ulac d acu i s-yettruḥun ifadden, ma terra-d lḥiḍ gar wallen-is ad t-thudd s yifassen. D nettat akk i iqublen baba-s, wissen kan ma s wul neɣ s ṭṭmeɛ. Ma d mmi-s ɣas yewweḍ d argaz, ixuṣṣ ciṭ di leɛqel, yezga deg yijufar n yemma-s, iwulef-itt am tselluft, d nettat i as-iferrun iɣeblan-is, trebba-t-id amzun d taqcict, ur as-teǧǧi ara ad iḍebber ɣef uqerru-s am netta am tezyiwin-is neɣ ahat tuggad ad t-ḥeqren medden imi d abuhal. Asmi d-yessawel lajel n baba-s, Wiza tmenna kan lemmer i dyessers annect-nni n wayla akked udrim ɣef yisem-is akken ur ttferreq ara akked yessetma-s. Yuɣ-itt ujenniw ɣef cci, di tmeddurtis yakan tettezzi-as kan deg wawal, wannag annect-nni yekseb awid anwa ara yeččen, awi-d anwa ara yebnun neɣ anwa ara ixedmen akal. Mačči d ayen i yezmer umdan ad t-yečč di tudert-is xerṣum xdem i laxert-ik. Nettat d ccwal kan i as-yehwan, ur teḥmil ara ad tawi taɣawsa ma yella ur tt-id-tessukkes ara s yiɣil-is, wannag ur tesɛiḍ i yellan gar-as akked yessetma-s, d nutenti maḍi i tent-yettsaɛafen, maca akka i d Wiza, ayen akk yellan di lqaɛa n Rebbi ammer tufi d ayla-s. Mazal wwiḍen 40 wussan ɣef lmut n baba-s, Wiza tessawel i yessetma-s akken ad asent-tefk amur-nsent i tebḍa nettat akken i as-yehwa ma d adrim ur t-id-tuddir ara maḍi. Mi walant ayen i tentid-iṣaḥen seg wannect-nni n trika n baba-tsent, Samya akked Kahina ugint faruq i asent-tga Wiza, tikkelt-a beddent-as s lqedd, s anda akka ara tessiweḍ ?! Ɛeddant imir sawlent-as i ɛemm-nsent maca yugi acku asmi i yuɣ mmi-s Nina iɣef tt-terkeb tismin, tezzwer-as deg ubrid, tewwet-it, tegzem-as aḍad acku ur d-yekki ara mgal zzwaǧ-nsen. Yecɛef yernu

- 36 -



tura netta d amɣar amuḍin. Uɣalent sawlent i ɛemm-nsent nniḍen, Qasi. Netta yejmeɛ-itent-id di tlata, yessuter di Wiza ad ferqent akk ayen i d-yeǧǧa baba-tsent ama d ayla neɣ d adrim s leɛdel, d ayen i tettalas nettat i ttalasent ula d yessetma-s, neɣ ma tugi ad d-kecmen lwerrat, kullec ad yeffeɣ afus-is. Wiza tennum txeddem rray-is mačči ass-a mi d idrimen ad ten-teǧǧ ad ttwaferqen s leɛdel ! Tikkelt-a tugi maḍi ad tefreq, ih ! D ddreɛ ! D nettat i irefden baba-s, d nettat ara t-iwerten. Akka, di ddunit-a ideg d-neggra, ulac win ixeddmen kra i wudem n Rebbi, ur nreṭṭel awren ala i win yesɛan irden, yerna nezga nessaram ugar n wayen i nefka, anda neḥṣa ur d-tettuɣal ara, d tarewla ! ad d-nesseɣli ula d taɛdawit… Ɛerḍen medden ad d-rren Wiza ɣer ṣṣwab maca yeqqur uqerru-s. Dda Qasi yuyes, teskufferra-t taluft ur nelli d iɛewwiq. Yuɣal yessaweḍ-itt ɣer ccreɛ akken ad as-ɣelqen imi i Wiza. Asmi i as-d-sawlen ad tqabel yessetma-s d ɛemm-is ɣer ccreɛ, yeṭṭef-itt zzɛaf seg ucebbub, tɛewweq d acu ara texdem, ala awal-is ur nettruẓu ara. Werǧin txemmem ad terr aḍar ɣer deffir ɣas di lexṣara. Tikkelt-a imi smeɣren taluft ula d Wiza tessemɣer lecɣal-is. Mi d-yeḥḍer wass-nni ideg ara d-mqabalen ɣer ccreɛ, tekker Wiza ɣef zik lḥal, tewwi yid-s mmi-s, teffeɣ ɣer tejmaɛt, teqqim teffer deffir n lḥiḍ akken ur tt-id-ttwalin ara wid ara iɛeddin. Dda Qasi ula d netta zik i yekker, mi yewweḍ ɣer tejmaɛt, teffeɣ-asd Wiza am tewkilt, yewhem maca yeḥṣa yella wacu i as-d-thegga. Akken kan iruḥ ad d-yezzi ɣer deffir, mmi-s n Wiza yesselḥeq-as tiyita s usɣar s aqerru dɣa din kan i yeɣli. Amzun ur terwi ara, temmeɣ fell-as Wiza, tekkes-as akk iceṭṭiḍen-is, teǧǧa-t-id ɛeryan. Tejbed-it, tesseḥnunef-it akk di lqaɛa, tezzuɣer-it ɣef yiblaḍen, terna deg-s tiyitwin armi iɣab deg-s nnefs, teǧǧa-t akken ɛeryan yeḍleq di lqaɛa i sluɣen yidammen-is. Mi d-temlal taddart ɣer lǧanaza n Dda Qasi, akk medden yeffeɣ-iten ccek, ala Wiza i izemren i tlufa yecban tigi ! Ssawḍen-tt ɣer yimsulta, ggullen ad d-rren ttar n urgaz. Wiza ḥekmen-as 10 n yiseggasen n uneḥbus ma d mmi-s 7 n yiseggasen kan.


- 37 -


Zrin yiseggasen, yeffeɣ-d uqcic si lḥebs, ur yufi ara anda ara yerr, teɛreq-as yemma-s-nni i t-id-yessawḍen anda yella, leɛmer i ttifureq yerna d nettat i as-tt-igan. Yettawi yettarra am uderwic, yessutur tin n Rebbi, yuɣal iruḥ s axxam n baba-s ikemmel din ussan-is si leɛḍil ad d-teffeɣ yemma-s. Mi teqfel Wiza 10 n yiseggasen uneḥbus, tuɣal-d ɣer taddart, teglad s rrehba. Iseggasen-nni i tezri di lḥebs nejren ɣef wudem-is, ad taggadeḍ ula mi ara d-ɣlint wallen-ik deg wallen-is, udem-is ireqq deg-s ttar. Ɣas ma allaɣ-is yekkuffet, ul-is yeḥreq maca tafekka-s teɣli, ṣuḍ-itt ad tafeg, aṭas n wid ur tt-neɛqil ara, sḍefren-as tamuɣli akken ad kksen ccek. S tmara i tetteddu maca tejmeɛ-d akk tabɣest i asyeqqimen tbedd di tejmaɛt sdat ugraw n yirgazen, tenṭeq ɣur-sen : - Ayen i ken-yettraǧun ad t-teẓrem ussan-agi kan. Teddem-d tayemmust tamecṭuḥt, tefsi-tt, tessuẓ-itt s anzaren-is, tcumm ayen yellan deg-s dɣa yuɣal-itt-id ciṭ n rruḥ. Tura mi terna lkif d acu neɣ anwa i izemren ad tt-id-yeḥbes ? Terfed aqerru-s, teqɛed lqedd-is, tkemmel abrid-is ɣer uxxam-nni i teǧǧa yexla, teḍmeɛ ahat ad n-taf mmi-s yettraǧu-tt neɣ ahat ula d winna tettu ansi i d-yefruri. Tɛedda ssmana, d nettat ziɣ i terǧa lmut, neɣ ala Rebbi kan i izemren ad yaru imal n umdan. Ur terbiḥ adrim ur ttettaf di laxert-is. Taddart akk tɣunfa-tt, ulac win iqerrben ad tt-yemḍel maca tebda tetteffeɣ-d rriḥa-s seg uxxam. Nnejmaɛen kra n yirgazen, heggan-as aẓekka, meḍlen-tt, meḍlen yid-s taqṣiḍt-is i yesburen akk tilemẓiyin ukkud teccrek isem neɣ adrum. Rnan 40 wussan, yejba-d mmi-s ɣer taddart n xwali-s, yufa-d yemma-s uɣalent fell-as tmedlin. Akk ass-nni yesɛedda-t di tmeqbert, ɣas yedderwec maca ibedd ɣef uẓekka n Dda Qasi, yessuter deg-s smaḥ, yeḥṣa ayen ur teḥṣi yemma-s ikesben leɛqel. Ar tameddit, yekka-d akk i taddart, yessutur aceṭṭiḍ iss ara idel, ad yesɛeddi yis-s teqseḥ n usemmiḍ n yiḍ maca ulac win ur t-nuggad ara ɣas akken aṭas i iɣaḍ maca uggaden lehdur n medden.

- 38 -



Ar yiḍ, aqcic ameɣbun yerra ɣer tejmaɛt, yeqqim armi i nsant akk teftilin deg yixxamen, yekkes akk iceṭṭiḍen-is, yeqqim ɛeryan i usemmiḍ akked waḍu yettzuffun, yenquqel armi d amkan-nni ideg n-ǧǧan netta akked yemma-s Dda Qasi yettexbibiḍ deg yidammenis, yeḍleq din. Azekka-nni, tafejrit, ufan-t yeqqur, yemmut akken yenɣa.


- 39 -

Iqrucen Mohand Arab AIT KACI

R

rṣaṣ am ubruri nnig uqerru-is. Isers iman-is Farid at Selṭan deg yiwet n teḥnact anida yeḍmeɛ ulac acu ara t-id-iḥazen. Ul-is la iḥebbek si tuggdi. Ikkes ccek seg-s belli azekka ad yecreq yiṭij fell-as. Dayen ! Tudert-nni-ines n ilemẓi i n-yeǧǧan tasdawit n Tizi Wezzu, kraḍ n wagguren meqbel, tban-as-d tura am lexyal n walbɛaḍ n tedyanin i s-d-yeḥya walbɛaḍ nniḍen. Imeẓẓaɣ-is yesṭubben-iten zzhir n rṣaṣ yettafgen am ifeṭiwjen si yal tama i s-d-yezzin. Inuda s wallen-is ma yella win ara iwali seg imeddukal-is, ur yufa ula d yiwen. Dɣa terna tuggdi zdaxel-is, u yerna yettkel belli d iḍ-agi i d iḍ-is aneggaru. Ixuyel-d imir-en asenduq-nni ara yeččaren d ajdi, win akken ara yawin i yimawlan-is ɣer temdint n Tubiret, zaɛma d mmit-nsen yemmuten. Netta imir-en ad t-id-yaf lḥal d tafekka tasemaḍt di teẓgi-agi n Mizrana, tin ara sxenzren wuccanen yenɣa laẓ. Sya ɣer da ad d-yessali timegḥelt-is nnig yiri n ubabdar anda yeffer, ad yewwet kra n terṣaṣin ɣer tama-nni ansi i s-d-ttawḍen ijujaḥ n tmes. Iḥseb deg allaɣ-is acḥal i s-d-mazal n terṣaṣin, dɣa igemmel ad tent-yeffer lemmer ad tent-yeḥwiǧ. U segmi i d-ɣlin akka fell-asen irebraben mebla ma yella urǧan-ten, yebḍa netta d imeddukal-is, imi yal yiwen sani iḍegger iman-is akken ad yeffer si tbuciḍant n tmes i d-yeɣlin fell-asen deg yiwen n umkan !

- 40 -



Tura, hat-an am yiddew yeckucebren ɣef yiman-is, aqerru yekcem di tuyat, tigecrar ɣer yidmaren-is, tafekka-s merra tenṭeḍ deg wakal am tin iḥerzen iman-is. Imeṭṭawen kkawen deg-s, taɣect-is tebbeḥbeḥ seg yisuɣan-nni imezwura n txazabit. Imetman ulac, ad as-tiniḍ uɣalen akk d tidi tasemmaḍt i as-yeslexsen leḥwayeǧ-is. Swayeɛ timezwura yemsawal netta d imeddukal-is. Acu-kan, segmi ulac anwa i s-d-yettarran u yerna yebbeḥbeḥ, yuɣal yessusem. Iḥulfa i iman-is imir-en am win yeɣlin ɣer tqaɛet n umruj lqayen u yeẓran dayen d tin i d tanṭelt-is. Timelsa-ines tuɣal teččur d akal seg uglilez i yesserwa i yiman-is. Yeɣli-d yiḍ, rṣaṣ mazal-it la ixebbeḍ di yal tama, iɛreq-as sani ara yerr taxenfuct n teklact-ines ; yugad lemmer anda ittḥaz albɛaḍ seg imeddukal-is. Laẓ ur as-iḥulfa ara aṭas, Acu kan fad yessekwa-s taɣect-is. Ɣas semmeḍ yiḍ-agi unebdu, netta ur as iḥulfa ara, imi allaɣ-is mačči d win i d-yelhan d tfekka-s tura. Axemmem-ines iwehha ɣer wamek yezmer ad d-yessukes iman-is seg umerdax-agi i sen-gan rrebrab, netta d imeddukal-is. Cwiṭ akka yeḥbes rṣaṣ-nni am ugeffur azwawaḍ mara yezri. Yerǧa ddeqs n wakud ma yella kra ara yembbiwlen, ur yesli i kra, dɣa yessufeɣ-d cwiṭ aqerru-is ma yella kra ara yessenqed. Ur iwala kra. S weḥnunef deg akal am ijirmeḍ alebbaḍ yebda tuɣalin ɣer deffir, sani i yeḍmeɛ ad d-yaf imeddukal-is. Imir-en iḥulfa am win ikecmen deg yiwet n teḥwiḍt n waman yeḥman imi yellexs utriku yelsa zdaxel. D acu i t-yesswehmen d akken zzur-it waman-nni. Dɣa, mebla ma yerna ameyyez di temsalt-agi, izzi allaɣ-is ɣer sani yezmer ad yerr akken ad yaf amḍiq iḥerzen. Mazal yessaweḍ semmus n lmitrat mi d-yebda usṭenṭen n rṣaṣ deg ulac. Igenni yeččur d itran yettmecbariqen di tbuciḍant-nni n tmes yettafgen. Dɣa, mebla axemmem, yemceḥ s tfekka-s semmus n lmitrat-nni i d-yelḥa, d tuɣalin ɣer teḥnact-nni anda yella yeffer iman-is. Ula d netta yebɣa ad yewwet rṣaṣ s teklact-is, acu kan ur yeẓri ara sani ; yugad lemmer ad ineɣ albɛaḍ seg imeddukal-is. Imi ɣas tella tafat n tziri, ixidwan n teẓgi n Mizrana ffren kullec.


- 41 -


Cwiṭ cwiṭ deg umruj-nni leqqaqen am usu-nni i n-yeǧǧa deg uxxam-nsen di Tubiret, yebda la ixeṭṭef wallaɣ-is am tkuret n taduṭ s wacu yetturar walbɛaḍ n yemcac imecṭaḥ. Yessaweḍ armi qrib yettu zzhir n tkerṭac yettɛeddin nnig uqerru-is. Tiktiwin-is ḥala ɣef amek ara d-yeffeɣ si lɛesker akked imawlan-is ara n-yaf deg uxxam la tettraǧun, asmi ara yuɣal. Tudert-is tban-asd imir-en am ubrid n luḍa yettwaselɣen s tament akked zzit uzemmur taḥlawant ; ad d-yekfu taɣuri akken ad yeṭṭef amḍiq ixeddim deg albɛaḍ n tkebbaniyin timeqranin n tmurt, ad yebnu axxam i yimawlan-is d watmaten-is, ad d-yaf albɛaḍ n tullas ḥlawen ara yessuter seg imawlan-is, ad as-tt-fken ad tt-yaɣ. Ɣas ma yezmer tikwal ad d-yemmager kra n iɣilifen d wuguren di tudert, netta yettwali, imir-a deg uxjiḍ, ad ɛeddin am aman deg uḥelqum mebla rwami. Arraw-is ad d-ffɣen yark d ibuguṣen, ad ɣren yark, ad zewǧen yark, ad ferḥen yark. Ad d-yaweḍ wass, asmi ara yewser aṭas, seddis mraw neɣ ugar, s leɛqel, mebla tuggdi, ad yeqqen allenis akken ur tent-id-itelli ara tikkelt nniḍen. Mačči ass-a ara yemmet, ula d axjiḍ-agi yecmet. Yugi ad yamen belli yezmer ad yeǧǧ tudert deg iḍ-agi amcum, di teẓgi n Mizrana. Axemmem-ines iwehha ɣer yimal. Dɣa, akken ad yeḥrez iman-is si terṣaṣin timcumin, isekkel u yenneḍ iman-is am ifiɣer yugaden. Syin yezzer deg yiwen ushetref yettcabin s alejlej yugin ad yekfu. Targit deffir tayeḍ. Acu i tyettawin si qerwac n tselnin ɣer tcucay idurar yesleɣ wedfel, seg uḥriq yečča wezɣal ɣer yefran isemmaḍen. Tawla teṭṭef-it si tfednin ɣer tmelɣiɣt. Yuɣal yebda la yettfuru wallaɣ-is u yečexčix am tɛeqqact yečexčuxen deg aman. Iles-is yeqqur, ulac imetman deg imi. Ayen yark i d-iteddun yelha, tudert-is ad twenneɛ, ad tefk tafat i tiyaḍ. Sya ɣer da ad d-yetkaki, syin ad d-yaf iman-is di ǧahennama-nni n waɛbar d rṣaṣ yettazalen di yal tama n teẓgi. Mazal yettfaq anda yella, ad yuɣal imir-en ɣer tirga-s ur nesɛi ixfan, anda lɣaci yark lhan, imecṭaḥ ḍsan, tiḥdayin cebḥent am tziri n tefsut, ijeǧǧigen fsan armi da leḥḥun fell-asen medden imi ɣlin-d si taẓayt-nsen ɣer

- 42 -



ubrid. Ma d netta am ugellid igawawen, ulac i t-ixuṣṣen : aɛebbuḍ yerwa, udem yeḍsa, imeddukal-is ɣer tama-s, imawlan-is zuxxen yess, tteklen fell-as. Amḍiq imuqel ad d-yaf yuli-d yiṭij seg-s. Yiwen umecwar kan, yuki-d yufa-d ulac ula d ambbiwel amecṭuḥ ixidwac, iruḥ rṣaṣ-nni yesṭubbunen imeẓẓaɣ. Yeqqim akken di tsusmi-nni tasemmaḍt, yettmuqul s itran i yebdan la xettfen tura yiwen yiwen makka i d-yettali wass. Yeɛdel-d cwiṭ taqerruct-is, irfed-d allen-is, isenqed di yal tama ma yella kra ara iwali. Ulac isem n lxelq din. Ula d imeddukal-is ulaciten. Dɣa yuɣal-d yexmet di teḥnact-is. Inuda taklact-is ma yella mazal deg-s rṣaṣ, yufa ddeqs id d-yegran. Makken yettembbiwil iḥulfa am uɣẓaẓ amecṭuḥ deg uɛebbuḍ-is, dɣa yerfed cwiṭ ajlal n tkebbuḍt-is tazegzawt ad imuqel ma yella ahat kra n usennan i s-yeddan deg uksum neɣ albɛaḍ ibeɛɛac i tyeqsen. Yewhem mi yufa amzun d tiyarist idammen yeqquren. Dɣa isuma-tt s tḍadect-is yufa amzun d taṭiṭuct tamecṭuḥt yergel uxenfur xedmen idammen yeqquren. Yezzi aqerru-is mi ifaq belli d tarṣaṣt i s- ikecmen deg uksum ; iwhem yark ansi i d-tekka imi ur yecfa ara melmi i tezmer tḥuza-t-id, teɣzi n yiḍ netta yeffer ; d awezɣi ad yili tḥuza-t-id. Qemḍen deg-s imeṭṭawen i d-yulin ɣef yiri n wallen-is. Armi d imiren i iḥulfa s lmut izemren ad tawi. Dɣa yebda la yettergigi am ifer yetthuzzu waḍu. Yugad. Am uzrar yettazalen, tudert-is, tadyant deffir tayeḍ, tɛedda-d sdat wallen-is am tɛeqqucin. Seg asmi yella d ameẓyan iteddu ɣef uzagur n yaya-s armi d ass i t-ṭṭfen deg yiwen ubaraj iǧadarmiyen di Tniya. Ula d ayen akken iɣil yettu-t, yuɣal-as-d ass-a amzun d tilibizyu yeṣfan i la yettwali. Yemmekta-d tagdi-nni n tmuɣli tamezwarut n lkazirna anda amcum ur neswi ara tibṣelt yerkan yettuɣal i yilmeẓyen d-wwin s bessif akked tiḥerci d iwaɣzniwen yettidiren s usumi idammennsen. Ass-a weḥd-s di teẓgi ur yessin ara, ass yuli-d akken yuɣ tanumi ɣef ddunit di lawan anda ass-is yebda la iɣelli. Imekta-d imawlan-is,


- 43 -


ladɣa yemma-s yesfezwi waṭṭan n turin. Hat-an la tt-yettwali ger wallen-is mi teqqim ɣer tbaqit la tfettel di seksu s tuɣac-nni n Yasmina yeččuren d lḥif akked ineẓman. Dima teqqar-d belli tudert-is truḥ d asfel ɣef urgaz-is i tt-iḥettben am uqejmur n tɣimit yersen d zyada deg teɣmert n uxxam, alamma kan teḥwaǧeḍ-tt ara tt-id-ddmeḍ. Ula d rray werǧin i s-t-fkan deg uxxam. Tenna maɛlic asmi mazal tamɣart-is d nettat i d timḍebbert n uxxam, Acu kan umbeɛd mi temmut, yessi-s yewwḍen d tinubiyin kksent-as nnubas. U dargaz-is i tent-iḥettmen ad ṭṭfent rray deg uxxam deg umur n yemmat-nsent. Ihi ass-a yemmekta-d yemma-s, tɣaḍ-it aṭas. Daɣen, ur yeẓri ara ma yella ad teḥzen fell-as aṭas neɣ ala. Imi netta si zik immal ɣer baba-s ukud yeddukul am gma-s ameqran. Acu kan ass-a d nettat i t-iɣaḍen aṭas. Ass-a ifaq iḥemmel-itt nnig yark n wayen yettidiren di ddunit. Lemmer yettaf ad as-yezziken taṭiṭuct-agi yellan deg uɛebbuḍ-is ansi i s-dtteffɣen idammen. Ahaqel ma yella tḥencit ɣef yedmaren-is, ad as yekkes wenzaf d weqraḥ-agi i t-idyebdan. Idammen, ɣas d timeqwa kan, mazal la d-ttqudduren seg-s s leɛqel am tbeziṭ n waman yekkawen. U netta yebda la yettḥulfu i lǧehd-is yettruḥun seg-s. Yeẓra belli ma yella yebɣa ad yedder ilaq-as ad tɣiwlen ɣer sbiṭar. Dɣa yeṭṭawal ad yekker ad d-inadi imeddukal-is. Ɣef uɛebbuḍ, d aḥnunef am ijirmeḍ, yessuli-d taqerruct ɣer yiri n umruj anda yeffer. Imuqel ɣer yal tama ma yella kra ara s-d-ibanen. Ulac. Dɣa yeqṣed ad yessiwel. U segmi yugad ma yella win ixemten din seg at ičumar, ihegga-d leklac-is, ur tesɛiḍ win yeẓran acu i tyettarǧun. Yebda asiwel tazwara s leɛqel : “a ḥaḍarat werrakum”. Syin, segmi ḥala tiɣri-s i d-yettuɣalen, yessuli ssuɣat-is. U segmi irennu wakud irennu asuɣu, imi yebda ad d-ikeččem s ul-is aḥulfu-nni belli weḥds i d-yegra di ttelt lxali-agi. Ulac anwa i s-d-yerran, dɣa yuɣal s asiwel s yismawen imeddukal-is: “a Ḥakim, a Naṣer, a Ɛebdelqader, a Rafiq...”. Dima ulac tiririt di tniri-nni n tsusmi i deg i yezzer. Si tama nniḍen, yeẓra belli mačči d ayen yelhan i yexdem imi ssuɣat-agi-ines ad as-d-awint icenga ar

- 44 -



ɣur-s. Yeẓra deg ul-is belli mačči d widak ad t-ireḥmen, ɣur-sen d “Ṭaɣut” i yuklalen ad as-yettwakkes uqerru. U ɣas ma yella wannect-a ger wallen-is, mazal-it yettkemmil tiɣratin ar yal tama am win issebɛaden tiwkilin n tɣimit weḥd-s. S usiwel-nni i yessedha iman-is ɣef umeyyez ɣef taṭiṭuct i s-yellan deg uɛebbuḍ-is. Taggara yefra-tt ger-as d yiman-is belli ulac asirem yegra-d walbɛaḍ seg imeddukal-is deg unnar-nni n imenɣi, u yefra-tt dɣa belli ḥala tikli deg yiwet n tebriḍt si tebriḍin i s-d-yettbanen din i zemren ad tessiweḍ ɣer walbɛaḍ n tudrin n Bumerdes neɣ n Tizi Wezzu. U ma yella yeqqim akka ufeddix-nni isɛa deg uɛeddis-is, mačči aṭas i dyeṭṭeggir n idammen, izmer ahat ad yessukes ma yella ɣawlent s albɛaḍ n ssbiṭarat iqerben. Ɣef tgucrar am llufan yettmuruden, ɣef tayett-is leklac-ines. Yiwen ufus isers-it ɣef tmacwart i isers ɣef ifeddix-is, wayeḍ yettɛawan iman-is di tikli deg uḥecraruf-nni i s-d-ibanen yettawi ɣer yiwet n tebriḍt meqqren. Isekla n uxcac neɣ uqeccuc d nitni i d isekla yeṭṭuqten di tiẓgi n Mizrana..... (ilaq ad d-nadiɣ ɣef teẓgi-agi !!! ) Makken i d-yewweḍ ɣer yiwen ubabdar, iɣli-d udem s udem d yiwen akken ilemẓi seg at ičumar. Deg yiwet n tegnit meẓẓiyen aṭas, yeɣra-d deg wallen-is aɣuccu yellan deg-sent mgal lbista neɣ takebbuḍt tazegzawt n iserdasen i yella yelsa. Winna s tmegḥelt umi yettwagzem uteyut, iwehha-tt-id metwal Farid at Selṭan i yellan imir-en yettraǧu taẓayt tucmit n terṣaṣt deg uksum-is yelwan. Acu kan si zzher-is neɣ si yir zzher-is, tarṣaṣt ur d-teffiɣ ara ; teḥṣel deg cwiṭ-nni n tɣanimt n tmegḥelt. Dɣa arebrab-nni yelli-tt-id akken ad imuqel acu i tt-yuɣen s yiwen n lḥir meqren. Ula d netta yemreq leklac yella ɣef tayett n ucengu-ines. Di sin yid-sen yeffeɣ-iten leɛqel, yal wa iḥar ad d-yeddem neɣ ad iṣeggem leslaḥ-is. Acu kan d arebrab-nni i d-yufan iman-is iṣeggem ikerṭac n tmegḥelt-is. Dɣa Farid umi yeɣli ucerjur si targigit, yeqqim teṭṭef-it tcallawt, la yettraǧu i tikkelt nniḍen tiyita n rṣaṣ ara t-yeflun am tseksutt. Ma d ilemẓi-nni i d-ibedden sdat-s s tčamart-nni i s-d-


- 45 -


yemɣin am tseččuyin n usaɣur deg albɛaḍ iḥerqan yezlef yiṭij. (yella wacu ixuṣṣen dag-i... la phrase ur tfuk ara....) Dɣa makken yejbed di znad n tmegḥelt-is, lewǧeh ur yeffiɣ ara i tikkelt tis snat. Akken iwala Farid acu yeḍran i tmegḥelt n ucenguines, yuɣal yetkaki-d si tcallawt-nni n win yettraǧun lmut, yeddem leklac-is seg uteyut, dɣa yerra-t ɣer deffir am win yebɣan ad yewwet yess. Ula d wayeḍ-nni ẓdem-d s tmegḥelt-ines akked yiwen ujenwi i d-yessufeɣ si zdeffir n wammas-is. Yefka-as Farid yiwet n tyita s ufus n leklac s adrar ufud. Iḥulfa-as winna i uḍar-is mi yebbezwez am yiwet n tuqqsa n 100 izerman. Dɣa ineggez-d fell-as s ujenwinni yella yeṭṭef s ufus-is azelmaḍ, yebɣa ad as-t-yečxeḍ deg idmaren-is. Iwexxer-as Farid i tyita ujenwi i yewwin bab-is ɣer sdat, yeɣli ɣef akal. Dɣa yerna fell-as yefka-as yiwet n tyita s leklac ɣer temgerṭ, d ayen yesxesfen imir-en bu učamar-nni. Mbeɛd lǧehd-nni yessexdem deg umennuɣ, iḥulfa Farid at Selṭan i wallaɣ-is mi la ixettef, yeddelwiḥ ger liḥala-nni i deg-i yella akked tirga anda yexleḍ ger temẓi-s akked lmut i t-id-yettɛassan si yal tiɣmert n teẓgi. Meqbel ad as-yeḥnuceḍ rray-is si gerifassen, iddemd ikkes-as-d i yilemẓi-nni yellan yeẓẓel ɣer tama-s, timegḥelt-is akked ujenwi-s. Imuqel ɣur-s akken at-yessenqed, iɛqel-it si kra-nni ineẓden i dyemɣin zaɛma d tačamart belli d yiwen ilemẓi meẓẓiyen aṭas, u ma yella izad ad yesɛu 23 ar 25 iseggasen. Timelsa-ines terka, teččur d aɣebbar yeqquren. Takebbuḍt-is n taduṭ, d tazurant u tesɛa aṭas n leǧyub. Asebbaḍ d amuẓay am uruǧas ttlusun iserdasen. Ma yella d acekkuḥ-is d aberkan, d ubrin, iwweḍ-as ɣer tuyat. Allen-is d tizegzawin, d timecṭaḥ, u ɣas akken medlen-t iɛeql-itent belli d tizeggaɣin am tid n win yettɛawazen, banent-d cuffent si tguni deg anda ur zeddig ara lḥal. Mi yebda ad d-yetkakay, ixemmem Farid belli yezmer ad as-yesmir snat n terṣaṣin deg tmelɣiɣt-is, ad yethenni seg-s. Imi yezmer ad tyestaxli, u d netta ara s-iṣarṣun am uzzal azrar n terṣaṣin deg ul-is. Acu kan si tama nniḍen ur yebɣi ara ad yawi tamgart yid-s. Imi,

- 46 -



lemmer ad ikemmel akka tiɣimit di teẓgi-agi, ur yettruḥu ara ɣer sbiṭar, izmer ass-a d ass-is aneggar di tudert-is. Amecwar kan, yebda Farid la ixettef cuya cuya, allaɣ-is yebda la syettruḥu s anda akken ur yeḍmiɛ ara. Am targit n win yukin, iwala iman-is la ittazzal, netta d watmaten-is deg urti n jeddi-s di lawan uzemmur ; i ten-yettawin seg useklu ɣer wayeḍ ; d timtabaɛt d wurar n twaffra deg akal yessan s iɛeqqayen n uzemmur. Ugar iḍsan i run mi sen-yeṭṭef jeddi-s ajelkaḍ n remman. Ula d tullas ur tent-yezgil ara ass-nni. Inna-yasen akkagi ad tissinem nnaɛma n Rebbi akked tidi imelluẓa. Iseggasen imezwura ṭṭfen as-tt d cceḥna. Ackan asmi imden cuya, faqen yesɛa lḥeq imi i ten-yewwet ass-nni. Asmi yemmut run fell-as armi qrib ddreɣlent wallen-nsen. Ladɣa tullas i d as-yessiriden akked i d as-yecucufen. Ass-a amzun yuɣal-d d ilemẓi, ibedd-d i Farid nnig uqerru-is, ad asyettcuddu amḍiq ifeddix-is. Yeččur-as-t d imɣan ifeẓ s yimi-s akked wakal yellexsen. Ixdem-as am tejbirt s ufella uṭiṭuc-nni ansi ḥebsen idammen ur da d-ttmaren ara. Ikker ad d-yessuden jeddi-s yejjem aṭas, yebɣa ad t-yezmeḍ ɣer idmaren-is. Dɣa mi yessemlal iɣallen-is, yuɣal am wagu yessefruzeɛ waḍu. Yebda la s-yessawal anida yella u yebda ad t-id-yettnadi s wallen-is ger ixidwac d isekla i s-d-yezzin. Makken yella yettnadi Farid ɣef jeddi-s, ineggez-d fell-as uqcic-nni arebrab i yellan muqbel yexsef. Immeɣ-as-d ɣer temgert, izmeḍ ifassen-is fell-as si zdeffir. Syin isɛedda-d iɣil-is akken ad t-yexneq. Imir-en dɣa i yebda la yettxaṣṣa nnefs i Farid. Tazmert tebda la tetteffeɣ si yal tiɣmert n tfekka-s, ula d ifassen-is ulwan ; ur yezmir ara ad ten-yessembiwel, uɣalen ẓẓayen am sin ifurkan yeclex waḍu neɣ wedfel. Yebda diɣen ad t-id-yewwet s uqerru s udem. Acu kan ur yufi ara anwa ara iḥetmen tafekka-s ɣer wannect-en. Yuɣal yuyes, armi qrib yenddem mi ur t-yenɣi ara makken i tyewɛa. Dɣa yemdel allen-is imir-en, u iserreḥ i lmut ad d-tekcem s iẓuran-is mebla ma iqazem-itt. Iḥulfa imir-en i yiɣil n wayeḍnin mi la yettifsus am urekti kečmen waman s leɛqel. Taggara yegra-d iɣil n winna am snesla yersen ɣef umgarḍ n Farid. Iruḥ-as ark lǧehd seg-


- 47 -


s. Yezzi-d Farid ɣur-s, imuqel-it srid ɣer wallen-nni-ines tizegzawin. Ula d netta imuqel-it-id srid s allen. Tasusmi. Syin yefka-as Farid Tiyita s uqerru ɣer wanzaren. Iḥulfa-as Farid i tyita-nni amzun d wayeḍ i s-tt-id-yefkan, yebda la itezzi wallaɣ-is am win yezzin ɣef yiman-is aṭas iberdan. Dɣa yeɣli ɣer wakal, yexsef. Aqcic-nni iqqimen ddeqs s ibeddi meqbel ula d netta ad d-yebbenṭaḥ ɣef tgucrar, tama n Farid. Deg akal asemmaḍ yeččuren d iferrawen d isiɣan yerkan, am sin yemcac ukarṭun seg-i yerwel lǧehd, bdan amennuɣ d umceččew s ifassen-nsen ilmawen. Tiyitwin-nsen banent d tidak n sin umi ur dyegri uḥekka deg iẓuran. U ɣas akken mazal-iten ttnaɣen, inṭeq ɣur-s Farid, yesteqsa-t ɣef yisem-is. Yerra-as-d winna s nnehtat n win ur nugad ara ad as-dyini isem-is n ṣṣeḥ, Smaɛil. Dɣa yenna-as ula d netta isem-is : Farid at Selṭan. Kemmlen akken amennuɣ-nsen yiwen umecwar meqren armi ula d yiwen ur yezmir ad yerfed iɣil-is yiwen usantim nniɣ wakal. Bberttaxen, wa ɣer tama n wayeḍ, deg akal asemmaḍ n taggara n tegrest di tiẓgi n Mizrana ur qḍiɛent wallen. Tasusmi n wass-a tuɣ amḍiq n wesderdeḥ d ugerweḥ n rṣaṣ n yiḍelli. Ulac ula d axerxec n ibeɛɛac. Ahat rewlen merra si “leǧnun” i sen-d-yusan xedmen tameɣra di temnaḍt-nsen. Yesteqsa-t-id Smaɛil yellan isers amag-is deg akal : - I kečč anda i d tamurt-ik ? Yerra-as-d Farid : - N temdint n Tubiret akked taddart n Mayu. I kečč ? Yerra-as-d Smaɛil : - Nekk isem-iw Smaɛil at Mraw n taddart Iberbacen n Bgayet. Ma yella mmuteɣ, ttxil-k, ma yella mazal-d deg-k abruy n temdanit, ruḥ ar yemma ini-as mmi-m yemmut d argaz, ur yugad ara. Ini-as daɣen belli atmaten-iw mmuten di sin yid-sen. Ini-as diɣen belli ur ilaq ara ad as-t-anef i gmat-nneɣ ad yeffeɣ ula d netta s amadaɣ. Ini-as ad tceyyeɛ ɣer Xwali di Busɛada neɣ ɣer nanna di Batna. Ini-as daɣen i baba ad iḥrez iman-is seg usemmiḍ n tegrest, ur d-iteffeɣ ara deg

- 48 -



ussan i deg yekkat ugris. Ini-as aṭas i k-nedɛa nekk d watmaten-iw akken ad k-yesseḥlu Rebbi. Ini-as... Mazal d-yekfi mi d as yegzem Farid awal s ciṭuḥ n teḍsa akked waṭas n ɛeggu seg “ini-as, ini-as” armi yugad d netta i d afakturines. - Ay aqcic, lemmer ad asen-taruḍ tabrat, mačči axir ? Anwa i k-dyennan belli mačči d nekk ara yemten dag-i. Nekk aql-i tenta terṣaṣt deg iẓerman-iw am ubelluḍ rẓagen, sya ɣer da ad iyitessexciwet armi i yuɣaleɣ ad shetrifeɣ am umeslub. Ssusmen cwiṭ, syin yerra-as-d Smaɛil : - Isem-iw Smaɛil at Mraw. Ula d nekk ur iban acu i yi-d-yeddan deg uɛrur-iw. Ahat ula d nekk d tarṣaṣt. D ǧahennama i ttḥulfuɣ yal mara ssembiwleɣ iman-iw, neɣ ahat d albɛaḍ iqecḍan i d iyi-ddan. Ur ẓriɣ ara ! Qqimen akken, ẓẓlen ddeqs n wakud, wa ɣer tama n wayeḍ, yal wa yezzer di tirga-s am sin iẓeɣran yeqquren seg-i teffeɣ tizegzewt d lliqa (la sève). Igenni zeddig am imeṭṭawen n llufan ; ulac deg-s kra ḥala kra n tejlibin n wagu i d-iḥewṣen si tama-nni n Mizrana, abrid nsen seg ilel ɣer wakin i wedrar. Iṭij akken i d-yenqer, ɣas ur yerɣi ara, yeḥma cwiṭ ansi yessaweḍ ad d-isɛeddi izerzaren-is ger ifurkan d tciḍwin n isekla. Ifrax bdan la d-teffɣen si teḥnacin d leɛcuc-nsen, d anadi n kra s wacu ara regglen tilemt iɛebbaḍ-nsen yexwan. La ttazzalen si ṭejra ɣer tayeḍ, seg tekwatt ɣer tayeḍ d anadi am lejdud-nsen iqburen izedɣen si zik n zik tiẓgi n Mizrana, acemmek ur ibeddel di tudertnsen. Sya ɣer da, tikwal ad d-yefk yiwen seg-sen tamuɣli ɣer sin iwaɣzniwen yeẓẓlen deg akal am sin ijebbaden. Dɣa cwiṭ kan uɣen tanumi yid-sen amzun d kra yeddan netta d teẓgi. Si tirga-nni yemxerwaḍen, inṭeq-d Smaɛil at mraw s acengu-ines yeẓẓlen ɣer tama-s, yenna-as : - Ẓriɣ ad ak-diban d timmuhbelt u d tisselbi ayen akka ad ak-dssutreɣ, ladɣa ma yekka-d seg yiwen i yebɣan ad k-ineɣ sgelli kan. Yernu ur la k-skiddibeɣ ara, ar tura mazal-iyi ɣucceɣ-k am... ur akd-qqareɣ ara.


- 49 -


Farid yellan yettmuqul ɣer jeddi-s i d-ibedden nnig uqerru-is, iɛawen-d iman-is s utekki ɣef ifassen-is. Yeqqim-d, u mebla ma yenna-as kra, ibehher Smaɛil akken ad yuɣal ɣef yidis-is. Irfed-as takebbuḍt-is yuɣalen d tamaẓayt seg idammen d wakal ineṭḍen fellas. Yedhec mi yesfeḍ idammen-nni seg snat n tiṭuṭac am iɛeqqayen uzemmur yellan deg uzagur ucengu-ines. Zgant-d si tama n wul, seddaw cwiṭ. Ula d netta la d-ṭeggirent s leɛqel idammen. Imuqel imir-en ɣer jeddi-s i d-ibanen ula d netta yeḥzen mi iwala ixemǧan-nni ucmiten di teksumt taleqqaqt n uqcic i yebdan ad dyessemɣay ineẓden n tamart-is. Inṭeq imir-en Farid ɣer jeddi-s : - Ilaq ad t-nawi ɣer sbiṭar. Lemmer ad yernu dag-i azgen n ssaɛa, uggadeɣ ad yuɣal d leɣber i ijeǧǧigen. Smaɛil ur nefhim ara yark imeslayen s d-yenna, yebda-as-d : - Lemmer ad iyi-d-tiniḍ acu yellan, mačči xir ? Deg umur n ushetref-agi ! Tebɣiḍ ad iyi-tawiḍ ɣer sbiṭar zeɛma, seg anida ara yicleqfen imeddukal-ik ara yi-ssufrin alamma tedda-d tarwiḥt-iw. Yerna imeddukal-iw nekk mačči d widak ara yi-ǧǧen. Tura ad twaliḍ amek ara d-arzun ɣur-i. Imir-en Faḍma ad teɛqel argaz-is. Ad nwali acu teswiḍ kečč s teklact-ik. Yerra-as Farid : - Ruḥ ad tekseḍ tizitt ɣef yiman-ik. Nekk zeɛma yulqaq-d wul-iw ɣef ifeddix-ik, kečč am cciṭan la tettxemmimeḍ amek ara yi-nnɣen imeddukal-ik. Ɣas nneḥcam ɣef yiman-ik. Yerra-as-d Smaɛil i yeǧǧan dima acengu-ines la s-yettani deg uɛruris : - Err iman-ik tura d lmalayek. Tesserɣem ddunit u teččam lḥeq n ugellil, ɣef lǧal n wumi ? Ɣef lǧal nat ucekriḍ. Kenwi d aɛdawen n Rebbi. Kenwi d “Ṭuɣat”... Yella imir-en Farid ikkes-d azgen si tejbirt yersen ɣef ifeddix yellan deg uɛebbuḍ, u igzem-d yiwen umersun seg ubeḥnuq yellan yers ɣef idammen. Dɣa, s umersun-nni i d-yekkes iṭṭef tajbirt-nni n yemɣan yettwafẓen ɣef ifeddix yellan deg uzagur n weɛdaw-is. Am llufan tetettel yemma-s, Farid ibren yark Smaɛil deg akal akken ad as-d-yessɛeddi abeḥnuq-nni n ccedd seg idmaren-is, izmeḍ-it

- 50 -



armi iḥebsen idammen ur da d-ttfeggiḍen ara. Mi yekfa seg udawiines, yerra-as itrikuyen akked tkebbuḍt-is. Mi iruḥ ad as-yerr ameslay, yufa yeṭṭes. Dɣa yezzi ɣer jeddi-s i s-dyefkan afus mi la yettdawi Smaɛil, yenna-as : - A jeddi, ayɣer akka i d-yettban wudem-ik am win ččuren iɣeblan ? Ini-yi-d ma yella kra i k-yuɣen. Ahat tugadeḍ fell-i neɣ d zzɛaf i tzeɛfeḍ fell-i ? Imuqel-it-id jeddi-s yellan ger igenni d tmurt, yeqqim am temɣarin, mebla ma isuma-d uksum-is akal. Isxenčew tačamart-is tamellalt am iɣiɣden n tneqlett, syin yenna-as : - A mmi, llah mṣelli ɛli-k a rasul llah, twalaḍ tiẓgi-agi deg-i tettwaliḍ? Acḥal n tikkal, nekk di leɛmer-iw ass-nni ger 40 d 50 iseggasen, ṭṭfen-aɣ dag-i irumyen, wwet ma d tewteḍ. Nitni ttawind ula d iqjan yid-sen. Tafekka-nsen teččur d leslaḥ, ahat lmizan n leslaḥ refden yugar lmizan n uksum-nsen. Lḥaṣun ssrewten deg-neɣ ayen ssrewten. Nekkni s tmegḥal tilmawin ur nesɛi ula d aḥlalas. Nnxeddem tiḥnacin d yemrujen am uccanen akken ur aɣ-ttafen ara. Nekkni mi newɛa yiwen seg-sen ad t-nezlu si zdeffir akken ad as-dnaker leslaḥ-is. Yeɛni mačči d takerḍa. Acu kan lgerra d lgerra, ddu neɣ awi. Nitni imir-en, di tifekkiwin-nsen d ilfan, a wer ibarek Rebbi, nekkni d ibasɣaren yečča laẓ. Yiwen seg-neɣ imir-en lemmer ad terreḍ ɣef lmizan n uqcic n 10 iseggasen n tura ad d-zgen kifkif. Yessusem imir-en jeddi-s yellan iẓẓel di lhawa nnig Farid swaswa, amzun yella kra yesfegruruc s tuɣmas-is i s-d-yuɣalen am tidak ilemẓi iḥudren fell-asent. Dɣa yessufeɣ-d yiwet n trekkitt amcwingum seg imi-s, yerra-tt s imi n mmi-s n mmi-s. Syin yuɣal-d ibedd, ibda ileḥḥu deg igenni am win yerfan. Ileḥḥu ger tqucac isekla s uɣiwel mi yettkemmil awal-is : - Dag-i swaswa neɣ di leǧwayeh-agi i nella nettraǧu atmaten-nneɣ ad d-uɣalen si Tunes akked Lmerruk. Netta ziɣ afuḥan n Bumedyen akked imeddukal-is iqcayen, wa rrant ɣer lḥebs wayeḍ nɣant wwint-id zeɛma deg albɛaḍ n lkazirnat di Maṣer anda ra senxeraren allaɣ-is. Nekkni nettraǧu leslaḥ ad d-yaweḍ am wudem n tafat. Wellah a mmi ma neẓra amek i neṣber armi tekfa lgerra


- 51 -


tamcumt. D Rebbi kan aḥnin i yessɛeddan taswiɛt-nni tazefrant. Ur numin ara ad teffeɣ Fransa meqbel ad nemmet irkelli. Nitni d wuzzal-nsen ɣelben ajrad di tmurt. Ṭṭfen yal tiɣmert u yal taɛliḍt ; hudden tuddar, ssnejlan imezdaɣ-nsent, leqḍen-ten am iɛeqqayen n uzemmur ɣer yiwet n taddart umi dima ttarran-as-d zzerb akken ur ttruḥun ara ɣef lexlawi-nsen neɣ ad aɣ-d-awin acu ara nečč. Dɣa nečča waɣẓaẓ, tibbucin n temcict, isisnew, lḥebb uzeggar, abelluḍ, bibras... Yesteqsa-t imir-en Farid : - Asmi tekfa lgerra acu txedmem ? Yebɣa ad as-d-ikemmel asteqsi-ines ɣef ayɣer i ten-ǧǧan ḥekmen tamurt mebla ma nnuɣen yid-sen. Acu kan jeddi-s yellan yesmerǧiḥ ger ifurkan n isekla, yuli-t yiwen n zɛaf i s-yerran imeẓẓaɣ-is d izeggaɣen am ǧiḥbuḍt yefsan. Ad as-tiniḍ tura ara yesserɣ ticiṭwin nni i deg-i la ijebbed s ifassen-is igan am ddkir awraɣ. Dɣa bdan iferrawen ad d-ɣellin ɣef sin-nni yeẓẓlen deg akal am umeččim d ubruri. Iṭij la yettreqraq deg isiɣan yeqquren. Taqaɛett teččur d iferrawen. Sin-nni la nehhten. Jeddi-s n Farid yebda la yettreggim deg ucwaw n tewmamt-is, ijebbed deg ineẓden icebḥanen n tamart-is am win yettgallan deg albɛaḍ. - Ɣur-k ad tǧaɛleḍ neɣ ad tɣilleḍ belli d tagdi i ten-uggadeɣ. Neɣ ahat ad tɣilleḍ uggadeɣ lmut. Tidet ! Ẓer a mmi belli jeddi-k ur yettagad yiwen ḥala yiwen. Acu kan yufa-yi-d lḥal d amɣar asmi tekfa lgerra ; mazal-iyi-d ma aṭas sin iseggasen i 50. Ɛyiɣ deg učči n bibras d tibururin n taɣaḍt timezwura. Ul-iw yuɣal la yekkat am ṭṭbel n ssirk n Sidammar. Cctaqeɣ arraw-iw akked yaya-k, ɣas teẓriḍ amek i tga ! Ul-is yelha, iles-is am dadaḥ. Wwḍen-iyi-d imeddukaliw s axxam akken ad nruḥ ad as-nales i tyita ukerṭuc. Ula d lqahwa ur asen-tt-id-fkiɣ ara. Ṭṭfeɣ-asen-d tafelluct am yir iḍan. Nniq-asend belli dayen arumi yeffeɣ, nekk din i yekfa ccɣel-iw. Iṣubb-d umɣar si tciṭa-nni anda yeqqim, yuẓa-d armi qrib d udem n mmi-s n mmi-s am win ibɣan ad t-id-issuden. S taɣect ḥninen d wallen tizeggaɣin, yerna-as-d :

- 52 -



- Ur ɣilleɣ ara akka ara teḍru yid-wen. Ziɣ Muḥend Ulḥaǧ d Ayt Aḥmed d lkumanda Si Musa (Awmar at bu Lehhac) sɛan lḥeq. Nitni walan acu i d-iteddun, ma d nekk isderɣel-iyi laẓ umadaɣ akked ḥamu n wussu. Yufeg imir-en s igenni. Yesla-as Farid mi la yettbejniq (éclater en sanglots) am llufan amecṭuḥ. Dɣa yessawel-as s lqed ugerjum-is : “a Jeddi uɣal-d, a jeddi uɣal-d”, armi i t-yuyes. Ikcem Farid di targit-is makken yella meẓẓi yettazzal di tebḥirt n jeddi-s, si tama ɣer tayeḍ, si teɣmert ar weltma-s. Iḥemmel isekla yeẓẓa jeddi-s, ama d tiktunyiwin, tifirsin, titteffaḥin, lḥebb lemluk, tisisnewt, tiẓurin, tineqlin n yal nwel : belɣenjur, a bu ɛenqiq, ... Tella diɣen yiwet n teqwirt di tlemmast ɣer tama n teɛwint ansi i ttyesway umɣar yal tameddit meqbel ad yennejmaɛ s axxam. Netta yellan imir-en d aqcic meẓẓiyen i mazal ur yekcim ara s aɣerbaz, yettmuqul jeddi-s am waɣzen acelhab yettṣeggimen dima acwaw n teɛmamt-is. Iwala makken tameddit ad t-id-yesserkeb ɣer aqesbuẓ n tbarda i dyerra i weɣyul-nsen aqehwi i s-d-yettbanen imir-en am albɛaḍ n tegmarin. Acwari dima yeččur-d d lfakya. Ma d lḥeb lemluk yettarra-tt-id deg iqecwalen imeqranen i d-iteqqen s umrar si yal tama neɣ i d-yettarra srid di tneqqalin mara yilin meẓẓiyit. Iḥulfa imir-en i tbeqqacin timecṭaḥ tifessasin i d-yettrusun ɣef umag-is. Dɣa mi d-yelli allen-is, yufa-d Smaɛil nnig-s, yetteɛraḍ ad t-id-yesker. Yenna-as-d : - Lemmer ad neqqim dag-i, uggadeɣ ara lmut ara nemmet. Nekk aql-i ad ruḥeɣ ma yella tebɣiḍ ad tedduḍ ? Yesteqsa-t-id Farid : - Sani ? Yerra-as : - Ur ẓriɣ ara ! Ayen ẓriɣ d akken ilaq ad nsahel, mulac cwiṭ idammen-agi i ɣ-d-mazal ad kfun ma nebrek-as dag-i. Yerra-as-d Farid i yebdan la d-yetkakay si tirga-ines, amzun d yiwen yessen si zik : - I kečč acu n timmuhbelt i k-d-yewwin ɣer dag-i ass-agi ?


- 53 -


S cwiṭ uɛekki deg iles-is akked atihi di taɣect-is, yerra-as-d Smaɛil : - I kečč ay aqebṭan ikafriwen acu i k-id-inehren ar teẓgi-agi, armi i texnunseḍ deg idammen-ik ? Yerra-as-d : - Tamezwarut mačči d akafriw, ttamneɣ ɣas ma yella ur d-yettban ara fell-i ; ttuẓumaɣ, ḥemmleɣ tamurt-iw. Acu kan mačči d nekk i ifernen ad iliɣ ass-agi dag-i. Werǧin xememmeɣ akkagi ara mteɣ am yir aqjun di yir tasraft. Ur umineɣ ara yark zemreɣ ad d-afeɣ imaniw ad ttnaɣeɣ s tḥerrasin nekk d lɣaci-nniḍen. Nekk ɣilleɣ tadyantagi-nwen ur iyi teɛni ara. Deg yiwen umecwar imeddukal-ik hebblen tignatin, sɣersen icekkilen n lḥerma. Lbumbat, timenɣiwin, ibarajen n tkellax, timezliwin, tixidas. Tesxuxdem tamurt am ibzinzer (ixenfes s taɛrabt) di zzbel. Di lawan-nni iddem-it-id Smaɛil si lqaɛa tasemmaḍt, yezwi-as iferrawen yerkan i d-ineṭḍen di tkebbuḍt-is tazegzawt. Am sin imeddukal bdan tikli d takessart ansi i sen-dtban yiwet n tebriḍt. S usḥerjel, wa isenned ɣef wayeḍ, la ddelwiḥen seg uyeffus s azelmaḍ, lehdur ger-asen am asif iḥemlen. Yettkemmil Farid : - Ruḥeɣ-d, umbeɛd lɛid, d abrid ɣer tesdawit n Wad Ɛisi. Deg ubrid n Draɛ Lmizan, ufiɣ-d yiwet n terbaɛt n yeqrucen iǧadarmiyen. Zaɛma am lqeyyad-nni s waci iɣ-teṭṭef Fransa, s yiwet n taɛrabt i deg-i yal azgen n twinast d ṭyaḥa d lexṣara n wawal. Umbaɛd mi skeɛreren fell-i sdat n lɣaci, sersen-iyi si lkar, srid ɣer ufurgut-nsen i yi-yewwin di lkazirna n Friḥa. 45 n wussan i ɣillen imawlan-iw di tesdawit i tent-lliɣ. Ur uminen ara mi sen-d-nniɣ di tilifun belli aqliyi di Ḥed sḥari. Allaɣ-iw yuɣal la yesbiḥliw ɣef ayen iḍerrun yid-i. Qleɣ ger iserdasen-nni yesderdifen s isebbaḍen-nni n wuzzal d uglim am ifer aqmamas (afessas) yesdelwiḥ waḍu si tiɣilt ɣer tayeḍ. Ula d tiyita s leklac ur iyi-tt-slemden akken ilaq meqbel ad iyiceggɛen ɣer ǧahennama-agi-nsen. Ɣur-k ad tǧaɛleḍ yella kra i d iyiḥesben deg at ikakiḍen-agi akked deg at ucekriḍ. Nekk ɣur-i kefkifnsen. Ad ruḥen nitni, ad d-uɣalem kenwi. Uggadeɣ ad tekkem deg-

- 54 -



sen di leǧhel. Nitni ukren tamurt s yisem n tegrawla, kenwi ad tttakrem s yisem n ddin. D acu imgaraden ger-awen ? Ulac ! Yerra-as-d Smaɛil i t-yerǧan sima a d-yekfu awal : - Twalaḍ tura amek ! Akken ad d-tessukseḍ taqerruct-ik si lfinga, tqebleḍ ad tezzuzfeḍ tiqerwac n wiyaḍ ur tessineḍ ula di tewlafin. Tuggadeḍ akken ad k-nɣen neɣ ad k-rren ɣer lḥebs, dɣa tenniḍ-as dayen ttuḥettmeɣ ad nɣeɣ imjuhad umadaɣ. Twalaḍ amek !? I nekk teẓriḍ d acu n tyita ujewwaq i yi-d-yewwin ɣer da ? Issusem cwiṭ, imuqel s udem n farid i yellan d awraɣ seg wimi i dneqqel tidi igan am iblalacen. Dɣa s wekmam n tkebbuḍt-is, iddemd isfeḍ-as-d udem-is. Syin ikemmel awal-is : - Meḥsub nekk teḥṣel-iyi deg at ičumar-agi ! Rebbi yeẓra ur bɣiɣ ara ad nɣeɣ ula d taweṭṭuft. Ur tettamneḍ ara amek i llan deg umadaɣ. Nekk ɣilleɣ ad d-afeɣ imjuhad yekkaten uzzal deg uzzal. Ziɣ d arrac yettnaɣen ɣef tduliyin, wa ihedder ɣef wayeḍ, wa ur yettamen wayeḍ. Aɣilif-nsen d učči akked twafra. Widak yark i d-yeffɣen s amadaɣ s tirrugza d tezdeg n wul, mmuten tura, ad ten-yerḥem Rebbi. Widak i d-yeggran uɣalen amzun d imakaren. Yernu nekkni xerṣum di tmurt n leqbayel ulac timezliwin n tuddar d usqiṭṭeɛ i lɣaci deg iberdan. Ar tura ur d-tewwiḍ ara. Yeḥbes lehdur am win ibɣan ad asen-d-yales deg allaɣ-is. Farid i yebdan la s-d-yettuɣal rruḥ, yesteqsa-t akken teḥma : - Ihi acu i k-id-yewwin ɣer rrebrab ma yella annect-agi yark i sentettalaseḍ ? Yerra-as-d Smaɛil am win yeẓran belli d tagi i tikkelt taneggarut i yezmer ad d-yini tidet yeffren zdaxel-is : - Werǧin ssarmeɣ ad nɣeɣ yiwen neɣ kra. Kkes-d balak iǧadarmiyen ɣucceɣ am qeḍran. Nekk ɣur-i nitni mačči d lɛibad. Uggadeɣ lemmer d lmelk ara d-yelsen timelsa-nsen zemreɣ ad nnaɣeɣ yid-s. Mulac ul-iw mačči d win ifernen aɣuccu. Asmi nezdeɣ di Bab Lwad, lliɣ dima ttaḍsaɣ ɣef sin n watmaten-iw i d iyi-ugaren, ladɣa ameqran i yeddan seg ul-is d ukabar n at ičumar. Asmi yettwaḥbes lbuṭ d netta akked imeddukal-is i refden d imezwura seg tezniqtnneɣ. Yewwet-en ma drus sin iseggasen di lḥebs mebla ma iɛedda


- 55 -


di ccreɛ. Syin ssuffɣen-t-id akken kra n wagguren kan leqfen-t deg ubrid. Iruḥ ur d-iban ara armi d asmi i yufan aqerru-is ɣef yiri n ubrid di Ḥeǧuṭ. Daɣen mebla ma nniɣ-ak-d belli arraw n leḥram iǧadarmiyen mmɣin-d deg uxxam-nneɣ. Sya ɣer da ad d-ẓedmen ɣef uxxam am terbaɛt n warẓen yeffeɣ leɛqel. Rregmat, ṭyaḥa, asexser n wawal, taruẓi n leḥwal, anadi ma yella zaɛma acu ara yafen. Ayagi i yerran gma nniḍen ad yeffeɣ s amadaɣ. Dɣa seg assnni rnan ncaf deg-neɣ. Yal ddurt neɣ snat ad aɣ-awin nekk d baba ɣer lkumiṣariya. Wwḍeɣ armi cukkeɣ deg-sen bɣan ad aɣ-ssuffɣen s amadaɣ. Sin wagguren neɣ ugar ciṭuḥ meqbel tura, yeffeɣ-d fell-i u “billet de recherche” amzun yella kra i xedmeɣ. D lǧar-nneɣ, yiwen akken ubulis aqdim, i d-yessawḍen izen i baba belli hat-en-in la theggin ad iyi-d-awin di lḥebs n lḥerrac. Rewleɣ ɣer taddart-iw deg Iberbacen. Ula dinna ur iyi-ǧǧan ara trankil. Dɣa rewleɣ s amadaɣ anda i ḍemɛeɣ ad nafeɣ gma akked imeddukal-is. Yeclulef wul-iw mi n-ufiɣ isali belli gma yemmut deg yiwet n txazzabit, u tugti n imeddukal-is wwḍen leɛfu n Rebbi neɣ ttwaṭṭfen ɣer lḥebs. Ayen iyi-kemmlen d tikli nni i n-ufiɣ leḥḥun-tt zun akenni imjuhad n lqern-agi n tlafsa. Tismin, lḥers, amennuɣ d tagdi akked ccek di yal yiwen. Tagnit umadaɣ tfuḥ am tebṣelt yerkan di taduṭ tamellalt. S ufella tecbeḥ, daxel tetreɣɣel. Axayel-nni n uzuliɣ n tilawt akked n wemdan. Yernu abeddel-nni yeḍran yid-i deg yiwen umecwar ikemmel ddigutiɣ deg ayen i n-ufiɣ. Si tguni deg uxxam yeḥman ɣer weglilez deg akal asemmaḍ seddaw isekla yestewḥacen. Si tẓeṭ n wul n imawlan d watmaten ɣer leqseḥ n wallaɣ n widak yesddubbez wedrar d umennuɣ. Sin wagguren-agi yezrin banen-iyi-d am sin leqrun di ǧahennama. Uḍan-iw uɣalen d alejlej n wer tilisa. Yernu nekk ur bɣiɣ ad nɣeɣ ula yiwen. Farid yellan yezzer deg yiwen n ssruɛ, yeɛreḍ acḥal n tikal ad yegzi acu i s-dyeqqar umeddakel-is n twaɣit, acu kan allaɣ-is amzun iruḥ ɣer umḍiq-nniḍen. Ger umekti d rwaḥ uxemmem, allaɣ-is yesmirjiḥ am Haǧir ger snat n tqucac n wedrar. Acu i t-yettawin seg umekti n temẓi-s ɣer umekti n uṭiṭuc yellan deg uɛebbuḍ-is ansi mazal la dneggin idammen am tmeqwa n tbarint ur nezmiḍ ara.

- 56 -



Acellef yettcellif s tfekka-s ticiṭwin isekla d yemɣan yettḥulfu-as amzun d aslaf n yaya-s asmi la tesganay deg irebbi-s. S tmucuha n Briruc d Belɛejjuṭ d wekmas afessas di tmelɣit-is i la tessekcam di tudert n tirga akked tguni. Am ass-a, di tlemmast uɣemɣum azeggaz i d-yettalin deg uɛeddi-s, yebda la yesteɛfuy u la yesgunfuy amzun d afrux i wumi keblen warrac afriwen. Dɣa, yettu anida yella. Imuqel anida ara iwali ameddakel-is, ur t-yufi ara. Dɣa yebberttax s wudem ɣef akal asemmaḍ yeččuren d iferrawen yerkan. Yezzer deg yiwen n tguni deg yiwet n tgertilt n wagu, tili yezmer ad yettu ur dyettaki ara alamma d ass n taggara n ddunit. Ifka-as jeddi-s kra n tbeqqacin timecṭaḥ ɣef udem-is, dɣa yetkaki-d. Yefreḥ mi iwala yuɣal-d. Syin yenna-as : - A jeddi, lemmer ad teẓreḍ acḥal i k-ḥemmleɣ. Asmi i temmuteḍ ḥulfaɣ-as am akken tella tɣawsa iyi-d-kksen seg ul-iw. Yeqlaleḥ assnni am llufan i wumi yenta umesmar deg uḍar-is. Ruɣ imir-en armi qrib ddreɣlent wallen-iw. Ulac amek ur d iyi-texdim ara yemma akken ad susmeɣ. Nekk ḥemmleɣ ad ttruɣ armi yi-tewwi lalla taguni. Ɣas ass-nni ur ẓriɣ ara acu i d anamek n tmettant. Nekk ɣilleɣ ad d-tuɣaleḍ ! Iddem-d umɣar yellan yelsa aqendur amellal, irfed-d aqerru n mmis n mmi-s isers-it ɣef taɣma-s. Syin yebda la s-iseffeḍ udem-is yeččuren d ixenčwan. Yessufeɣ-d yiwet n tbuqalt tameẓyant n waman, u yessureg-as kra n tmeqwa deg imi n uqcic yeqquren. Amɣar la yettru. Dɣa yenna-as weqcic : - A jeddi ur ttru ara ! Ur ḥmileɣ ara ad k-waliɣ akka s imeṭṭawen, nekk tasa-w d tasa n teqcict. Uggadeɣ ad ruɣ ! Yerra-as-d umɣar acebḥan am taduṭ yuraden deg aman n udrar : - Mačči fell-ak i la ttruɣ. Ad ttruɣ ula ɣef imeddukal-ik, ttruɣ diɣen ɣef yiman-iw. Issusem cwiṭ, imuqel ɣas taṭṭucin tiqehwiyin n uqcic i la ixettin am teftilt seg wimi tettruḥu trisiti. Syin yenna-as : - Uɣalen-d imeddukal-iw akken ad nennaɣ mgal lɛesker neɣ iserdasen (akken teqqarem tura) n tlisa. Nniɣ-asen nekk d amɣar


- 57 -


ɛyiɣ. Asmi d arumi iban d wumi i ttnaɣeɣ, ma d tura wigi d atmaten-nneɣ. Ur zmireɣ ara ad qableɣ win i ɣ-d-ixelqen s idammen n watmaten-iw deg ifassen-iw. Dɣa d widak-nni ḥesbeɣ d atmaten-iw i d iyi-zuɣren seg uxxam am uydi. Rran-iyi snasel sdat temɣart d warrac. Nnan-iyi-d nebɣa ad k-nesteqsi. Nniɣ-asen fiḥel snasel. Nnan-iyi-d d wagi i d lqanun. Nniɣ-asen d amjahed. Nnan-d awi-d lekwaɣeḍ. Nniɣ-asen ulac. Ikmez umɣar tamart-is tacbḥant am iɣiɣden, syin ikemmel : - Sin wagguren di Wargla. Tamsalt tefra tfuk. Lemmer mačči d yiwen n mmi-s n laṣel n taddart n Tqerbuzt i yi-d-yemmektan mi tin-ceyyɛen d aɛessas ɣer din. Aṭas i nesɛedda akken deg wedrar. Igzem-as weqcic, i d-yetkakin imir-en, awal-is : - A jeddi ḥemmleɣ-k, u ḥemmleɣ yaya ! Segmi ulac acu i d-yerna, ikemmel umɣar : - Xemteɣ di tebḥirt-iw am yiwen umɣar yeẓẓan tilisa ger-as d ddunit. Amennuɣ irumyen isefcel-iyi iẓuran n lebɣi-w. Dɣa ass-nni n rrwaḥ-iw ɣer ɛemt-k di tedmayt, ur ẓriɣ ara ma yella d yir zzher neɣ d tawenza kan, yeḍḥa-d d yiwet n tmesbanit di Tizi Wezzu. Nekk ass-nni wwiɣ aqecwal iniɣman d tarzeft i ɛemt-k ; d ayen i ttid-iṣaḥen. Ufiɣ-en din amɣar-is yeḥdaqer u yeqlaleḥ ɣef mmi-s yeqqaren di tesdawit. Yugad lemmer ad as-anfeɣ ad iruḥ weḥd-s. Dɣa am ṭneh ddiɣ. Ayen akken ur ḥtameɣ ara yeḍra-d. S ujelkaḍ s azagur n umɣar lliɣ imir-en i yi-ṭṭfen di lkazirna n Tizi. Ulac amek ur ten-ḥelleɣ ad serḥen i umɣar am nekk issufɣen irumyen. Ur dcliɛen ara di lehdur-iw. Regmen-iyi, susfen-iyi armi ɣliɣ d irumyen i d-yuɣalen. Dɣa seg ass-nni i tt-friɣ belli ilaq-iyi ad mmteɣ. Syin cwiṭ kan seg imir-en, akken teẓriḍ, mmuteɣ. Yelli-d allen-is Farid, yufa-d jeddi-s ulac-it. Inuda Smaɛil s wallen, ur t-yufi ara daɣen. Iḥulfa am yiwen wagu aseṭṭaf i yesbrebren ɣef tikta-s. Yettwali isekla ttleɣwin ɣef yiman-nsen am umeslub yeṭṭrewcen. Tesmeḍ la d-tettali seg ixfan n tfednin-is amzun d tazermemmuct yeɛyan. S cwiṭ n tafat i d-mazal deg allen-is, yuɣal-d timendeffirt akken ad inadi ɣef umeddakel-is. Kra n imejjaqen ar deffir, yufa-t ɣef yiri n

- 58 -



yiwen n uḥecraruf, la yettiẓif seg uqraḥ i s-d-yekkan seg uɛrur-is. Yella isers amag-is deg akal, yettaɛraḍ ad d-isami s iḍudan-is talemmast uzagur-is anida ntant terṣaṣin. Ad as-tiniḍ d yiwen iɣeẓẓa uksum, u yettaɛraḍ ad d-yekmez, u netta ur yessaweḍ ara. Si tama nniḍen, Farid iwala iṭij mi d-yeɣli ɣef akal am tciret n ddabex, yebḍa d iceqfan yuɣalen s igenni. Dɣa yuɣal igenni yesɛa aceqquf n yiṭij di yal tiɣmert. Yeḥṣel Farid sani ara imuqel, imi tafat tennerna, tettreqriq am times di tmelɣiɣt teccef tidi. D azgen n wass. Ur yeẓri ara amek yufa di lǧib n daxel n tkebbuḍtis kra n tḥebbuyin n cakula, ruḥent am tidak yettwarefjen. Talɣansen truḥ-asent. Iddem-d yelli-as aqemmuc-is i Smaɛil ansi i dteffɣen ikefta iwraɣen. Iwerreg-as taḥebbuyt-nni n ccakula ger tuɣmas-is. Ula d netta yesɛa yiwet deg imi-s. Imceḥ-itt s leɛqel lemmer ad as-tewḥel. Mi d-yelli Smaɛil allen-is , yessuter-as Farid ad d-yeckenteḍ deg-s. Dɣa s sin ifassen ijgugel-d di tuyat umeddakel-is i d-yettbanen tuɣal-as-d tezmert-is. Am sin leyalat di tmurt n tirga, lḥan-d di tebriḍt-nni-nsen, yiwen ur yeẓri anwa i d d-ibbuben wayeḍ segmi akken tifekka-nsen la ddelwiḥent ar yal tama. Isuraf meẓẓiyit. Tuyat knant, cɣel yella kra i d-bbubben, ɣas ma yella ur d-yettban ara i wallen. Yenna-as Farid s taɣect lqayen anda i d-yedda cwiṭ unexxem : - Ula d kečč ini-as i yemma belli mmuteɣ akka kan. Ur ẓriɣ ara ayɣer. Mačči d nekk i d-yewwin iman-iw ɣer dag-i. Ini-as wwin-iyi bessif. Ini-as kellxen fell-i belli ɣef tmurt i ttḥarabeɣ. Ini-as di seddis n wagguren n lɛesker, walaɣ lbaṭel yeṭṭfen udem n bnadem. Acu kan ini-as diɣen belli mmuteɣ d argaz, ur uggadeɣ ara nnig zzayed. Ini-as tazwawaṭ-agi ad tɛeddi, ɣas ur ttru ara fell-i. Ini-as ḥemmleɣ-kem, kem d baba d watmaten-iw. Yerra-as-d Smaɛil i wumi yexeččew yark wudem tura s yiwet n taɣect rqiqen armi qrib i d-tban ḥlawet : - Ur ttaggad ulac anwa deg-neɣ ara d-yeggrin. Aqlih ḥulfaɣ ger dqiqa d tayeḍ, imi ṭṭubnen imeẓẓaɣen-iw seg umekti n uhetwir n rṣaṣ yeḍran leɛca. Yernu daɣen, ur bɣiɣ ara ad rnuɣ asufri di tudert-


- 59 -


agi. Iɣsan-iw la ttqerqicen am usɣar iḥeḍmen n ukerruc seddaw ujajiḥ n tmes. Aql-i uɣaleɣ am tqeclalt yeswan aman armi terwa. Uggadeɣ aql-i mmuteɣ u nekk ur faqeɣ ara. Ahat d rruḥ-iw i dmazal kan yettnadi abrid-is ɣer laxart. Ẓer kan belli ula d nekk neddmeɣ ɣef yal tarṣaṣt wwteɣ di sin wagguren n umadaɣ. Tiẓgi tesmulḥuc di yal tama. Ulac nwel uɣersiw yettidiren din ur mlalen ara. Am akken ulac d acu ara yagaden si sin lexyalat-agi ttun wussan. Uccanen, izirdiyen, ibeɛɛac, izerman, ilfan d wayen werǧin walan sxenticen di yal tama amzun ulac-iten. Deg yiwet n temraḥt, anda yella isenned weslaḍ ɣef yiri n ubrid, ḥebsen ad steɛfun. Imi yal yiwen deg-sen inɣel-d ddeqs idammen, ɣas ma yella aṭas i ten-tessukkes tejbirt-nni bḍan di sin. D nettat i sen-yuɣalen d aḥebbas i umiri idamen. Dɣa di sin wa ɣef wayeḍ, amgarḍ s amgarḍ senden izugar-nsen ɣef akal yesseḥma yiṭij. Inɣesasen weqraḥ seg uzɣal-agi aleqqaq i sen-d-yekkan si tafukt, ḥulfan i izerzaren-is amzun d iḍudan n teryel-nni n tmucuha i senyeslufuyen. Allen la ttazalent, tafekka yark tefcel, tirga uɣalent ḥlawent am tament, aqraḥ inɣes aṭas. Ggumman ad kkren di sin si teɛrict-nni n weslaḍ yersen ɣef yiri n ubrid. Si tqacuct n tasaft yellan seddaw wanda qimen, jeddi-s n farid la yettru mi la d-yettmuqul deg-sen. Yebzeg uḥayek-is amellal seg imeṭṭawen. Yebda la s-d-yessawal i mmi-s n mmi-s s ujaɣuɣ-is akken ad t-id-yesker. Segmi ur s-d-yerri ara awal, iṣubb-d s tazzla am ufrux mara d-yeẓdem seg igenni ɣef twekka i d-yufraren s ufella n wakal. Dɣa akken i d-yewweḍ ɣur-sen, yebda la yeshuccuy degsen akken ad ten-id-yesker. Nitni, am widak yerna yid-s, ugin u gumman ad d-llin allen-nsen. Yeddem-d umɣar si lǧil uqendur-is tabewwaḍt tamecṭuḥt annect n tmellalt. Tella la tettmecberiq am uraɣ. Yelli-tt-id s ifassen-is izuranen am umaddaz. Isufeɣ-d seg-s yiwet n teckkitt yettcabin ɣer tament, dɣa issmecḥ-asen-tt di sin imir-en kan llin-d allen-nsen di sin am widak i d-yulin si lbir lqayen. Yenna-as umɣar i weqcic :

- 60 -



- A Farid aṭas n tuddar i yellan di teẓgi-agi, ur cfiɣ ara fell-asent irkelli. Lemmer i zmireɣ tili d nekk ara ken-ibbiben ɣer walbɛaḍ deg-sent ara ken yawin ɣer sbiṭar anida ra ken-dawin. Xedmet cwiṭ n lkuraj ɣef yiman-nwen, ur gganet ara. Ḍefret tabriḍt-agi alamma temlalem-d albɛaḍ si tuddar. Ur cfiɣ ara abrid-agi sani yessufuɣ, ma ar Tmazirt Urabaḥ neɣ ɣer Tbeccarin, neɣ ahat ɣer taddart Uxenduq. Yezmer daɣen d at Yeften. Lḥaṣul sani teffeɣ-m ɣer din. Farid i d-yetkakin ciṭuḥ, iṭanez irfed-d ameddakel-is i wumi yeɣli wemgarḍ ɣef tayett. Syin isteqsa jeddi-s : - A jeddi, ayɣer dɣa d kečč i ttwaliɣ akka tura mačči d setti neɣ d albɛaḍ nniḍen. Yernu teẓriḍ acḥal i ḥemmleɣ setti ! Ikmez umɣar tamart-is mazal-en tellexs seg imeṭṭawen n sgelli. Yerra-as-d : - Ur d-tluleḍ ara armi i tt-necrew merriɣet. Nerǧa azal n semmus iseggasen talalit-ik. Ulac amek ur nedɛi ara Uzmir akken ad aɣ-k-idyefk. Baba-k yuɣal am ucwari iqersen, yemma-k mačči d ayen ara kid-iniɣ. Uɣalen ttsetḥin ad d-ffɣen deg uxxam si texxamt-nsen... Makken i la s ittmeslay, illa la s-yeslufuy i wudem-is am akken teslufuy temcict i warraw-is, ikemmel awal-is : - Yewwas di tejmaɛt n taddart, ɣef tnac n yiḍ, mi d-uɣaleɣ sɣur nanna-k Zhur, wwiɣ-as tacebbaṭ dɣa ṭṭfen-iyi-n s imensi akked lehdur. Ihi, ufiɣ-d yiwen umɣar yettlen iman-is deg yiwen ubernus amellal am udfel, ad as tiniḍ tekkat-d seg-s tafat. Ulac amek ur sssawleɣ ara, yugi ad iyi-d-yerr ameslay. Nniɣ deg ul-iw tura ad xebbleɣ, syin ad waliɣ ma yella dɣa yessusem. Acu kan, mi yi-dimuqel s wallen-is timellalin, faqeɣ belli mačči d bnadem. Dɣa d tarewla s axxam. Teṭṭef-iyi tawla u bdiɣ ad ttargigiɣ am yifer. D yaya-k iyi zemmḍen deg irebbi-s armi iyi-d-yuɣal lɛeql-iw. Ass-nni dɣa i yurgaɣ ad d-tlaleḍ am itri aberqaqac deg igenni ajenjari. Nefreḥ yess-k meqbel ad d-tlaleḍ. U ma tecfiḍ werǧin i k-yewwet yiwen deg uxxam ɣas ma rnan-d watmaten-ik umbeɛd. Iṭṭef-it tikkelt-agi seg ifassen-is isellawen. Yettmuqul deg-s srid s allen yellin kan s wezgen. Ikemmel yenna-as :


- 61 -


- Ulac yiwen seg wid yemmuten ara iferḥen umbeɛd mara iẓer acu akka iḍran yid-k. Lejdud-ik merra ad ten-yeṭṭef unezgum mara senyaweḍ yizen belli temmutem s lmut tucmit deg yiwen umennuɣ i dslulen wiyaḍ. Nitni tura ččan rwan ḥman deg ixxamen-nsen. Nitni dderya urumi qimen tura ger yeqrucen-nsen. Kenwi a tarwa kfan seg-wen idammen-nwen di teẓgi. Ulac ula d yiwen i d-yesteqsan fell-awen. Lemmer ur ken-ssawaḍeɣ ara ar sbiṭar ad temtem dag-i am yiḍan. Imdel allen-is yelli-tent-id, yufa-d jeddi-s ulac-it. Ad as-tiniḍ yeclulef deg ubeḥri i d-yettilin seg ilel. Yessaki-d ameddakel-is yellan yexxuc am iniɣem yeffer ucbayli. Dɣa di sin d tikli deg ubrid yettawin ur ẓrin sani. Am sin iderɣalen yesferficen ɣef ubrid s iḍarren-nsen. U yal mara yeɣli yiwen ad t-id-yerfed wayeḍ. U yal mara yemderkal yiwen ad dyeṭṭef deg wayeḍ. Leḥḥun di lawan anida idammen ttqudduren-d seg-sen, ɣas ma drus tmeqwa. Ilsawen-nsen qquren lemmer mačči d yiwet n tiẓet i yufan deg imawen-nsen. Ticki, di lawan n tizwal, walan kra n yexxamen isettfen isetfen am teblaḍin deg yiwet n tiɣilt. Tazwara ɣillen d ahanes (mirage). Acu kan segmi rennun tikli qbala-s i sen-d-yettban belli d targit. Yennaas-d imir-en Smaɛil i umeddakel-is aserdas : - Uggadeɣ ad iyi-yenɣen iɛsekriyen mara ẓran nekk d amjahed. Yerra-as-d umeddakel-is : - Ur ttaggad ara. Ma tebɣiḍ ad asen-nini belli ṭṭfen-iyi irebraben u d kečč i yi-d-yesrewlen seg-sen. Anaɣ akka ? Yerra-as-d Smaɛil i yebdan la s yettruḥu umrar n tektiwin-is : - Akka a yameddakel ! Di tegnit-nni i d-yenna awal-agi aneggaru, iḥulfa i tgucrar-is mi bdant la xettint s lemɣawla am tcemmaɛt makken ara taweḍ ɣer taggara-s. U Farid iɛerḍen ad t-id-yeṭṭef yedda yid-s di ɣellu. Ula d netta tekfa-as tezmert. Wa ɣer tama n wagi, deg akal yesseḥma cwiṭ yiṭij, ẓẓlen am sin ijebbaden isellawen. Allen-nsen berrant s igenni yeččur yiṭij d tafatis. Ifrax cennun ger ifurkan isekla, ttazzalen di yal tama.

- 62 -



Yesla imir-en Farid i yiwen usiwel i d-yekkan seg iwsawen n tiɣilt. Yezzi aqerru-is akken ad iwali ansi i d-yekka usiwel-nni. Dɣa iwala jeddi-s yesɣezfen iman-is azal n snat n tikal. Aqendur-is amellal la yesbiḥliw deg igenni. Yettwehhi-yasen-d s ufus akken ad d-alin s anda akken yella. U seg makken iwala mačči d widak ara dikemmlen tikli, ijfel-d deg igenni am ufrux iselben ger tqucac n isekla. Di tazzla-s ɣlin-d aṭas n iferrawen s waḍu-nni i n-yettaǧǧa deffir-s. Am uzerzer n tafat yewweḍ-d ɣur-sen deg yiwet n dqiqa. Yeɛreḍ umɣar ad ten-id-yesker seg akal anida ẓẓlen wa ɣer tama n wayeḍ. Ula d taḍadect n yiwen deg-sen ur yezmir ara ad ttyessembbiwel. Dɣa yebda la sen-ixeddem lkuraj akken xerṣum ad kemmlen s abrid ukerrus anida izmer ad ten-id-yaf walbɛaḍ ma iɛedda-d ; yeqqar-asen : “a tarwa, kker-t ɣef yiman-nwen, a farid kker mačči aṭas i wen-d-mazal. Aha ! Aha ! Cwiṭ n waffud ay arrac. Nekkini zik-nni mačči d cwiṭiṭuḥ n wuzzal ara ɣ-yernun. Kker-t ɣef yiman-nwen, tixret i tifinyent. Abrid ukerrus, hat-an kan dahi iwsawen. Mačči aṭas n tikli. Kker-t, ur ttuɣal-d ara d uffal yettleɣwin am tmeṭṭut. Argaz aberraz d win iṣebbren mara teẓmek fell-as ddunit. Aha, ttxilwat kker-t. A Farid kker. Xemmem cwiṭ s imawlan-ik, ahat tura yenɣa-ten unezgum di ddra-k. A memmi kker, mačči d lawan n lmut-ik. Aql-ak meẓẓiyeḍ. Kker syin teččeḍ yark iqrucen yeččan tamurt, widak i tt-isummen am iwaɣzniwen yettsummun idammen”. Nitni, bdant la ttaẓayent wallen-nsen am sin ikufan i demmken s wuzzal. Iẓuran-nsen fsin u zgezwen, yeǧǧa-ten lǧehd. Di sin, tayett ɣer tayett, seddaw yiwet n taddart di teẓgi n Mizrana, deg yiwen n yeɣzer, lerwaḥ-nsen la d-regglen si temeḍ-nni i sen-d-yettalin seg tgucrar yeqquren tura. Inṭeq Smaɛil arebrab ɣer Farid aserdas, yenna-as : - Acu-yak-t umɣar-agi ? Yerra-as-d Farid, s taẓayt deg iles : - D jeddi. Yemmut aṭas-ayagi. Dɣa yenna-as-d Smaɛil : - Ah !


- 63 -


Cuhden di sin, deg yiwen umecwar. Amɣar yeclulef am agu yessefi waḍu. Iṭij yella yeslufuy i tmurt mi d-yeffeɣ nnefs aneggaru seg imawen n sin-nni imeddukal n lḥif yemyussanen qrib azgen n wass. Timerna : D yiwen umeksa n taddart n Tala Teɣrast neɣ n taddart n Tqiwac, akken i d-ḥekkun kra, i yufan sin-nni yergazen ččan wuccanen deg iɣzer ddaw ubrid n Tilmatin. Kullec seg-sen yemmeč. Ula d ifrax leqḍen tiftatin-nni n uksum d yeɣsan i d-ǧǧan wuccanen d igudar. Mi wwḍen lɣaci ɛewqen acu ara xedmen deg-sen. Nnan-as ad asennini i yemsulta ad d-ruḥen ad ten-awin. Acu kan ineggura-agi nnanasen-d ur nezmir ara a n-ruḥen imi liḥala n temnaḍt-nni d liḥala rqiqen. Ur bɣan ara ad tt-qamren. Dɣa yiwen n umɣar azemni n taddart At Zrubar yefra-yasen-tt-id d akken ad ɣizen tanṭelt anida akken i ten-ufan. Syin ad rren ɣur-s ayen yark i d-mazal n yeɣsan d iẓerman d uksum yefruzaɛen deg iɣzer-nni. Wwin-d yiwen limam, iẓẓul fell-asen meqbel ad asen-rren akal d yeẓra. Kra n yergazen iḥedren ass-nni qqaren-d belli yemɣi-d deg iɣzer-nni di kra kan n iseggasen yiwen n useklu n usisnew i dyettaken lɣella-s meqren annect n lbexsis. U yesɛa sin ifurkan yettiɣzifen deg igenni yal aseggas. Arrac n taddart ḥemlen mara dyaweḍ lawan-nni i deg-i ittewwa usisnew. Ass wis 8 si yennayer 2012

- 64 -


Lweḥc Mourad ZIMU

A

smi d-usiɣ ɣer Paris i tikkelt tamezwarut, rseɣ di Gare de Lyon, ddiɣ-d di TGV i d-yusan si Marseille. Cfiɣ ɣef uḥulfu-nni i yi-izedɣen akken imir-nni, cfiɣ fell-as am wakken d tura, cfiɣ wehmeɣ kan akka di zzhir n umiṭru, ay annect n zzhir, qqareɣ-as deg wul-iw amek i zemren akka tura medden i wannect-a n zzhir akked ẓwic, uggadeɣ, ttmuquleɣ deg wudmawen-nsen ma yella win yetweḥḥcen akka am nekk, ulac. Kra n zzhir akken, di tazwara nniɣ-as ahat d amiṭru-agi kan, ahat ma yeɛya umutur-is, anwa i yeẓran !? Dacu, akken kan nbeddel amiṭru nniḍen, kifkif, ay annect n zzhir, ččuren akk yimeẓẓuɣen-iw d ahruḥu. Ttmeslayeɣ-as i umeddakel-iw s leɛyaḍ, nniɣ-as ahat ur iyi-d-isell ara, armi i yi-d-yenna netta : ur ttɛeggiḍ ara, nniɣ-as : aya, a ziɣen d nekk i yettɛeggiḍen. Ssusmeɣ. Ay annect n zzhir, rnu-as annect-nni n lɣaci yal wa anda yettazzal. Ma daxel umiṭru, twerrek ddunit, aṭas n medden, jguglen akk sya wesya, wa yewwet aqerru-s di lǧernan, wayeḍ yecɛel allen-is ɣer yigenni, ulac win i la yettmuqulen deg wayeḍ, ḥala nekk i la yettmuqulen deg-sen. Ibedd-d yiwen rrif-iw, takrabaḍt, akustim, aṭerwakar a sidi… dacu, yettḍeggir-d yiwet n rriḥa n win yeččan ticcert yerna-as taqerɛet n rruj. Muqleɣ deg-s walaɣ ula d lekmam-is daɣen rkan, ḍebren akk di leryuf. Mi ara tmuqleḍ akka deg-s zaɛma akustim takrabaḍt, dacu ayen din yerka, yettraḥ, wehmeɣ kan akka. Ahat ur ilaq ara ad d-wwteɣ akka deg-s, ageswaḥ ur t-ssineɣ ur iyiTamaziɣt tura – Un 11 – H.C.A / yebrir 2013

- 65 -


yessin, d acu, anwa i yeẓran, ttwalem ula d netta ahat akka i yemmeslay akked tmeṭṭut-is iḍ-nni mi yekcem s axxam, yettban kan akka ɣef wudem-is d tasa n urumi, ɛeqleɣ-t kan akka ur s-hwiɣ ara, imi la t-ttmuquleɣ iḥekker-iyi-d amzun akken nɣiɣ-as baba-s. D aya i yi-yeswehmen asmi i d-usiɣ ɣer Paris i tikkelt tamezwarut. Deg yiḍ-nni daɣen, wehmeɣ mi tewweḍ ssaɛa d ttnac n yiḍ, yernu mazal tiḥdayin la ttecrurudent am tsekkrin deg yiberdan. Aggad Rebbi, tiḥdayin d timelḥanin ɣef ttnac n yiḍ, leḥḥunt akk deg yiberdan, ttecmumuḥent, ttaḍsant amzun akken di lǧennet i llant. Di tmurt, amen s Rebbi, di leɛmer walaɣ taqcict ur tt-ssineɣ ara ɣef ttnac n yiḍ. Ussan-nni imezwura di Paris yeṭṭef-iyi afus umeddakel-iw Ḥsen, nḥewwes di yal tamkant. Kan akka, ccɣel ulac, leqraya mazal, netteddu nwala-d akk imukan yettwassnen di Paris. Imir-nni mi ara d-nekcem s amiṭru, ttalin-d kra n yimdanen ttqeṣṣiren-d lmuziga, wa s ugitar, wa s accordeon, wa s tjewwaqt. Nekk i d-yusan si tmurt, deg-i ṭṭerḍiqent lbumbat ttafgen yimesruqen ɣer yigenni, amzun akken di lǧennet i lliɣ. Amek iḍelli kan di tmurt i lliɣ, mi ara k-id-walin yimɣaren s ugitar di taddart teḥrem ar am wakken walan cciṭan. Wehmeɣ kan akka, amek akka tura wigi, ttqeṣṣiren agitar, ass kamel iḍ kamel, d tagi i d lxedmansen neɣ amek !? Steqsaɣ Ḥsen, nniɣ-as : ma ttxelliṣen-ten meqqar neɣ ala !? Yenna-yi-d belli d medden i asen-yettaken kra n ṣṣerf. Imir-nni acḥal n tikkal i mmɣeɣ ɣer lǧib-iw, ttaddameɣ-d ciṭ n wayen sɛiɣ n ṣṣerf ttakeɣ-t i wid-nni yettqeṣṣiren akken lmuziga. Ameddakel-iw yewhem deg-i, irennu-d ula d netta ɣur-i kra n frank neɣ sin, tikwal, yettweṣṣi-yi-d ad sneɣseɣ idrimen imi mazal ur ssineɣ ara acḥal i swan, i yi-d-yeqqar. Nekk am wakken di targit i lliɣ ussan-nni imezwura ideg d-usiɣ ɣer Paris. Nniɣ-as di tmurt ad tecnuḍ akka deg ubrid, ya ad k-wwten, ad k-sexnunsen, ya ad ak-akren agitar-ik, neɣ ma temmut akk, ad dasen yimeddukal-ik ad k-jemɛen ɣer uxxam am wakken d tisselbi i tselbeḍ. Dɣa ma yehwa-awen, imi d-ufiɣ akka tamurt ideg ttqeṣṣiren akka medden agitar ɛinani deg yiberdan, nekk i d-yusan

- 66 -



akka si tmurt-nni ideg kkaten medden agitar s tuffra… ccɣel am wakken ɛawdeɣ-d talalit. Ass-agi ɛeddan fell-i tura acḥal n yiseggasen di Paris, mazal-iyi di tmurt-a. Tedduɣ-d sgelli ad xedmeɣ, akustim takrabaḍt, lliɣ deg umiṭru, refdeɣ allen ɣer yigenni dɣa rsent wallen-iw ɣef lekmam n lbista-agi-inu, walaɣ-ten ḍebren, sseḍḥaɣ yis-sen, serseɣ afus-iw akken ur t-id-ttwalin ara wigi i ibedden akka tama-w. Mmektaɣ-d belli akustim-agi seg wasmi i t-id uɣeɣ seld ilindi ttlusuɣ-t ɣer lxedma, werǧin yurad a ssimra, ɛamayen-aya tura fell-as. Neqqim akken amecwar, ulin-d kra ad jewwqen ɣef yiqerra-nneɣ, yiwen s ugitar wayeḍ s ujewwaq. Nniɣ-as deg wul-iw waqila ad beddleɣ amiṭru, tikwal qqareɣ-as ad ɛeddiɣ ad asen-iniɣ ma ad qeblen wigi yettzemmiren akka tura, ad as-nefkeɣ a sidi idrimen dacu ad beddlen kan nutni amiṭru ad yi-ǧǧen trankil. Ttxemmimeɣ akka dɣa mmektaɣ-d ussan-nni-inu imezwura asmi i d-usiɣ akken ɣer Paris i tikkelt tamezwarut, rseɣ-d di Gare de Lyon, ddiɣ-d deg TGV i d-yekkan si Marseille. D acu i ibeddlen akka degi ay atmaten armi uɣaleɣ ur ttḥulfuɣ ara i zzhir-agi n umitru !? D acu i yemmuten akka deg-i ay imeddukal armi uɣaleɣ kerheɣ ad sleɣ i wigi YEKKATEN akka agitar deg umiṭru !? D acu i ibeddlen akka deg-i a ssimra armi uɣaleɣ kkateɣ-tt deg ukustim i wumi rkan lekmam-is !? Uɣaleɣ d lweḥc, uɣaleɣ d lweḥc, uɣaleɣ d leweḥc…


- 67 -

Ruḥen deg leɣlaḍ Nacera KEDDACHE

L

wennas yekker-d di Qsenṭina, imawlan-is d leqbayel maca ur yessin ara tutlayt taqbaylit, yekker-d di twacult gar warrac akked teḥdayin. Imawlan-is wwḍen leɛfu n Rebbi wa deffir wa, ultma-as tamenzut tezweǧ «tiwel», gma-s ameqqran fell-as diɣen yezweǧ. Yeggra-d ddaw leɛnaya n ultma-s meqqren di leɛmer maca ur tezwiǧ ara. Yeɣra, yesɛa aswir d aɛlayan i yeǧǧan ccan-is ad yali, yettmahil deg umaṭṭaf n Qsenṭina, s waya i yettwassen ɣer daxel neɣ ɣer berra n umahil-ines. Asmi i d-yeɣli rrebrab, kkren i yimahilen n umaṭṭaf neɣ wid n tiliẓri si rrif, kksen acḥal d argaz akked tmeṭṭut yettmahilen ɣer lbaylek. Lwennas yeεya yetteffeɣ s tuffra seg umkan n umahil-ines i wakken ad yeddari ɣef wallen n rrebrab. Yeḥḍer i yimeddukal-is ttmettaten yiwen yiwen aneggaru d win ukud iεawez iḍ azzekka-nni akken msefraqen yelḥeq ɣer uxxam yeweḍ-iṭ lexbar n lmut-is, ayen i t-yeǧǧan iḥar mi ara yettru ɣef yimeddukkal-is neɣ ad inadi ad isellek aqerru-s, yensa acḥal d iḍ ɣur daxel n uxxam n umahil-ines. Yeεya deg tuffra, yeεya deg tudert n lxuf, yekker yunag si tmurt ɣer tayeḍ i wakken ad inadi aɣrum-is, i wakken diɣen ad yeqqim d amuddir ilaq ad yenfu si temdint ideg yella, maca taswiεt teḥreṣ, rnu rrebrab iεuss tamurt di yal adeg, yekker iruḥ ɣer tmurt n lejdudis, tamurt n baba-s akked yemma-as ɣas akken ur yessin ara taqbaylit, di leεmer-is ur isers aḍar-is deg wakal n leqbayel, maca - 68 -



tusa-d teswiεt ideg ara yuɣal ɣer leṣel-is nnan at zik : ad ninig ur nufi ad nuɣal ama d irden ukufi, din tella yiwet n twacult-is d εmum-is n ufella, tawacult-agi tesεa adrim, sεan lluzin n lgazuz, yeqsed-iten ammer ad yaf afus n lemεawna sɣur-sen, d tidet ṭṭfen-t d anehhar i ukamyun yettawi yettserbi lgazuz ɣer tḥuna, yeggan ɣur-sen. Yuɣ lḥal tawacult-agi tesεa kraḍet n teḥdayin weεrent rnu d timcennfin mi akken baba-tsent d anesbaɣur. Lḥaṣul Lwennas yebda yettmahil, acemma ur t-ixuṣṣ, yiwet gar teḥdayin n twacultnni tsers tiṭ-is ɣef Lwennas yeεǧeb-as mačči d kra, ayen i tt-yeǧǧan tettbedda fell-as ama deg tgella ama deg tarda n yiceṭṭiḍen, ladɣa taxxamt ideg yeggan, ma d netta si tama-s ur iger acemma deg uqerru-s yenwa imi kan d axeddam ɣur baba-s. Lwennas ur ineṭṭeq ur yessenṭaq ladɣa ma ur yessin ara tameslayt n teqbaylit, tiɣimit-is yal ass weḥd-s, d asusam yiwen ur isel i taɣuct-is, lɣaci mi la tttwalin akken ur ṭṭifen ara imawen-nsen, yal yiwen d acu i as dyettɣenni uqerru-s, wa yenna-as : Ansi i d-yeɣli akka umexleq-agi cukkeɣ yettmahil d irebraben ? Yettawi-asen tixburin ɣef taddartagi, wayeḍ yenna-as : yittmahil ɣer lbaylek yesεa leslaḥ ceyyεen-t-id ad iwali ma yella win yettaken afus n tallelt i yirebraben, netta tuɣ lḥal yerwel-d seg rrebrab. Lwennas mi ifukk axeddim-ines iḥemmel ad yeqqim deg yiwen akken n umkan di taddart-nni, syin i dtettεeddi yiwet n teqcict yal ass deg yiwen n wakud. Taqcict-nni d tilemẓit n 25 n yiseggasen, akken kan i d-tfuk tizrawin-is si tesdawit tebda amahil, tezyen yessaram-itt yal ilemẓi. Lwennas anda yebɣu yella akud-nni ideg ara d-tεeddi Lwiza ad d-yaweḍ i wakken kan ad tt-iwali mi ara d-tεeddi. Ussan zerrin, Lwennas yettεassa Lwiza, tlul-d tayri deg wul-is tayri yettnernin yal ass mi ara tt-iwali, yal mi ara ad d-yeɣli yiḍ yettxemmim ḥala fell-as, amek ara as-yessiweḍ izen akken ad as-yini belli teεǧeb-as, yebɣa ad myussanen, maca tuggdi tezdeɣ ul-is imi yeḥṣa leqbayel ur ḥemmlen ara ad fken tiḥdayin-nsen i waεraben, ḥala tin ixuṣṣen neɣ tin yugaren, rnu yerra tamawt i tmuɣliwin n lɣaci n taddart-nni, ur ten-yeεǧib ara lḥal imi i d-yekcem taddart-nsen.


- 69 -


Yiwen wass deg wussan ideg yennum Lwennas tettεeddi-d Lwiza, yezwar iṭurref iman-is i wakken ad as-yini sin n yimeslayen, maca Lwiza teṭṭef-itt tuggdi teɣṣeb tikli tuggad lemmer ad tt-id-wali yiwen gar wid i tt-yessnen ad yawi isali i baba-s. Amek ara yexdem? Tusa-t-id yiwet n tekti, yekker yura-as tabrat yuzen-itt i yiwet n teqrurt d tamectuḥt iwelleh-itt i wakken ad as-tt-tefk weḥd-s. Taqrurt tewwi tabrat-nni i Lwiza mi tt-teldi tufa yessenked-d imanis, yenna-as-d : Azul, di tazwara ad am-iniɣ suref-iyi ɣef tikkelt-nni iεeddan bɣiɣ kan ad am-d-iniɣ, ur d-qsideɣ ara ad leεbeɣ s yiḥulfan-im, bɣiɣ-kem i nnesba ihi ad d-snekdeɣ iman-iw : nekk isem-iw Lwennas, sεiɣ 31 di tudert-iw xeddmeɣ tizrawin di tesdawit, tuɣ-iyi xeddmeɣ deg umaṭṭaf n Qsenṭina, maca ḥebseɣ segmi yeqwa rrebrab tura aql-i usiɣ-d ɣer taddart-agi i wakken ad xedmeɣ. Bɣiɣ ad am-d-iniɣ yemma akked baba d leqbayel, leǧdud-iw n taddart-agi. Ihi akka ssarameɣ tamusni n lxir ncallah. Lwennas yerǧa tiririt ɣef tebrat-is maca ulac, yekker yura-as tayeḍ, tayeḍ armi tuɣal Lwiza tebda tettḥulfu yis-s, txemmem, tesseḥseb, εeǧben-as yimeslayen-is, terfed imru terra-as tiririt ɣef tebratin-is. Din bdant tebratin ttawint, tterrant, heddren deg-sent ttmeẓran mbaεid. Lɣaci n taddart rran tamawt s wayen iḍerrun gar Lwennas akked Lwiza, rran tamawt i tɣimit n Lwennas di temḍiqt ansi i dtettεeddi Lwiza, d ucmumeḥ-ines yal mi ara d-telḥeq ɣur-s, acu ara xedmen ? Kkren sswḍen lexbar i Sekkura yelli-s n umεellem uɣur ixeddem Lwennas. Ayen i tt-yewwḍen ur tumin ara yis-s, teṭṭef Samir akked yiwen si twacult-is tefka-as idrimen yettεassa Lwennas, d tidet yewwi-as-d isalen akken tesla yenna-as walaɣ-ten s wallen-iw mi mbaddalen taḍsa. Sekkura ur tt-yeεǧib ara wayen tesla tettmeslay d yiman-is : amek kan Lwennas yebɣa tayeḍ ? Nekk i yettbeddan fell-as di kullec, rnu d baba i as-yefkan axeddim ass-a yebɣa tayeḍ, d lmuḥal ad d-yeḍru waya. Samir yettwaxelleṣ, d Lwennas i d-ccɣel-is, s kra yekka was ansi yekkes lǧerra ad tt-yerr netta, yettawi-as-d yal asurif ad yexdem deg wass, acku ur yelli wayen tezmer ad texdem weḥd-s, txemmem ɣer

- 70 -



ultma-s n Lwennas akken ad as-d-tefk afus n tallelt, taṣebḥit teffeɣ seg uxxam abrid-is srid ɣer tilifun tessawel-as tenna-as : - Alu, azul fell-awen a Malika nekk d Sekkura, amek telliḍ ? - Lḥemdullah, i kenwi ? I Lwennas-nneɣ la teṭhellayem cwiyya akka deg-s neɣ ala ? Lḥaṣul atan d lamana ɣur-wen ! - Dɣa fell-as i d-saweleɣ, wissen ma teḥṣiḍ, yebɣa yiwet n teqcict, neɣ ala ? Sefhem-iyi-d amek akka ? Baba yefka-as axeddim, yernaas taguni, nekk ur tesxuṣṣeɣ deg kulci rnu ḥemmleɣ-t ? Sefhem-iyid acu ideg xuṣṣeɣ ? Atan yefka-as awal ass n lexmis ad iruḥ ɣer uxxam i wakken ad tt-id-yexḍeb. - Ruḥ thenni ala nettat ur d-ikeccmen ara axxam-nneɣ s Rebbi d kemm ara d-yilin d tameṭṭut n Lwennas. Ini iyi-d tseneḍ axxam n teqcict-agi neɣ ala ? - Ssneɣ isem-is ! Anda tezdeɣ, wwiɣ-d kullec fell-as. Mi id yeḍḥa lawan n rrwaḥ n Lwennas ɣer uxxam-nsen yenwa yewwi ayen ara yesferḥen axxam-nsen, ma d ul-is yeččur d lferḥ, akken kan yekcem yenna-asen : - Wwiɣ-awen-d lexbar yessefraḥen, ma yebɣa Rebbi ufiɣ-d taqcict iɣef ters nneyya-inu, atan nniɣ-as ad as-tini i yemma-as ass n lexmis i d-iteddun ad nruḥ s axxam, yak akka a Malika ? D kemm i d ultma tameqqrant d kemm ara yeddun. Send ad yekfu awal, terra iman-is ur teḥṣi ara tenna-as : - Ferḥeɣ-ak nezzeh a gma, seg wul ad ruḥeɣ ɣur Sekkura, d tidet ur tt-ssineɣ ara aṭas maca ẓriɣ d yelli-s n umεellem uɣur txeddmeḍ ? Yerra-as Lwennas : - Ḥbes ! ḥbes ! Acu teshetrifeḍ akka anwa i am-d-yennan ? Mačči d Sekkura ? D tayeḍ ! Akken i as-d-yenna akka tecεel fell-as s yimeslayen , tenna-as : - Amek ara teǧǧeḍ Sekkura i yesεan adrim, d tameṭṭut n uxxam, ad d-tawiḍ tin ixeddmen ad ak-tesseεreq ass akked yiḍ. - Ad iniɣ tagi d tudert-iw, d nekk ara ifernen ayen bɣiɣ mačči d kemm. - Ihi ma tekcem-d axxam-agi nekk mačči d tameṭṭut.


- 71 -


Asmi tugi Malika ad truḥ ɣer uxxam n Lwiza, yekker yeqsed ultmas yellan deg uxxam-is, teqbel ad truḥ. Lwennas yefreḥ ɣas ma ulac yemma-s, meqqar yufa tin yellan ɣer yidisan-is. Lwiza si tama-s mi asen-d-tenna deg uxxam llan mgal zzwaǧ-agi, ladɣa yiwen n gma-s, maca nnan-as eǧǧ-it ad as-d-nwali ma yelha ayɣer ala ? Fkan-as ttiεad i wass n lexmis, uqbel ad d-yelḥeq wass-nni Malika akked Sekkura msefhament akken ur d-yettili ara rrwaḥ-agi n Lwennas ɣer uxxam n Lwiza. Malika tusa-d ɣer uxxam n Sekkura tensa, azekka-nni Sekkura tekra-d takerrust tenna-asen deg uxxam d Malika i yesεan cwiyya n ccɣel ad dduɣ yid-s acku ur tessin ara tamurt-agi. Ffɣent seg uxxam leḥqent ɣef lmɣreb, tsers-itent tkerrust-nni rrif n uxxam ad d-yuɣal azal n snat n tsaεtin. Mi wwtent di tewwurt yeffeɣ-d gma-s n Lwiza nnant-as : - D wagi i d axxam n Lwiza ? - D wagi ih ! Anti-kent ? - Ini-as kan ad d-teffeɣ neḥwaǧ-itt. Mi walant Lwiza la d-tleḥḥu mesmuqalent gar-asent, tenṭeq-d Malika : - Ziɣ tezyen ! - Susem mačči d lawan n yimeslayen-agi ? Mi d-telḥeq Lwiza ɣur-sent temsalam yid-sent tenna-asent : - Maca yiwet deg-kent ur tt-ssineɣ ara ? Tenṭeq Malika tenna-as : - Wali-yi-d kan ! Ulac akk uɣur i yi-t-cubaḍ ? Tenna-as Lwiza : - Ulac, yyamt tura kecmemt-d ɣer uxxam mačči dagi deg ubriḍ ara nehḍer medden la ttεeddin. Mi kecment ɣer uxxam ufant baba-s akked gma-s, tenṭeq Malika tenna-asen : - Surfet-aɣ ffɣet ɣer berra nesεa ameslay d Lwiza. Yemma-s n Lwiza qrib yeḥbes wul-is si lefqeε, tenna deg wul-is : amek ggrant akka tlemẓiyin-agi, kecment ɣer uxxam aberrani ssufɣent at uxxam ? Acu i bɣant ɣur yelli ? Iban mačči d ayen yelhan ? Banen wudmawen-nsent.

- 72 -



Mi yeffeɣ baba-s akked gma-s melba ma nudan ad fehmen, tenṭeq Malika ɣer Lwiza tenna-as : - Wali-d udem-iw ! Ulac uɣur i yi-tucbaḍ ? Wali-d milḥ allen-iw ? Ur iyi-tcubaḍ ara ɣer Lwennas ? - Win akken ara d-yasen ass n lexmis ad kem-yexḍeb. Tenna-as Lwiza : - Lεeslama, acu tebɣiḍ ɣur-i ? Terra-as Malika : - Ḥess-iyi-d cfu ɣef yimeslayen-agi ara am-d-iniɣ ! Kullec di ddunitagi iferru s wawal nnan-as at zik : awal i t-iferrun d awal, ad t-nefru kan s wawal ẓiḍen, s talwit mebla ccwal ! Bɣiɣ kan ad fehmeɣ amek argaz yexḍeb, kemm tkecmeḍ gar-asen tebḍiḍ-ten ? Terra-as Lwiza mebla tuggdi : - Uqbel ad d-truḥeḍ ɣur-i ad d-tiniḍ ayen ur teẓriḍ ara ilaq ahat thedreḍ akked gma-m i yi-yeṭṭafaren di yal amkan, ɣer taggara-agi ur d-yecliε ara ula seg yiwen rnu ur yuggad yiwen. Tenṭeq-d yemma-as : - Ruḥ a yelli ad kem-ihenni Rebbi, ula i wumi argaz n ccwal. Tezzi-d Malika ɣur-s tenna-as : - Ilaq ad iyi-tfeḥmeḍ a yemma, yelli-m-agi ur yeqqim ara yid-s, ur yeffiɣ ara wawal fell-as di taddart, tura nekkni ulamek ara nessemsex tilemẓit-agi ? Medden ẓran mi tettbedda yid-s di taddart, wama yelli-m tebεed. Terra-as yemma-s n Lwiza : - Ad isahel Rebbi fell-akkent, ruḥemt yelli texḍa i beṭṭu. Mi ffɣent wwḍent ɣer tewwurt n berra akken ad ruḥent tezzi-d Sekkura ɣer deffir tenna-as i yemma-s n Lwiza : - Tura aql-aɣ nusa-d s tiẓeḍt ɣer yelli-m-agi, ma tejbed iman-is ahayen, mulac tger afus-is ɣer uksi-ines, attih tugna-s ɣur-i ad twaliḍ acu ara as-xedmeɣ ! Mi tuẓ ɣur-s akken ad as-tt-id-tekkes tekka tawwurt teffeɣ, takerrust tuɣ la tettraǧu, send ad medlent tiwwura teddimari teǧǧad aɣebbar ɣer deffir, ǧǧant-d diɣen lḥir akked tuggdi ɣur yimawlan


- 73 -


n Lwiza, yesteqsayen ma sεant imawlan tlemẓiyin-agi i d-iruḥen ɣer uxxam ur ssinent ur ffiɣent armi i d-yeɣli yiḍ. Azekka-nni Malika tfuk ccɣel-is, tuɣal ɣer Qsenṭina, Lwennas mi yesla s wayen yeḍran yewhem ? Di tazwara mi iwala ultma-s tusa-d ɣer uxxam n Sekkura yenwa-as txaq truḥ-d ɣer tmurt n leqbayel ad tekkes lxiq, ur yeḥṣi ara ɣef uqerru-s i msefhament nettat akked Sekkura, ur yumin ara ultma-s n yemma-s d baba-s texdem aya deg-s. Send ad iruḥ ɣer uxxam ɣer Qsenṭina yehḍer akked Sekkura yenna-as : - Nekk ɣileɣ kullec bessif ar tayri mačči bessif, d tidet d axeddam ɣur baba-m, tesεam adrim maca ur iyi-tuɣem ara ? Ur bennuɣ ara axxam mebla llsas, lemmer i yi-tḥemmleḍ s wul zeddigen ad iyitεawneḍ ad leḥqeɣ ayen bɣiɣ, ad tebɣuḍ ad iyi-twaliḍ ferḥeɣ di ddunit-iw, mačči ad tt-thuddeḍ ayen ara bnuɣ acḥal n wagguren aya, kemm d yiwet tḥemmleḍ ḥala iman-im, tettwaliḍ ḥala ayen tebɣiḍ ad t-tleḥqeḍ s lxir neɣ bessif. Ihi atan ad ruḥeɣ, axeddim ad t-ǧǧeɣ, tanemmirt-nwen ɣef wayen i yi-txedmem. Tegzem-as Sekkura awal, tenna-as : - Xaṭi ! Ala axeddim ala ! Amek ara as-tiniḍ i baba netta iḥemmel-ik yefka laman deg-k. - Ini-as d kemm, yebɣa taqcict ferqeɣ-ten, ales-as ayen txedmeḍ akked ultma Malika. Iruḥ srid ɣer texxamt-is. Iḍ-nni ur yečči ara imensi, yekcem ɣer wussu, maca ur t-id-yusi ara yiḍes, iḍ kamel iḥesseb melmi ara yali wass. Tanzayt yeffeɣ seg uxxam yeṭṭef abrid ɣer Qsenṭina. Mi yewweḍ ɣer uxxam isawel i Malika, yennuɣ yid-s yessaweḍ yerfed afus-is ɣer-s yewwet-itt ɣas akken meqqret fell-as, rnu d nettat i tid-irebban, ikemmel yerẓa akk axxam, yesseɣli-d akk tiɣawsiwin yellan di lbifi ɣer tmurt, syin yekcem ɣer texxamt-is yemdel-d tawwurt yerra-tt ḥala i ukeyyef n dduxan, εeddant semmus n tsaεtin netta akken, yuɣal yeffeɣ, yeṭṭef abrid-is srid ɣer ttberna ɣas akken d amdan yettzallan, di leεmer-is ur yeswi ccrab, gma-s akked yessetma-s rǧan ad yuɣal, ulac, yekcem-iten lḥir, ur yennum ara ixeddem akka, iεedda uzgen n yiḍ ɣef lewhi n lweḥda, atan la d-

- 74 -



yekkat di tewwurt yettɣenni, mi as-yeldi gma-s tawwurt, yefqeε mi t-iwala di liḥala-nni, yeṣker armi ur yezmir ara ad ibedd, si ccna yuɣal la yettru am uqrur amecṭuḥ, ihedder yeqqar : - Anda-kem a yemma ? Lemmer telliḍ ad iyi-tesferḥeḍ d kemm ara yi-d-yinin anda tella tin tebɣiḍ ad n-ruḥeɣ ? Ini-d kan ? Cfiɣ mi i yiteqqareḍ lemmer kan ad idireɣ ad k-waliɣ s tmeṭṭut-ik, ad ṭṭfeɣ mmi-k neɣ yelli-k deg yirebbi ? Anda-kem ? Ass-a greɣ-d ɣer ultma ad txeddem lebɣi-ines deg-i ? Anda-kem a yemma ḥwaǧeɣ-kem ad tiliḍ ɣer tama-w ? Anda-kem ? Acuɣer i yi-teǧǧiḍ waḥd-i ? Acuɣer ur iyi-tewwiḍ ara yid-m ? Yuẓ gma-s ɣur-s yeṭṭef-it-id, yenna-as : - Dayen tura yemma-k temmut ad tt-yerḥem Rebbi, dayen tura imeṭṭi kker ad teṭṭseḍ. Yeṭṭef-as afus yewwi-t ɣer umeṭreḥ-is yekkes-as isebbaḍen idel-it. Ɛeddan kra n ussan baba-s n Sekkura yetqelleq amek akka Lwennas ur d-yuɣal ara ɣer uxeddim. Isawel-as-d ɣer wuṭṭun n usiwel n uxxam-nsen, mi as-d-yerra Lwennas yenna-as-d : - Amek akka i yi-teǧǧiḍ ? Anda zelgeɣ yid-k ? Teẓriḍ ḥemmleɣ-k am mmi ur ak-friɣ ara d warraw-iw. Yerra-as Lwennas : - Xaṭi a εemmi, cwiyya n ccɣel kan i sεiɣ daymi εṭṭleɣ, akka sin wussan ad d-uɣaleɣ. Mi i d-yuɣal ɣer tmurt, yessuter smaḥ seg baba-s n Sekkura, yuɣal ɣer uxeddim-ines, inuda daɣen amek ara d-yeḍleb smaḥ seg yimawlan n Lwiza ɣef wayen texdem ultma-s, maca yewεer-as wamek ? Yekker iruḥ ɣer wadeg n umahil anda txeddem Lwiza. Mi yelḥeq yufa aεessas ɣef tewwurt, yenna-as : - Bɣiɣ ad ẓreɣ Lwiza, ma ulac uɣilif ad as-tessiwleḍ ! - Ulac deg-s a mmi ad as-nedheɣ. Lwiza mi as-yenna yella win i kem-yeḥwaǧen, yewwet wul-is ur tennum ara steqsayen-d fell-as. Mi d telḥeq tufa-d Lwennas yugi ad tt-id-yali wawal, yenna-as : - Ẓriɣ terfiḍ ɣef wayen yeḍran, usiɣ-d ad am-d-sfehmeɣ tamsalt amek tella.


- 75 -


- Ur ḥwageɣ ara ad waliɣ amek tella temsalt ? Ruḥ, acuɣer i dtruḥeḍ ɣur-i, mačči d iɣeblan i xuṣṣeɣ ? Yenna-as : - Maεlic ! Aql-i ad ruḥeɣ maca ẓer yiwet n lḥaǧa ! Akken bɣun kecmen gar-aneɣ, ḥala kemm ara yilin d zzwaǧ-iw lemmer ad afgen ɣer yigenni. Mi i d-yuɣal Lwennas yemlal-d gma-s n Lwiza deg ubrid-is, yefhem ɣur ultma-s i d-iruḥ. Mi tameddit mi i inejmaεen s axxam, gma-s iruḥ srid ɣer Lwiza yeɣli fell-as s rregmat, yerfed afus-is ɣur-s maca ur tt-yewwit ara yenna-as : - Ula mi d-leḥqent yessetma-s ɣer uxxam ad am-qqarent bεed-as mazal ? Xḍu-kem a xir-am ? Taluft tkemmel tennerna gar Lwennas akked twacult n Lwiza mi yennuɣ Lwennas akked εemmi-s n Lwiza. Amennuɣ yebda-d garasen di tɣiwant mi yeḥbes Lwennas akamyun s ways ixeddem deg lari ansi rekkben medden ɣer tudrin, yuɣ lḥal εemmi-s n Lwiza Meqqran ixeddem s tkerrust i yettefrudi. Mi iruḥ Meqqran ɣer Lwennas yenna-as : - Kkes akamyun-ik s yagi, wagi d larri ! Mačči d amkan anda ttrusun yikumya ! Yerra-as Lwennas : - Ayɣer d kečč kan i d-ineṭqen ? I wiyaḍ acuɣer ssusmen akk ur zribeɣ ara abrid ? Meqqran yenna-as : - Wellah ar d rray ? Tusiḍ-d seg Qsenṭina ur neẓri d acu-k ad aɣtesteεmreḍ dagi ? Yerra-as Lwennas : - Ma d argaz mačči dagi di tɣiwant ar naweḍ ɣer taddart ad aksfehmeɣ Qsenṭina ansi i d-usiɣ d acu-tt. Meqqran yezwar, Lwennas yeṭṭafar deffir, gma-s n Lwiza icukk acu yellan, larwaḥ n Meqqran d ilem, d Lwennas yeṭṭafaren deffir mseqraben amek leḥḥun yukez, isawel i mmi-s n εemmi-s yeqqaras azzel ad ten-nelḥeq uqbel acu i d-iḍerrun !

- 76 -



Mi yelḥeq Lwennas d Meqqran ɣer yiwen akken n wadeg yeṭṭurref acemma ɣef taddart rsen-d, yenna-as Lwennas : - Ur teẓriḍ ara akken i tesεid azref di tɣiwant-agi i sεiɣ ula d nekk ? Tura ad twaliḍ acu-iyi ? Neɣ d anwa-yi ? Uqbel ad bdun amennuɣ yelḥeq-d mmi-s n Meqqran d gma-s n Lwiza, fran taluft. Yenna-as Lwennas i Meqqran : - Tesεiḍ zzher leḥqen-d ! Rnu lemmer mačči ɣef wudem n Lwiza d yelli-s n gma-k ad twaliḍ, usiɣ-d si Qsenṭina d acu-iyi ? Asali yelḥeq ɣur Ruza tameṭṭut n Meqqran, nnan-as atan waεrabnni yebɣa ad yenɣ argaz-im ? Ruza akken tesla tebda leεyaḍ truḥ srid ɣer Lwiza, amzun akken d nettat i tezzi ɣer baba-s n Lwiza, tenna-as : - Tura ad iyi-tawiḍ ɣer uxxam-nni anda yettili. Tenṭeq Lwiza ɣer baba-s : - Wellah lemmer ad tessuffɣeḍ takerrust seg ugaraǧ ma tufiḍ-iyi-d deg uxxam ! Amek ur teẓri ara amek i tella teswiεt ad truḥ ɣer uxxam ur tessineḍ ? Iṭij yefka-d ḥamu-ines Ruza texdem ayen yellan deg uqerru-s, ɣas akken tebεed taddart anda yella Lwennas truḥ ɣef uḍar. Mi tewweḍ tufa-t akken kan i d-yessekcem akamyun ɣer ugaraǧ, yers-d uqbel ad yenṭeq ɣur-s tenna-as : Mi d-tessuffɣeḍ akka leslaḥ ɣer urgaz-iw tebɣiḍ ad t-tenɣeḍ ? I warraw-iw i wumi ara d-qqimen ? Neɣ ahat d kečč ara ten-iεicen ? Uqbel ad kemmel awal, yerra-as : - Rǧu ! rǧu ! Anwa i am-yennan bɣiɣ ad t-nɣeɣ ? Acu n leslaḥ-agi s ways ara t-nɣeɣ ? - Lemmer ur d yelḥiq ara mmi di lawan atan tenɣiḍ-t ! Nnan-iyi-d anda tjemεeḍ leslaḥ-ik. Deg wawal-agi yecmumeḥ d taḍsa yenna-as : - Ad kem-id-yehdu Rebbi a yemma, nekk ur sεiɣ ara leslaḥ amkanagi anda i am-d-nnan srusuɣ deg-s leslaḥ aẓ-d ad twaliḍ, mačči d leslaḥ i jemεeɣ deg-s d tabewwaḍt n tesfifin n ccna, ur bɣiɣ ara ad nɣeɣ argaz-im ? Bɣiɣ kan ad as-sfehmeɣ ula d nekk mačči d aberrani ! Lejdud-iw d leqbayel, yemma akked baba ad ten-yerḥem


- 77 -


Rebbi ttmeslayen s teqbaylit, maca nekkni nekker-d akked waεraben daymi ur ssineɣ ara taqbaylit. Mi ifuk awal Ruza tḥar anda ara terr aqerru-s seg lḥecma ɣef wayen i as tenna. Tekker ad truḥ tezzi ɣer-s tenna-as : - Suref-iyi a mmi, mačči akka i yi-d-nnan fell-ak ! Suref-iyi. Syin akkin amennuɣ i d-yellan nwan akk d ayen Lwennas yejbed iman-is, ɣef Lwiza, ladɣa Sekkura i t-yebɣan tumer mačči d kra mi tesla. A ziɣen tibratin mazal xedment lecɣal gar-asen, imi Lwennas yal ass yettaru-as yeqqar-as amek i la teddunt temsal, Sekkura tennuɣna mi teẓra mazal-iten akken. Temsefham akked yemma-as ruḥent εussent-tt taṣebḥit deg ubriḍ ansi tettεeddi ḥebsent-tt-id nnant-as : - Kemm d yiwet ur tfehhmeḍ ara s wawal, ahat ad tfehmeḍ s uεekkaz. Kkrent-as s tyitwin, sseɣlint-tt ɣer tmurt kkatent, qqarent-as : - Atan Lwennas tebɣiḍ ! Newweḍ-d ɣer uxxam nenna-am bεed ! Kemm ur tḥesseḍ ara ! Tuɣ tiḍriḥ armi ur tezmir ara ad d-tenṭeq, ruḥent ǧǧant-tt s usεukkez i telḥeq ɣer uxeddim, mi tt-id-walan widen ukkud txeddem feqεen, uzzlen-d ɣur-s, wwin-tt ɣer umejjay. Maca Lwiza ur d-tenni ara anwa i as-igan akken. Mbεed tamsalt-agi n deqqat, Lwiza teεya deg yiɣeblan, yettzaden yal ass, temlal Lwennas tessefhem-as d awezɣi ad ilin akken, tenna-as diɣen, tiḥdayin llant, ad εeddin wussan ad iyi-tettuḍ, ass-a wwten-iyi nekk azekka kečč ad k-nɣen, nekk ad ḥebseɣ axeddim kra n wussan akken ad ttun medden tamsalt neɣ atan d nekkni ara xedmen d ccɣel. Lwennas yerǧa lexbar ulac, yuɣal ad la as-yettaru tibratin ad tent-yazen deg lbusṭa, mi leḥqent s axxam, Lwiza tettnaɣ-itt twacult-is fell-asent. Yiwet gar tebratin-nni teɣli-d gar yifassen n mmi-s n εemmi-s, yeldi-tt yeɣra-tt, yebda uẓafen d rregmat ! Yettmeslay weḥd-s weḥd-s : Amek akka amdan-agi ur yesεi ara aḥkim ? Rnu yefka-as ttiεad ad mlilen ! Mmi-s n εemmi-s uqbel ad iẓer Lwiza ur tettruḥu ara ɣer uxeddim, yessaweḍ lexbar i εmum-s akken ma llan yennaasen yelli-s n gma-twen attan ad temlil d waεrab-nni.

- 78 -



Ɛmum-s ur bɣin ara, nnejmaεen nnan-as taqcict-agi ilaq ad as-nerr tilas, mulac ad d-tawi lεar i twacult-nneɣ. Mi ruḥen, dduklen akken ad heḍren akked baba-s n Lwiza netta yerfa ɣef watmaten-is yennaasen : - Amek yelli deg uxxam, acḥal aya ur teffiɣ ? Kunwi ad d-snulfum ayen ur nelli deg-s... Ffɣet-iyi seg uxxam-iw, yal yiwen ad iεass ayen yesεa, nekk ẓriɣ acu rebbaɣ, fiḥel ma teshelkem iman-nwen. Ma d Lwiza terra-tt ḥala i yimeṭṭi ɣef wayen ur texdim ara. Ɛmumis ffɣen, baba-s iruḥ yekcem ɣer Lwiza yenna-as : - Ur ttaggad a yelli ayen akk mazal-iyi deg ddunit ur yezmir yiwen ad kem-yennal s wayen n dir. Sekkura segmi akken ur tufi ara Lwiza tuɣal teggul anda tedda ad thedder ḥala ayen n dir, tufa abrid i lekdeb, teqqar Lwennas mačči si Rebbi i yebɣa Lwiza d ssḥer i as-texdem nufa-t deg ukamyun-nni yettnahar, nufa wayeḍ di tsumta iɣef yeggan, rnu nruḥ ɣer tderwict newwi tugna-s tenna-aɣ-d d tagi i t-ibeddlen fell-am tuɣ yella yebɣakem, yenwa zzwaǧ yid-m, tura atan temlek-it s ssḥer i as-texdem. D wigi i d-imeslayen i teḥḍer ladɣa deg ṭṭbib, maca din kan ad ilint tid ara yessiwḍen awal ɣer Lwiza. D tidet uɣalen medden la ttmeslayen ḥala ɣef Lwiza d ssḥer, ur uminen ara acu i tettmeslay qqaren-as : ahat d tidet texdem-as lḥerz deg ukamyn ! I tsumta anda i tt-tufa tga-as-t ? Ur tettmeyyiz ara mi thedder. Ma d Lwennas yettidir ussan iberkanen, win yesteqsa ɣef Lwiza ad as-d-yini ur tt-ẓriɣ-ara, ziɣen tbeddel tamezduɣt nettat akked twacult-is ɣer temnaḍt nniḍen, yiwen ur yessin tansa, maca netta ɣef Lwiza i yeqqim di taddart, mi truḥ, iruḥ ula d netta. Send ad iruḥ yeǧǧa lewṣaya ɣur yiwen, ḥala winna i tuɣ yettemsefham yid-s yenna-as : - Nekk aql-i ad ruḥeɣ, tuɣalin ɣer da dayen ! Lwiza ur ẓriɣ anda-tt ad ak-d-ǧǧeɣ uṭṭun n usiwel n uxxam di Qsenṭina ma yella anda i tt-id-temmuggreḍ di leεnaya-k ini-as ad iyi-d-tessiwel. Dayen i as-yenna i yeḍran, yiwen wass la ileḥḥu deg ubrid yemlalitt-id la tleḥḥu yegzem-as abrid, yenna-as : - Ḥemdullah mi d-tbaneḍ ? Ur ttafqaε ara ! Nekk d ameddakel n Lwennas ! Acḥal inuda fell-am tura atan yeǧǧa taddart-nni !


- 79 -


Atah wuṭṭun n usiwel n uxxam-nsen, yenna-am di leεnaya-am siwel-d. - Uṭṭun-agi ad teṭṭfeɣ maca ɣur-k ad as-tinid acu n wadeg anda i yid-temlaleḍ. Mi teṭṭef uṭṭun-nni teqqim acḥal d ass nettat tettxemmim ma ad tsiwel neɣ ala ! Tuɣal tenna ilaq ad siwleɣ ad as-iniɣ ad iyi-yettu, ad inadi ɣef lmektub-is si tama nniḍen. Mi d-teffeɣ seg uxeddim tekcem ɣer tilifun, mi tsawel yerra-as-d urgaz tenna-as : - Alu ! Azul a Lwennas ! amek telliḍ ? Nekk d Lwiza ! - Ṣaba, amek ihi melmi ara nemlil ? Deg wawal-agi Lwiza yekcem-itt lḥir ! Amek gan akka yimeslayenagi ? - Kečč mačči d Lwennas sεeddi-d Lwennas ? - Nekk d Lwennas ! Ddqiqa kan ?... amek ihi ? ṣafi ad nemsefraq ? Deg wawal-agi tenna-as : - Wellah kečč mačči d Lwennas ! - Wellah ar d Lwennas ! - Acu yuɣen akka taɣuct-ik la d-tettban amzun d amɣar n 70 n yiseggasen. - D nekk uḍneɣ cituḥ taɣuct-iw, yerna barka zzyada n wawal ? Akken truḥ ad tehḍer yenna-as : - Kemm mačči d yelli-s n tfamilt, acku yelli-s n tfamilt ur tettekkes ara argaz i tmeṭṭut i wakken ad t-taɣ bessif, rnu ataya ṭṭfeɣ asiwelagi d wayen akk i d-temeslayeḍ ad t-id-awiɣ i baba-m d watmatenim d ttebyin d kemm i la yettnadin ɣef Lwennas wali mbaεd amek ara tsellkeḍ iman-im ? Ziɣen d gma-s ameqqran n Lwennas di leεmer d-iruḥ ɣer tmurt, yekreh Lwiza yettwali d nettat i d ssebba n ccwal deg uxxam nsen. Lwiza ur teṭṭif ara iman-is ladɣa mi as-d-yenna kemm mačči d yellis n tfamilt tenna-as : - D kečč i mačči d mmi-s n tfamilt mačči d nekk rnu ayen i wumi tzemreḍ xdem-it ? Imawlan-iw ḥṣan akk s wayen yeḍran fiḥel ma tewwiḍ-asen-d tasfift-nni anda i teṭṭfeḍ asiwel-agi ! - Simɣer kan taqemmuct-im yid-i waqil ur teẓriḍ ara d acu-iyi ?

- 80 -



Tegzem-as awal tenna-as : - D acu-k d Rebbi wis sin ? Nekk ttaggadeɣ ḥala Rebbi. - Nekk d kumiṣar, zemreɣ i kullec, zemreɣ ad d-awiɣ ula d baba-am ɣer lḥebs. Deg wawal-agi tsers tilifun-nni teffeɣ-d tleḥḥu thedder d yiman-is: Acu i yi-yewwin tura ad siwleɣ ? Tikkelt-a d nekk i iruḥen ɣer lhemm s uḍar-iw, i tura amek ara xedmeɣ ? Lemmer d tidet ad yexdemd ayen i d-yenna ? Dɣa temlal-d aṭaksifun nniḍen tekcem akken ad as-tεiwed ad as-tini, nettat akked Lwennas dayen, akken diɣen ad tessuter smaḥ mi tsawel ! Mi txeddem uṭṭun-nni i wakken ad as-t-siwel ul-is la yekkat yebɣa ad d-yeffeɣ si tuggdi, akken yerfed tenna-as : - Bɣiɣ ad ak-d-iniɣ suref-iyi ur ttalseɣ ara ad d-siwleɣ ! Yegzem as awal, yenna-as : - Acu i kem-yuɣen akka a Lwiza, ur ttaggad ? Deg wawal-agi teṭṭerḍeq d imeṭṭi teεqel-it d Lwennas tenna-as : - Uggaddeɣ teẓriḍ acu i d-yenna gma-k neɣ ala ? - Nniɣ-am ur ttaggad aql-i ɣer tama-m, ur yezmir ad yexden acemma, ad kem-yessaggad kan ? Nekk mazal ḥemmleɣ-kem ! Ḥemmleɣ-kem ! - Di leεnaya-k mačči d lawan n tayri, sefhem-as i gma-k tbeddleḍ tamuɣli-ik ɣer-i, i wakken ad iyi-yeǧǧ trankil, nekk atan ttuxeḍbeɣ, ǧǧet-iyi ad idireɣ tuddert-iw ur ttεeṭṭileɣ ara ad dduɣ d tislit. Tenna-as d ass n tmeɣra d waniɣer ara teddu tsers tilifun. Nettat tenna-as akken ad tt-yettu dayen. Lwennas yezza, yerɣa, yettmeslay wehd-s : amek ayen akk uzzleɣ ass-a ad d-isaḥ i wayeḍ ? Acḥal n ccḥani i εebbaɣ tura ad tt-yawi wayeḍ ? Ala ur qebbleɣ ara annect-a. Ad yefreḥ uεdaw ad yecḍeḥ ladɣa Sekkura ? D awezɣi ad d-yeḍru waya. Am yiḍ am uzal d axemmem, tikwal yeqqar-as-d uqerru-s ahat tenna-d akken i wakken kan ad tt-ttuɣ ilaq-iyi-d ad ruḥeɣ ɣer taddart-nni uɣur i d-tenna ad tezweǧ ad steqsiɣ ma d tidet ayen i dtenna. Mi iruḥ yesteqsa yufa d tidet ad tezweǧ, din ikemmel asteqsi yewwi-d anwa-t, melmi i d tameɣra. Seg yimiren yerra-tt ḥala i


- 81 -


ccrab akked lkif, taguni di lexlawi. Mi d telḥeq tmeɣra, iruḥ iεuss si lebεid, yettwali deg yimeεraḍen amek ferḥen, yettru ihedder wehd-s yeqqar : a yemma anda telliḍ ? Acu i yi-d-yeggran tura ? Kemm i εzizen truḥeḍ teǧǧiḍ-iyi, ass-a lferḥ-iw iṣaḥ-d i wayeḍ ! Taqcict ssarmeɣ azekka ad tteddu d tislit, i wumi ara d-ggriɣ tura ? Acu ara xedmeɣ di ddunit-agi ? Mi d lawan ad yeqqen yisli lḥenni yuẓ ɣer tejmaεt yejbed-d lmus iruḥ srid ɣer yisli yewwet-it si deffir yeɣli ɣur-s, la yettru yeqqar-as : - D kečč i yebɣan akka ? D kečč ! Ulac akk tullas armi truḥeḍ ɣer Lwiza i ssarmeɣ ? Acuɣer ? Isli yexnunes deg yidammen, yekker leεyaḍ, uɣalent teɣratin d imeǧǧiden ! Tuɣal teḍṣa d imeṭṭi ! Refden isli ɣer sbiṭar wissen ma ad yidir neɣ ad yemmet ? Lwennas yeqqim di tmurt yettru, wwḍen-d yibulisiyen refden-t, ma d Lwiza mi tt-yelḥeq lexbar teɣli tefsex, refden-tt ula d nettat ɣer sbiṭar, mi d tuki teggugem ur tneṭṭeq-ara.

- 82 -


Akured OUSSANE

«

Ṣaḥḥa a Rebbi ṣaḥḥa, armi d lεaṣer ara nehreɣ ulli s axxam ! ufan ur d-yettedden ara ccix, ad yaḍen lebεid- Mḥend ad yens dagi deg uzaɣar ! ṣaḥḥa a Rebbi ṣaḥḥa ! amek dɣa ?… d wa i d rray ? aɣ awal neɣ εeddi ad teqqimeḍ !… ula d iṭij ulac-it, ass-agi yuqqem-d i yiman-is asigna inna, ur ẓriɣ anda yewweḍ lḥal. Cukkeɣ ad awḍeɣ kan ad d-ssenseɣ taqerract-iw, ifat lawan n wurar tura. Mi ara tturareɣ… ddabex, d acerreg ! ferrḥeɣ nezzeh, ttettuɣ ayen iεddan d wayen i d-yetteddun, siwa anda akken i lliɣ kan. Deg unnar ! Ur ẓriɣ ara ma yella ferrḥeɣ imi ttettuɣ lḥif, neɣ ttettuɣ-t imi ferrḥeɣ mi tturareɣ... lḥaṣun ddabex ḥṣiɣ ḥemmleɣ-t, mmuteɣ fellas. Ass ideg ur leɛεbeɣ ara, ula d azekka-nni ur ttiliɣ ara di lehna, tenna-yi-t-id ula d yemma : akured, ma yella ur yentig ad yemmet. Nekk am netta. Ferrḥeɣ imi ttettuɣ ayen yezrin. Leɣbayen-iw : ttettuɣ nekk d awḥid, ur sεiɣ yiwen ɣer tama-w, siwa yemma d setti, cukkeɣ qrib tura ad temmet. D tamɣart meskint. Ttettuɣ wid i yi-yekkaten, wid i yiireggmen, wid i yi-yeskanen s uḍad : d mmi-s n umjaḥ, ttettuɣ belli kesseɣ yal ass, yerna weḥd-i kan ! ttettuɣ amek sεeddayeɣ lεid s yiceṭṭiḍen iqdimen, ttettuɣ... ula d tafukt. D agujil baba yella ! Ferrḥeɣ imi ttettuɣ ayen i yi-yeggunin. Lmeḥna: ttettuɣ ayen iɣef yi-tettweṣṣi yemma yal iḍ : ayen i yiilaqen ad t-xedmeɣ akken ad kkseɣ lḥif ɣef twacult iw, akken ad dTamaziɣt tura – Un 11 – H.C.A / yebrir 2013

- 83 -


rreɣ ttar-iw, ttettuɣ simmal la tettzeyir fell-i, ttettuɣ ilaq ad nneεtabeɣ asmi ara imɣureɣ, ttettuɣ qrib ur mazal ad urareɣ ddabex, d ixeddim kan ! a nnger-iw ! ttettuɣ... ad i yi-bdun yiɣeblan d ameẓyan, ttettuɣ ilaq ad iliɣ d argaz am jeddi mačči am baba ! Ttettuɣ kullci, ttmektiɣ-d kan acḥal teffeɣ temlilit, ma nerbeḥ neɣ nexṣer, anwa i aɣ-d-yemmarkan ? anwa i asen-yemmarkan ? Kerheɣ mi ara yeṭṭef uxṣim ddabex, ammer i yi-ttεedday d iswi ad iyistixxren : qewwed ɣer berra imi d kečč ara d-iεassen ! Tikwal qqareɣ-as ilaq ad d-awiɣ iswi ɣas akka d aεessas, akken «ahat» ad iyiḥemmlen, ad iyi-ǧǧen ad urareɣ, ad ferḥeɣ, ad ttuɣ, yal ass. Di taddart-nneɣ d nekkni s warrac kan i yetturaren ddabex ! wid umi ur ttagin ibabaten-nsen -ulac aqcic iɣef tettḍebbir yemma-as siwa nekk- kra ɣef ccɣel-nsen (Ama teǧǧen), kra ɣef txeṣṣarin i diḍerrun, am yimenɣi (Tikwal taluft gar sin tettaweḍ ɣer twaculin gar tid ur neεdil ara yakan treggi maḍi !) llan wiyaḍ kan akka : ttqejqujen mi walan ddabex ! ma d ilemẓiyen d isbaysiyen, qlilet twafit ɣer-sen, yerna cwiṭ d lεib, qqaren : amɣar am kečč mazal-ik akked ddabex !… Ah win ara yi-d-yeslen akka ttmeslayeɣ weḥd-i ad as-yini yemxel uqcic inna ! Maεlic, ameḥbus neɣ ameksa am nekk ssextir-iyi ur ttawiɣ ara… Meḥsub, iḍelli εeṭṭleɣ cwiṭ -imi i yi-tceyyeε yemma ɣer tḥanut- ur lεibeɣ ara ddabex ula d ddqiqa, tikkelt-a diɣ, akka i d-truḥ, waqil kifkif. Arraw n leḥram. Ma yella ur telḥiqeḍ ara zik ɣer unnar ur kid-sekkin ara, tikwal ɣas telliḍ mi ara bḍun, wissen, ɣer leḥsab n wakken tgiḍ : ma tessneḍ ad turareḍ, melmi i k-yehwa aweḍ (Ad nnaɣen fell-ak anwa ara k-yawin ɣur-s) ma tettnaɣeḍ mliḥ terniḍten akk, ɣur-k ddreε, ma tesεiḍ aṭas n watmaten ɣas ulac-iten dinna (Ttaggaden ad asen-tiniḍ ḥeqren-iyi) neɣ meqqar ad d-tṣebḥeḍ tzeyneḍ (Ḥemmlen arrac !) axaṭer wid i yettḍebbiren d iɣyal-nni imeqqranen, ufan meqqar snen nutni ! D arraw n leḥram acki d Muḥ Waɛli, melmi kan i t-walan ad rewlen am tyuẓaḍ ɣef wuccen ! Mačči am nekk ur swiɣ acemma : ur ssineɣ, ur ǧhideɣ, aql-i annect n uεeqqa n ubelluḍ, d anṭaw kan i ssneɣ armi i yi-semman akured ur yelli kra n gma, ula d baba tewwi-t

- 84 -



Fransa, lemmer i d-yettas yal anebdu, ad iyi-d-yawi ddabex, xarṣum ad iyi-sselεaben imi t-sεiɣ am «laẓmatik» n at Sεid yezgan d taḥeqqart deg-i… Asmi ara imɣureɣ ad iwali, teḥrem yemma-s a… yiɣil ad ttuɣ ! ula d ccbaḥa ur cbiḥeɣ maca ma yella, alamma s wakken ad ruḥen ad fk… Ayhuh ! ruḥeɣ deg-sent, armi ttuɣ lmaliw, anda yella diɣ izimer-nni amecṭuḥ ? - Wehmeɣ anda akka i telliḍ ! anda akka i telliḍ ? ziɣen di leḥcic-nni i d-ḥucceɣ i yemma-k… Ṭeẓ teẓ, imi d kečč i d izimer ! ulac akk anda ara teṭṭseḍ ?... Neɣ ṭṭes ṭṭes a mimmi, rǧu ad ak-kemzeɣ ciṭuḥ… ih, ttuh, ttuh, mmeḥ… yenɣa-k εni usemmiḍ ? tesεiḍ lḥeqq yesɣemɣem-d lḥal ass-agi, ṭṭes ay arumi-inu, ameεna asmi ara timɣureḍ ur iyi-kkat ara, yah, nekk yid-k d imedduk… - Baaaε... baaaε… - Sbebeε-d din ihi kemm, yeffeɣ-ikem leεqel, tɣileḍ ad am-t-ččeɣ ! tebra yemma-m a laẓ. Acḥal kerheɣ yemma-k inna, ur as-teqqareḍ ara d nettat i k-idyeǧǧan, attan am sidna Yub ! banen-d akk yiɣsan-is, ufan ad tttekseḍ ula deg wayla n ccix ur d-tṛewwu ara ! ad tɣileḍ a… amzun i laẓ i tettɣimi. Degmi tebda lagrif, azal n xemsa n wagguren aya, di leεmer ur teffiɣ, tezga teksa... D acu-tt lagrif-agi ? D iẓẓan !... Ala, ala, ur reffu ara ay ameddakel, ẓriɣ belli ur tessineḍ ara. Kunwi s wakraren ur txeddmem kra, tettεassam kan učči, am arezg-nwen, ccetla-nwen akka ! mačči am nekkni s yimdanen nettucebbel : ilaq ad nečč, ad nels, ad nurar ddabex, ad nendi… yerna ad nɣer. S leqraya-agi n lḥif -akken i as-teqqar setti- i d-tebda : nruḥ ṣṣbeḥ ɣer lakul, nɣil dayen kfan yimuras n unebdu, wid yesεan timeddukal ferḥen akk, laẓmatik yezga akked yiwwet n tsedda, d lucayer n zzman a mimmi ! ih, netta yettlus ala lqecc n Fransa ! ma d wid… ula d nekk ferḥeɣ, maca akken ad ǧǧeɣ cwiṭ yemma-k inna, imiren ur εad i d-tluleḍ… ihiiih, aṭas aya tura, kečč ad ineṣṣef waggur-agi n yennayer, di leεmer-ik tnac n wussan… ihih… i nekk ? nekk assnni ideg tluleḍ i semdeɣ tleṭṭac n yiseggasen, ah ah, yiwen umulineɣ ! mmeḥ… tesfaqeḍ-iyi-d... imi tenniḍ, akken nekcem, qeεdenaɣ d leṣfuf (Mačči am kunwi), nerǧa ulac, nerǧa ulac -am lεada-


- 85 -


anwa i d ccix-nneɣ amezwaru ara d-yasen ad aɣ-yawi, armi kan i aɣd-jemεen akk, yuli ddiriktur ɣef ukersiw… yebda-d s Tefransist ! newhem, axaṭer yezga s Taεrabt i yettmeslay, yuɣal daɣen ciṭuḥ s Teqbaylit ciṭuḥ s Tmaziɣt… D acu-tt Tmaziɣt-agi ?… Nnan-d fellas i d-tekker, d tameslayt-nneɣ n zik i aɣ-d-nnan, ah… s Tmaziɣt, diriktur, qqaren as : anemhal… Tfehmeḍ tura ? anda akken i dnessaweḍ ?... ah, ah, dɣa yenna-aɣ-d ihi -ass-agi ad ak-sḥefḍeɣ Tamaziɣt ula d kečč- : ruḥet, ur d-ttuɣalet ara ḥacama nessawel awen-d !, dɣa seg yimiren ur d-sawlen, ur nuɣal. Seg wass-nni ar ass-a nekk ur steεfaɣ… Takessawt kan, baqi ccmata inna i k-id-yurwen ar tt-ṣeḥu ala, rniɣ ala leεtab : takessawt si ṣṣbeḥ alamma d tameddit… Atan dɣa mmektaɣ-d ccix-nni n… yeggumma akk ad d-yedden ass-agi ! akken ad nehreɣ ulli-agi n yiẓẓan… cukkeɣ iṭij qrib ad yeɣli netta… xeẓẓet ! waqil ur yebɣi ara ad nelεeb ddabex ass-agi, ad εeddiɣ akka ad ruḥeɣ, ad rreɣ iman-iw d lawan… awah xaṭi, mulac ad teggal yemma ur iyi-d-tettak ara diɣen taqerract-nni-inu ad iyi-d-tini : imi akka, telzem-iyi tkeffart ma tsenseḍ-tt-id, ma turareḍ ddabex, tameddit-agi yerna ad d-taweḍ setti-k ad tt-tsel. Xeẓẓeṭ ! rǧu meqqar rǧu. Taẓabrit-iw mazal-itt, skud ur tt-yufi ḥedd labas, ad εeddiɣ ad «ad ḍeqqreɣ amcic ɣer lebṣel» mulac sya ar lεaṣer ad nnecweɣ ! cwi imi tella. Acu-tt tagi ? Ḥader ad iyi-d ttebεeḍ ! aql-i nniɣ-ak… neɣ ammer anda tettεawadeḍ ɣas ma d imeddukal-ik ! (Dagi rwiɣ-tt maḍi !) ah, akka i d tudert, tetteddu s yirfiqen ! Aql-i ruḥeɣ ihi… - Mmaaε, mmaaaε… - Ttebεeḍ-iyi-d yerna nniɣ-ak balak ! ah ya jedd-nni n yemma-k ah. Yya, kemmel-d ur ttɣimi ara dinna i teεrurt ameɣ tinna. Kečč d lefḥel… am nekk ? ṣaḥḥa ṣaḥ, nekk yid-k wi… Amek ur tuggadeḍ ad d-yeffeɣ wuccen seg yiɣẓer am wagi ?! d itercucen ay ameddakel! lemmer mačči d taεzizt i d-yettasen, weḥd-i ur zmireɣ ara ad qqimeɣ daxel-agi : ttewḥaceɣ at ičumar ! nnan-d zellun ula d imeksawen taggara-agi ! Amek ? Aah ! d tidet, d tidet, nniɣ-ak-d yakan ur sεiɣ ara tamedd… Maca cceeet ! siwa kečč i yeẓran, fell-ak

- 86 -



kan i ttekleɣ, akka ? tura ad ak-d-mleɣ qbel d acu-tt tzabrit, syin ad d-naweḍ ɣer tafukt, akka ? attan ihi. Tazabrit-iw d taεecciwt-agi sdat-k, am treɣlet tasellawt : aεenqud-is neɣ ajgu alemmas d lǧedra n tẓebbujt-agi, ssqef-is atan ẓḍiɣ-t akk s tṣeḍwa-as -yettqerriε ula d abruri ! iɣuraf-is d lecḍuḍ-agi i d-ṣubbeɣ armi d lqaεa (Akken ɣas iqerreb-d yiwen ur aɣ-d-yettwali mi ara tili tafukt...) ma d ṭṭwiqan ulac ! yif-it akka, neɣ ? imi tenniḍ, akka tẓerreḍ : bḍiɣ-tt ɣef sin, tama ufella d ussu, tama n wadda d tamejjirit. - Acu tenniḍ ? telha ? - Maaε… - Awah, ẓriɣ ad k-teεǧeb, lameεna ha, ammer anwa i isellen yis-s ! Ma taεzizt ffreɣ akk ɣef yimeddukal mačči siwa fell-ak... - Maaε… - Acu daɣen i tebɣiḍ ? Ah, ah, dayen fehmeɣ-k. D ṣṣeḥ ! d ṣṣeḥ ! diri lekdeb, maca diri tasusmi, tikwal, axaṭer d win yettmeslayen i yeskiddiben, i d-yeqqaren tidet, neɣ ala ? asusam ulac lekdeb ulac tidet… Lḥaṣun win i yi-yecban, win yezgan yessusum yif-t win iheddren kan ɣas ma ṭṭbel ! meqqar melmi i as-tfaqeḍ dayen : ad dteqqareḍ di lekdubat-is tidet... Ih amek ih ? ula d kečč ziɣen ! akka ulac i wumi nniɣ, yerna wissen ma ur isell ara baba-s ! Di ccetla-nwen ulac tayri ! am ddabex, tikwal mi ara tiliḍ berra n unnar ad as-teqqareḍ : ufan d nekk ! melmi tkecmeḍ, ulac ! ama ad d-tɣileḍ d aqeṣṣer. Tura ad ak-d-iniɣ akk ayen yellan, nekk mačči d asusam. Yiwen wass, mi d-neffeɣ si lakul, nekk d yirfiqen, nettat tezga d taneggarut deg ubrid -ziɣen akken yiwen ur tt-yettlaεi, nekk ɣileɣ fell-i, tettraǧu ad d-neddukel yerna ulac anwa ara aɣ-d-iwalin- rriɣ iman-iw ttuɣ tabernust-iw, uɣaleɣ zaεma ad tt-id-awiɣ, nekk tebεeɣtt-id deffir, nniɣ-as tura ad as-mmeslayeɣ ula d nettat ad tefreḥ. Bdant ttergigint tgecrar-iw -ula tura mi ak-d-ḥekkuɣ, ɣas akka yid-k i lliɣ- ul-iw yekkat, yeεbel ad d-yeffeɣ, aqerru-w icuff : ḥmiɣ akk, ɣileɣ ad mmteɣ ass-nni.


- 87 -


Tafat takemlant : tafukt tettkemmil abrid-is akked snat n tmeddukal-is, rrant-tt di tlemmast telsa-d taksiwt teččur d tisfifin, d tazeggaɣt, tesburr tabernust n umezlug d tacebḥant yettban-d uḍaris d acebḥan d ačuran (Amek ur teṭṭeqqireḍ ara amcic… ay amdan?) tisebbaḍin-is, aḥeq Rebbi ar ttuɣ amek gant : tamuɣli-w tenqes imir-nni ! ttwaliɣ-tt kan ɣer wudem : tiḥnakin-is d timduwrin, d tizeggaɣin am yisisnu, acebbub-is d awraɣ am ddheb, tettserriḥ-as ɣef tuyat-is. Ḥemmleɣ, mi ara tbedd, ad terfed ifassen-is s igenni, ad t-cudd ɣer deffir s uǧermuq d aberkan, aqrab-is gar yiḍarren-is, taqendurt-nni teḥmeẓ taɣmiwin-is : ttbanen-d yidmaren-is ɣer sdat annect n ddabex ! allen-is d tiberkanin am uzemmur, ifent tid n uzrem… lqedd ɣelbeɣ-tt kan ciṭ (Amek ur tt-tettaεcaqeḍ ara ay amdan ?) D lmina n uẓarif ay ameddakel. Neṭqeɣ-d : A tafukt ! nettat aqqerru-s di tmurt, rǧiɣ ad d-tezzi, ulac! terna-d tirgigit fell-i, maca nniɣ-as tessetḥa imi d tikkelt tamezwarut, rniɣ-d tabɣest : Tafukt rǧu ah, ḥazent-tt tmeddukal-is ɣer rrif, walaɣ yiwet mi tt-tdegger s tayet-is, s teḍsa, amek akken ad as-teqqar : rǧu-t, rǧiɣ, rǧiɣ, dɣa nniɣ-as : A tafu…, ur εad i d-fukkeɣ awal, tdewwer-d ɣur-i, udem-is d azeggaɣ, walaɣ allen-is am lebḥer, mmuteɣ si lferḥ akked tuggdi, s wayen yellan di taɣect-is, cukkeɣ slan-d ula d iεeẓẓugen ! : belleε ! seg yimir-nni armi i d-wwḍeɣ s axxam ma nniɣ-ak ẓriɣ ansi i d-kkiɣ skaddbeɣ. Ur ẓriɣ ma d tuggdi i tuggad ad aɣ-d-ẓren wiyaḍ, ad isell baba-s, neɣ d lebɣi ur iyi-tebɣi ara, axaṭer tamuɣli-s tezga fell-i, anda ddiɣ ad iyi-d-tmuqel ! cfiɣ yiwen wass yeɣli-yi lkaɣeḍ, walaɣ-tt mi tterfed, tɣil d tabrat. - Maaε… Acu ?... aah, tebɣiḍ ad d-teẓreḍ acu i as-rniɣ imi i yi-d-terra akken ? nniɣ-as akk ayen akken tebɣiḍ ad as-tiniḍ ufan d kečč : regmeɣ-tt, susfeɣ-tt, fkiɣ-as abeqqa… kkes-d ayen ur as-nniɣ, lameεna awal mačči tesla-as-d… acuɣer ? axaṭer «bellεeɣ !»… Ɣef waya i ffreɣ fell-ak. Ilaq ur iẓer ḥedd, ammer ad yeḥṣu baba-s d lmut-nneɣ i sin : nettat ad tt-id-yestixxer si lakul, nekk ad ṛwuɣ

- 88 -



tiɣrit, yerna ur sεiɣ amḥaddi, twalaḍ ?... Ayen akk akka i ak-d-ḥkiɣ ass-agi lliɣ ttmeslayeɣ-t-id yid-s, daxel n tzabrit-agi uqbel ad dtlaleḍ, yid-s kan i ttɣimiɣ, tettwanas-iyi, ma d tura aql-aɣ di tlata : am arezg-iw ur kesseɣ ara weḥd-i tura ! Melmi bɣiɣ ad tt-waliɣ, ad d-ruḥeɣ ɣer daxel-agi ad qqimeɣ di tussut inna, ad qqneɣ iẓri-w, nettat ad d-tekcem, tettlusu-d lqecc iyi-yehwan, teqqar-iyi-d imeslayen i ḥemmleɣ, nekk daɣen tsell-d i wayen i as-heddreɣ mebla leḥya neɣ tuggdi, acḥal nettaḍsa, nessefruy, ncennu, nceṭṭeḥ… nxeddem yal cci, di leεmer kan i nennuɣ : netteddu afus deg ufus di lebḥer, di temdint n Tizi Uzzu, acḥal n yiberdan i nruḥ ɣer Tala Ggilef, nečča-d di rrasṭura, nensa di lutil… Ah ya mmi ! akken d imi ara dubeɣ si lexyal-is, ad d-refdeɣ amcic armi yuɣal am yixef n nceṭṭiḍt ara ffɣeɣ sya, tikwal ttafeɣ yemma-k teṭṭes -s tadisttikwal ttafeɣ-tt deg yibawen-nni n ccix -seldiḍelli kan ččiɣ aεekkaz fell-as- akka yal ass, siwa ma yedden lεaṣer. - Allaaaahu wakbar, allaaaahu wakb… Atan dɣa la yettedden, tesliḍ ay ameddakel… d tazzla s axxam, tanalt ala, ɣer unnar srid. Aya iεeddan uqbel ad d-awḍeɣ s aḥriq-agi n tmuḥuct, yettban-iyi-d unnar yeččur d igerdan, ttazzalen sya wesya, ass-agi atan deg-s ala tagrawt di tlemmast, cukkeɣ d beṭṭu i la beṭṭun neɣ d imenɣi i yekkren ad kemmleɣ kan akka s tazzla ɣas εyiɣ, waqila ad leḥqeɣ amkan-iw mačči am yiḍelli… - Azzel ay akured, azzzzzel… ixuṣṣ-aɣ uεessas, ɣiwel, ɣiweeel, ad tessikid ɣur-i… - Mselxir fell-awen, ukt, mmuteɣ... seg uxxam armi d dagi ur ḥbiseɣ ara, yeffeɣ-d wul-iw… ilaq… - Ulac «ilaq», barka ! εass-aɣ-d tessusmeḍ, yerna teẓriḍ, ufan ad aɣɣelben, ur mazal ara ad tturareḍ ɣur-neɣ, tesliḍ neɣ s Muh ? Nekk d laẓmatik, tessneḍ-iyi mliḥ amek giɣ, ur ttezziɣ ara deg wawal. Aqlaɣ ihi nebda, εass iman-ik. «Tebra yemma-k, ufan am kečč, ɣas ad d-ṭṭfeɣ izem s ufus, wissen d acu ara d-tiniḍ !... tezgiḍ tessekraseḍ tabraḥt, ala nekk i tettεassaḍ,


- 89 -


ad tɣileḍ d kečč i yi-d-yettaǧwen ayen ttetteɣ, neɣ ahat nɣiɣ-ak baba-k ay aɣyu…» - Acu i testemtumeḍ din weḥd-k, yya weyya-k ! ur ak-d-rennuɣ ara lmenṭeq… - Rwalu ! rwalu !… Muḥ Waɛli s tqabact ! yezga yettgalla deg-neɣ, win ara d-yelḥeq deg uεerqub-agi-ines, yenɣa-t... glu-d s ddabex-nni ay akured, ɣiwlet ! ɣiwlet !… «Ah, akka ula d ass-agi, nniqal ferḥeɣ zaεma… ah, yiwen wass i tkeḥḥel tyaziḍt yewwi-tt wuccen. Ṣaḥḥa a Rebbi ṣaḥḥa».

- 90 -


Yenher neɣ yezzuɣer Ramdane ABDENBI

A

smi i walaɣ Kahina akked Kusayla dduklen-d akken, ɛeddan-d sdat-i afus deg ufus, tayet ɣer tayet, la ttaḍsan, la ttqeṣṣiren, la tnecraḥen, kemzeɣ aqerru-w, dɣa ṭreḍqeɣ d taḍsa ula d nekk... ad as-inin daɣen Uyidirnni yeṭṭebṭeb, ggran-as-d wussan n tisselbi seg wasmi i t-teǧǧa tayri! Am win i d-yeldin tawwurt iqubel-it-id wayen iɣef ur yebni. Thucc tugna-nni n tayri i ten-yeqqnen ccfaya-w, tessaki-tt-id, tga deg-s ccqayeq ɣer yiwet n teswiɛt deg tallit-nni n tesdawit. Dɣa furseɣ tagnit sefrefdeɣ deg-s armi i d-jebdeɣ yiwet n tedyant i yi-yerran kra n yiseggasen ɣer deffir, lliɣ qqareɣ di tesdawit. Ass-nni ɛerqent-iyi, tettu-yi Ṭiṭi, qqimeɣ weḥd-i tameddit, imensi ur ɛad yewwi, ur yelli kra nniḍen i d-heggaɣ imi ur bniɣ ara ad dbanen lecɣal ara yerwin ttiɛad yellan gar-aneɣ. I tikkelt tamezwarut ur nemlal ara, ur ẓriɣ ara imir-nni acuɣer, maca nniɣ ad teɛyu ccedda ad tt-nẓer akken yezga la t-id-yeqqar umeddakel-iw Umiz, yuɣal iban-d d xalti-s i ihelken… Nnesren yimeddukal merra yal yiwen sani i t-yewwi ccɣel-is, ma d nekk nnemḍareɣ cwiṭ, kecmeɣ ɣer lqahwa wwteɣ-as yiwet n tberkant simi i zrint tmeqwa-nni i d-yeɣlin seg yigenni, ldint-d wallen-iw dɣa gezmeɣ-tt deg rray, nniɣ-as ad awḍeɣ alamma d Tiɣilt Ubeskur, ẓriɣ ad n-afeɣ Lḥaǧ yedduri albaɛḍ n yisekla dinna. Lɛezza-s mi ara yeqqim d yiman-is, ad iɣer adlis, tasɣunt neɣ ad Tamaziɣt tura – Un 11 – H.C.A / yebrir 2013

- 91 -


yeẓẓel i ubeḥri, cwiṭ uqeccaḍ deg yimi, allen la ttcalint zelmeḍ yeffus ahat ad iwali kra ma yeḍra neɣ amdan ma iɛedda. Yettalesaɣ-d akka tikwal kra seg wayen i la yettwali dinna ladɣa tidyanin n teḥdayin yettɛeddin syin i wakken ad zegrent abrid ameqqran mi ara d-ffɣent seg tesdawit. Ulac taḍsa akked yisuɣan n tulawin... aql-i weḥd-i... ad d-ggurrɛeɣ, ad d-rḍeɣ neɣ ad cummeɣ… d ilelli i lliɣ… i la yi-d-yeqqar yal tikkelt mi ara nadiɣ ɣef ssebba i la t-yessawaḍen ad yeɛzel iman-is ɣef yimeddukal-is. Tikwal ttakeɣ-as lḥeqq mi ara waliɣ ayen i txeddem deg-i Ṭiṭi mi ara teḍyeq fell-i… Ttif ɛawaz yir summet... a Uyidir ! ayen i k-yexḍan xḍu-as, i la yi-dyeqqar mi ara yi-iwali nnuɣnaɣ neɣ zeɛfeɣ… Ah ! a Lḥaǧ a bu tɣaltin ! D tidet, tiɣilt-nni ur tt-ixuṣṣ wara, ansi i d-yekka ubeḥri n tefsut neɣ aḍu n tegrest ad tt-iḥaz, yerna ad ters tiṭ n win ara yeqqimen dinna ɣef wayen i la iḍerrun ɣef yicuḍaḍ n tesdawit akked ubrid ameqqran. Ihi ufiɣ-t-in yeqqim, isenned ɣef yiwen useklu, yessers aɣesmar-is ɣef tdikelt n ufus-is, ma d asekkud-is iwelleh-it ɣer yiɣẓer. Am win iwalan kra, la yessalay leḥsabat neɣ la yettmeyyiz, icax deg wayen i yebɣa ad t-iẓer armi i t-id-ḥewseɣ seg umaḍal-nni n tmuɣli ideg yella rriɣ-t-id ɣer umaḍal n tilawt ideg lliɣ nekkini ; d acu ideg tessentaḍ asekkud-ik a Lḥaǧ, i as-nniɣ s leɛyaḍ. Tesduqqseḍ-iyi a Uyidir aggad win i k-id-ixelqen !... teẓriḍ ul cwiyya kan... tebɣiḍ ad iyi-terreḍ ansi akken i d-fruriɣ ?... teɛyiḍ deg-i ?!... Ayya tixxer seg nnig uqerru-w ! i yi-d-yerra mi as-sawleɣ. Icax s tidet deg wayen i la yettwali, yettu iman-is, cukkeɣ ur yebɣi ara mi ruḥeɣ ɣur-s. Seg wakken ur bɣiɣ ara ad t-snuɣniɣ, rriɣ-tt i uqejjem akked nnecraḥa am wakken ur iyi-d-tuqiɛ ara deg wayen i la ixeddem, skud gar-as d yiman-is i la tezzint... Uma terra-yi tmara ad qqimeɣ yid-s, ilaq ad t-saɛfeɣ cwiṭ, sani ara rreɣ ma yekker iruḥ ; ad as-d-iban daɣen ccɣel... atan iḥar neɣ yetqelleq... ilaq ad yaweḍ zik... ad yennser, ad d-ggriɣ daɣen weḥd-i.

- 92 -



Asmi i iwala tethedden liḥala, iserreḥ cwiṭ i yiman-is dɣa iwelleh s uḍad-is d akessar i wakken ad iyi-d-yezziken sin yimdanen la leḥḥun. Yiwen n umdan d tameṭṭut s tqendurt attan tban, d tamɣart neɣ d tilemẓit, ur tban ara, maca lqedd-is yekna, ahat tekna i wakken ad twali anda ara tsers iḍarren-is. Amdan nniḍen d argaz s userwal atan iban ula d netta, la yesɛekkiz ɣef ssiwan, ɣef tɛekkazt neɣ ɣef wayen nniḍen, ur iban ara. Maca nekk ur fhimeɣ ara acuɣer yessenta asekkud-is deg-sen. D imeyyaten i yellan n yimdanen i yettɛeddin seg ubrid-nni. Tasdawit twerrek, la tettfeggiḍ d tilemẓiyin akked yilemẓiyen… Ur iyi-dyenni ur t-steqsaɣ. Simi i ṭṭfeɣ amkan d tama-s, nuɣal la ten-nettabaɛ s wallen segmi i zegren iɣẓer-nni n uzuliɣ iɛeddan deg uɣanim armi i ḍallen i ubrid akkin. Amecwar, wissen amek, yules-iyi-d ayen akken i zeglent wallen-iw, ayen yeḍran qbel ad awḍeɣ ɣas akken ur nuḍaɣ ara ad fehmeɣ imi mačči d ayen i yi-yewwin ɣer din. Yebda : lemmer i d-tusiḍ xemsa n ddqayeq qbel, ad ten-twaliḍ mseḍfaren deg sin yid-sen, ahat la tteddun ɣer uxxam... yezmer lḥal... akka lawan-agi i la d-ttawḍen... ddan am ssaɛa... dɣa mačči s ddqiqa... ad d-ɛeddin deffir n lḥiḍ inna n tesdawit... ahat dinna i la xeddmen... wissen... ad d-tezwir nettat, ad tt-id-yeḍfer netta... ahat ur yeḥmil ara ad tt-yeǧǧ ɣer deffir ammer i txeddem ur tt-yettwali ara… mi wwḍen ɣer yiɣẓer, ad yezwir netta ad t-teḍfer nettat maca ad as-yefk taɛekkazt neɣ ayen akken i yellan deg ufus-is i wakken ad teṭṭef deg-s alamma zegren... ahat yuggad ad tt-yawi wasif n uzuliɣ… dɣa tesduqqseḍ-iyi-d... twalaḍ imir-nni mi zegren tezwar nettat, yeggra netta... twalaḍ daɣen mi wwḍen ɣer ubrid... yezwar netta, teggra nettat... am wakken daɣen mi zegren iɣẓer... twalaḍ... yefka-as taɛekkazt-nni neɣ d acu-t winna... i wakken ad teṭṭef deg-s alamma wwḍen ɣer tama nniḍen n ubrid... dɣa ad tserreḥ i wayen yellan deg ufus-is... ad tezwir netta ad tt-yeḍfer... d ayen i twalaḍ s wallen... ur rniɣ ur sneɣseɣ ! Sliɣ-as am unelmad i yerran lwelḥa-s ɣer wayen i la as-d-yeqqar uselmad, awal ur iyi-d-yecciḍ. Ur ufiɣ ayen ara d-iniɣ deg wayen i


- 93 -


walaɣ akked wayen i yi-d-yules... sin la leḥḥun... d aya ! Argaz akked tmeṭṭut, ilemẓi akked tlemẓit neɣ amɣar akked temɣart, wicqa! Amek ara yili wayen nniḍen, imdanen akka i tteddun, ad dduklen deg sin neɣ ugar, lemmer ad nemmeslay ɣef widen yeddukulen akken, ur ikeffu ara wawal. Ziɣ deg uqerru-s kersent merra ɣas ur yelli wayen iɣef ara yili wawal. Imi ẓriɣ d acu i yi-yewwin ɣer din, cwiṭ n lhedra ur tettḍurru ara, ad iɛeddi wakud ahat ur as-ttḥulfuɣ ara... simi ara d-yaweḍ lawan n wučči, dɣa steqsaɣ-t : Taḥkayt-agi merra i yi-d-tulseɣ ɣef sin yimdanen i iruḥen seg umkan ɣer wayeḍ... Dɣa yegzem-iyi awal. Ɣileɣ deg tazwara yugi ad iqeṣṣer, d ayen i la t-id-yettawin ɣer din, cwiṭ n talwit akked tsusmi… ulac tiḥdayin, ulac taḍsa, ulac isuɣan. Ḥbes din…, i yi-d-yenna, mačči d win i d aɣbel… nekk ayen i ur fhimeɣ ara… acuɣer tikwal la tt-inehher tikwal la tt-yezzuɣur ? Niɣ twalaḍ s wallen-nni-inek ara yečč wakal a Uyidir… Mačči d tiririt-agi i la ttraǧuɣ ɣas akken ssneɣ-t, ẓriɣ akka kra seg wayen yebɣa akked wayen yugi, ayen iḥemmel akked wayen yekreh, maca ad yaweḍ alamma yerra tameṭṭut-nni d zzayla, dɣa bezzaf, ur t-qbileɣ ara. D tidet ur yeḥmil ara tulawin, maca mačči alamma yessexnunes-itent deg uzuliɣ axaṭer iḥuza-d yemma, ultma, xalti... ula d tameṭṭut-nni ur ɛad i d-wwiɣ s axxam yelqef-itt ! Yečča-yi wul-iw imir-nni, ur ufiɣ amek ara as-kemzeɣ… snefsusiɣ taɛkemt s tririt i iwulmen taswiɛt-nni ideg nella : aah ya ssaɛqa... a nnaɣ a Lḥaǧ… ur ẓriɣ ara tewwḍeḍ akk deg tigi... ur teḥmileḍ ara tiḥdayin, d lḥeqq-ik, d ilelli i telliḍ, tenniḍ-t-id... ad tent-terreḍ d iɣersiwen... dɣa ayen ara iɛeddin deg yimi n teɣrast kan ay ameddakel... uma ad ak-d-rnuɣ tayeḍ «Tilelli» iɣef la tcennuḍ, iɣef la tettnadiḍ, iɣef la tesseḥbibireḍ akka, a d unti a winnat... akka am tmeṭṭut, tebɣiḍ-t neɣ tugiḍ-t ! Tilelli d unti, unti d tilelli, tfehmeḍ neɣ ala ! Yeẓṭel akka amecwar dɣa yendekwi, ur t-yeɛǧib ara wayen i as-nniɣ, yerra-yi-d : d kečč i d-iruḥen ɣur-i, ur ak-n-sawleɣ, ur nudaɣ fellak... uma nekkni ay ameddakel akka i t-id-nufa, akka i yella seg wasmi...

- 94 -



Uggadeɣ i d-irennu, dɣa gezmeɣ-as awal : Acuɣer ma tezwar, d anhar i la tt-nehhren, ma teggra, d azuɣer i la tt-zzuɣuren ?!... Aaa ! Ilaq ad nemsefham a winnat... taqbaylit-agi tesɛa llsas... ma yella win yezwaren d netta i la yezzuɣuren... ma yella win yeggran d netta i la inehhren... ihi win la yezzuɣuren la t-nehhren... win i la inehhren la t-zzuɣuren a winnat !... tikwal la izewwir urgaz-nni tikwal la iggerri… ihi ula d netta la t-tnehher neɣ la t-tezzuɣur !... Aaaa !... yecreq-as wawal, kfan-as lehdur. Uɣaleɣ-d seg umaḍal n ccfaya ɣer win n tilawt s uzmumeg ɣef yimi, mazal-it deg yimeẓẓuɣen-iw «Aaaa!...» i umi d-yebra seg wakken ur yufi d acu ara d-yini. Kahina akked Kusayla ɛeddan, wissen Lḥaǧnni amek i teḍra yid-s, acḥal aya ur t-ẓriɣ, wissen amek ara yexdem lemmer i ten-iwala deg liḥala-nni ideg i ten-walaɣ ; ur yelli win i yezzuɣren wayeḍ ur yelli win i inehren wayeḍ !


- 95 -

Muḥend yettarun akked tewkilin-is Mokrane CHIKHI

Ɣ

as ulamma yennerna uεewwiq deg uqerru n Muḥend am tsirit-is yakan, tikkelt-a yeqsed-d ad yaru. Yufa-d d ayen ilaqen fell-as ad t-yexdem, acku tira tella deg yidammen-is, ɣas yeẓra agdud-is mačči d win i yessebɣasen at Tira. Nutni seg zik-nsen tthummun kan, yal yiwen deg wacu i yelletha, tteddun kan ur ẓrin s anda, armi i d-ggran ass-a d iceqfan wa ur yemεaba d wa. Ladɣa d taneggarut-a i yesεewqen aṭas Muḥend imi tifrat-is d ayen iweεren. Yenna-as yiwet n tikkelt : lemmer ahat s lebεaḍ n tutlayin-nniḍen iss ttaruɣ, tili wissen tiktiwin-iw ttwaɣrant, ttwagzant akken ilaq ! Meεna aya ṭra ma d amyaru i lliɣ ma mačči s tutlayt-a n ugdud ? Ur cukkeɣ ara, imi ur zmireɣ ad arguɣ la s tin n usammar la s tin n umalu. Ihi d ayen kan a Muḥ argu kan s tin-ik ɣas ur ak-tentssefruyen ara wid-ik. Iḍ-a, ireqqeε-d akk imahilen-is ɣef ṭṭabla : isefra-s, isefra n wiyaḍ, imagraden d yidlisen ladɣa wid n tutlayin-nniḍen i ira ad d-yessuqel. Ha kan tekcem-it-id tikti-nniḍen ! Yegger-d ad yaru ɣas ulamma cwiṭ kan s tfinaɣ, tira yezga yettqeddis. Yeddem-d tawerqet n uglim i d-iheyya ɣef ddema akked tedwayt n ssmax n taḍuṭ i yessefsa, yerra aɣanim deg ufus-is, yebda tira… Akken kan yebda tikli deg umezruy n ugdud-is, tefja lqaεa, tuli-d sdaw n tɣerɣert Dasin yellan d yiwet seg tewkilin-is, ladɣa d nettat i iḥemmel s waṭas ɣef tiyaḍ d-yettasen ɣur-s yal mi ara iεeddi ad yaru. - 96 -



Ḥaca kan i tt-iwala, yessers aɣanim, iεeyyeḍ fell-as : - Amek armi d tura ! Teǧǧiḍ-iyi seg ṣṣbeḥ nekk weḥd-i deg uεewwiq, ayɣer akka ? Nettat terra-as-d : - Ala a tayri-w ! yak teẓriḍ nekk lliɣ yid-k anda tebɣuḍ tiliḍ, ddiɣ yid-k s anda tebɣuḍ truḥeḍ. D tidet ttcukkuɣ di tayri-k imi ur yi-ttid-tesbegneḍ ara, d ayen i yi-yeǧǧan tteffreɣ fell-ak, maca di leεmer xemmeɣ akken ad k-ǧǧeɣ, imi i k-ḥemmleɣ, ɣas kečč yugi wul-inek ad d-yefsi tisuraz s wayes t-tεekleḍ, i wakken ad iyi-d-tiniḍ srid : ḥemmleɣ-kem ula d nekk. Mi as-d-tenna akka, mmecrurqent-d wallen-is d imeṭṭawen, maca iẓeyyer iman-is akken ur d-yettban ara fell-as, ma d nettat tleḥḥu-d ɣur-s cwi cwi, kra d-tleḥḥu netta yettḥeqqiq deg-s. Yettmuqul ɣer lqedd-is yezdin, icuban tazdayt n ttmer, d wallen-is iberrqen amzun d lefnar. Mi d-tuẓa ɣur-s, yekker ibedd ula d netta, yemmugger-itt s tqemmuct. Yuɣal yesɣim-itt-id ɣef yirebbi-s, syin yeddem-d aɣanim-is akken ad ikemmel tira, netta akken ul-is yettfeggiḍ d lferḥ akked usirem. Yeqqel iluεa-tt s nnecraḥa : - Amek akken a Dasin sda-nni-nneɣ ? - Kečč ssefru nekk ad iniɣ, neɣ kečč ini nekk ad ssefruɣ. -Amek, amek ! Ad iniɣ kemm ad tessefruḍ ! Ur tettneḥcameḍ ara, teḥrem ar… Mi as-yerra akka, tεedda tεawed-as-d : - Ur ssefruy ur d-qqareɣ, ur d-qqar ur ssefruyeɣ, maca kečč aru ma d nekk ad ɣreɣ. Mi as-yesla akka, yenna-as : - Ala, nekk ad aruɣ ma d kemm efk-iyi-d tiktiwin i tdehneḍ s yiḥeckulen-inem, akken agdud ad yeqqar tirawin-inu s rreɣb. Imiren, tger-as iɣallen, ma d netta yessers aɣanim yellan deg ufus-is, ruḥen di tnafa n tirga. Ur kfin ara inig-nsen di tirga n usirem mi ten-id-yessaki usḥedwi n ubriq yersen ɣef yiri n ṭṭaq n txelwit n Muḥend. D abriq n ttay d aqdim ! Awi yeẓran ansi i t-id-yejmeε ? Buh ɣef Muḥend meskin bu yijeqḍuren ! Seg zik-is netta akka ;


- 97 -


iḥemmel ad yejmeε tiɣawsiwin tiqdimin : Ta n setti-s, ta n jeddi-s, ta n lgirra-nni, ta n zzman n yiɣil, ta… Abriq yersen ɣef yiri n ṭṭaq, yejmeε-it d rriḥa n setti-s, nettat yakan asmi i tella di lḥayat-is tεudd-it gar tɣawsiwin εzizen fell-as, imi d amɣar-is i t-id-yewwin seg Mekka asmi akken iruḥ ɣer lḥiǧ. Lḥaṣun ajeqdur mazal-it akken yesḥedway ma d netta yettmuqul ɣur-s s tuggdi. Dasin mi t-twala akken, tekkes-as aḥulfu, tenna-as : - Ur ttaggad a Muḥend, ta yesḥedwayen akka d ayen εeqleɣ-tt d Faṭima ! D yiwet seg tewkilin n usammar tebɣa ad teffeɣ akken ad k-temlek, meεna anef-as kan ! Σni ur yi-tessin ara… Atan ggulleɣ ad as-tent-sseṛwuɣ ! Ḥaca kan i d-tekfa awal-is, yebda yetteffeɣ-d ddexxan d amellal seg yixef n ubriq-nni. Muḥend tečča-t lwehma, iberreq kan deg wallenis ma d nettat teṭṭef-it deg wammas, teqqar-as : - Ur ttaggad, ur ttaggad, d lxir kan ara yeḍrun. Mi d-yeffuṣel ddexxan tuffɣa-s seg ubriq-nni amcum, yeḥbes usemḥedwi, teɣli-d tsusmi ma d ddexxan-nni yettnejmaε cwi cwi armi kan yuɣal d lewṣayef n tfekka n umdan iɣef teḥṣa Dasin yakan. Taswiεt kan tban-d akken ilaq : d tameṭṭut s lekmal-is : acu n leεli, acu n ṭaqqa, wamma εad tahuski ; udem-is d imdewwer d axemri, leεyun d iberkanen dewwren d leqwas, allen-is d tugḥilin berrqent amzun d itran, taqemmuct-is teḍbeε am uxelxal ; wamma εad acebbub-nni aberkan i as-d-yettawḍen ɣer wammas akked yidmaren-is yecban tifeqlujin. Muḥend d ayen i d netta, yettwaseḥḥer ! Yeεwel ad yemmeɣ fell-as. Ma d Dasin nnernant deg-s tismin, kra yekka yettmuqul ɣer-s ammer tufa ad tt-tneɣ uqbel ad tawi timentilt. Yuɣal Muḥend yenṭeq ɣer-s : - Qesmeɣ-kem-id s Rebbi ma ur iyi-d-tenniḍ anta kemm a lexliqaagi ? Faṭima : Nekk d rruḥ-ik, d nekk i ijerrden isem-ik, bɣiɣ ad k-awiɣ yid-i akken ad yennerni wazal-ik. Muḥend : Ini-yi-d, ansi-kem ? S anda ɛni i tebɣiḍ ad iyi-tawiḍ ? Faṭima : Nekk usiɣ-d seg usammar / I yellan d annar / Deg mlalent tɣermiwin.

- 98 -



Rebbi d imdanen-is i yextar / D ameẓyan, meqqer / S wawal-is i yettɣennin Tamurt-iw s tmusni teεmer / Uḥdiq ɣur-s ihajer / Yelmed tasekla d tesreḍin. Mi as-yesla akka, yekker ula d netta yerra-as s usefru : - Nekk ma mačči s tin-inu / Aɣanim ur ileḥḥu / Ayen uriɣ imeḥḥu Ttuɣaleɣ mačči d amyaru / Lemmer tessneḍ ay xti / Iḍ-a lembatim ɣur-i / Tahuski-m tseḥḥer-iyi / Ttxil-m ddu-yi di lebɣi. Faṭima telwawec ssura-s mi as-d-yenna akka, Dasin terfa ketrayen ladɣa imi twala Muḥend yeεǧeb-as zzin n Faṭima, tuggad ad teqbel ad tens ɣur-s, ladɣa d tin akk i d tawaɣit ! Tuɣal tecmumeḥ-d akken ad terbu lɣecc i d-yulin ɣef wudem-is, maca yettban ɣef tiṭawin-ines tuḥricin dakken yella wayen i wumi tesseɣwas ad t-texdem. Taswiεt kan tenṭeq ɣur-s : - Ttxil-m a lexliqa ma ur yi-d-tenniḍ amek armi d-tleḥqeḍ ɣer da ? - Waqila kemm yeqqur uqerru-m ! Yak nniɣ-am-d yakan : Nekk d lalla-m Faṭima / Aẓar-inu n ccurafa / Usiɣ-d seg tmurt n ccerq / Wwiɣ-d yid-i timucuha / N alef layla ulayla / D yisefra n Lfarezdeq. I Muḥend yesεan nniya / Yak ur yuhwan ara / Akken ad yeqqim yeεweq. Dasin mi as-tesla akka, nnernant deg-s tismin, tɛedda tenṭeq ula d nettat s usefru : - Wa d Muḥend-inu / Yis-i i yettaru / Ma ulac-iyi netta ur yelli / Agdud-is deg-s yettraǧu / Yis-s kan i yettargu / Ma yefna teɣli-d tili. Teqqel daɣen tluεa-tt Dasin : - Meεna ur iyi-d-tǧawbeḍ ara εad ɣef usteqsi-inu ? - Ɣef wacu ? - Amek armi i d-teffɣeḍ seg yixef n ubriq kemm yellan annect n ugejdur ? - Xemsa fi εaynik ! - Awah ! D lmuḥal ad amneɣ ɣas ulamma d ayen i ẓriɣ s wallen-iw ! Wissen kan amek i aɣ-tdewwxeḍ, wamma da gar-aneɣ i telliḍ


- 99 -


teffreḍ ; tebɣiḍ umbeεd ad tessaliḍ di ccan-im, ataya tesεiḍ lberhan. - Faqu ! Ur kem-numin ara, la nekk la Muḥend. Faṭima tenneḥcam, tuɣal d tazeggaɣt, tenna-as : - Wellah ar deg ubriq ihin ideg ttidireɣ i wazal n rbeεṭac n leqrun aya. Wellah ar syin i d-ffɣeɣ ! - Tamseεreqt-agi-inem telha ! Yenna-as : Yuker ḥeḍreɣ, yeggul umneɣ. Aha ṭra sbeggen-aɣ-d amek akka i d-teffɣeḍ seg yixef n ubriq annect n uḍad-im ? - Amek ara am-d-sbegneɣ ? - Uɣal ɣer daxel-is akka neṭallay ! Kra ttemyuzzament Faṭima d Dasin, Muḥend ibedd am lmeṣnuε, yesmexẓir kan deg-sent, awal ur t-id-yuli. Ɣas ulamma Dasin tettakd ṭṭiyat n tayri seg wallen-is, Faṭima tettmuqul-it s tmuɣli n leḥnana, amzun akken iɣaḍ-itt, tuɣal tenṭeq ɣer Dasin : - Mačči i kemm i wumi xedmeɣ ccan, maca ɣef wudem n Muḥend ur nuhwan ara ad yeqqim akka deg uεewwiq, atan ad awen-dsbeggneɣ lberhan-iw. Tura kan ad kecmeɣ ɣer ubriq ideg zedɣeɣ azal n rbeεṭac n leqrun aya ! Ad kkeɣ ixef-is ansi akken d-ffɣeɣ, i wakken ad tissinem azal-iw akked lqedra-w i yi-d-yekkan sɣur Bab n yigenwan. Dasin yeẓran i wumi tettheyyi, mazal-itt testeεmil am wakken ur tumin ara. Imiren tennejbad Faṭima, di tasint tuɣal d abbu. Tebda imir tkeccem s leεqel deg yixef n ubriq ansi i d-teffeɣ. Dasin yesεan aɣawas din din teddem-d tadwayt-nni n ssmax yersen ɣef ṭṭabla, tesmar-as-tt akk ɣer daxel, tin tettsuɣu. Tuɣal daɣen teddem-d aɣanim iss yettaru Muḥend tessed-it deg yixef n ubriq-nni. Tin mazal tettεeyyiḍ, Dasin werεad ur as-teqqid ara yerna tuggad ad dteffeɣ, tεedda tettel abriq-nni amcum di twerqet-nni n uglim ideg yettaru Muḥend, tcudd-it s lxiḍ i d-tegzem seg-s s tuɣmas-is i qrib d-qelεent. Imir teddem-it-id tezzeḥlelli-it seg ṭṭaq, teṣbeḥ-it-id deg yiɣẓer iḥemlen seddaw n lḥara. Tettferriǧ deg-s i tziri amek tturaren yis-s waman akked yiẓra, tin tettsuɣu seg-s am rrεud, wis kan amek ur d-tessaki ara s usuɣu-s at taddart i yellan lawan-nni ruḥen di tnafa n yiḍes.

- 100 -



Mi iɣab ubriq-nni amcum ɣef wallen-is, tekkes aɣbel yewwi-t uḥemmal, tɛedda tdewwer-d ɣer Muḥend ; nettat tenwa ad t-id-taf iheyya-d iman-is akken ad mmegren iɣallen, maca mačči akken i tṣar. Tufa-t-id : udem-is yeqlelles, tawenza-s tekres. Yerfa fell-as imi i as-tekkes aɣanim seg ufus-is, terna twezzeε-as tadwayt-is n ssmax, yerna tḍeyyer-as tawerqet ideg yettaru. Wamma abriq-nni εzizen i as-tezzeḥlelli seg ṭṭaq, amek ara yeṣber fell-as ! Seg wayen yerfa, iεeyyeḍ fell-as : - Ruḥ ad truḥeḍ akkin fell-i a lmuṣiba neɣ ad kem-rreɣ d agelgal n yidammen ! Nettat ɣas akken tuggad-it, tεell lkuraj, tuẓa ɣer-s, tessers afus-ines ɣef uqerru-s teslufa-as. Tesselḥay iḍudan-is cwi cwi gar wanẓaden n ucekkuḥ-is. Imiren Muḥend yuɣal-it-id rruḥ, yerra-d nnehta, tezri-t liḥala-nni i t-irekben, yuɣal wudem-is yennecraḥ. Yessuter-as smaḥ i Dasin, yemmeɣ fell-as iger-as iɣallen, ma d nettat tefka-as-d taqemmuct. Qqimen aṭas n lweqt nutni akken myalsaqen, armi d ayen kan yebra-as s talwit. Iεedda imir yuɣal ɣer umkan-is ; yewwet ɣer leqjer yejbed-d attafttar akked yimru, yebda yettaru. Dasin mebla ma yessawel-as, tuli ɣer yirebbi-s teqqim tger-as iɣallen. Tmuqel-it s tmuɣli n tayri, tεedda tenṭeq ɣer-s s nnecraḥa : - A Muḥend-iw ay amyaru / Nekk ad iniɣ / Ma d kečč ssefru. - Netta yerra-as-d : - Mmird ! Teṭṭerḍeq imiren d taḍṣa. Teḍṣa armi d ayen teεya, tεedda umbeεd tenna-as : - A Muḥend-iw ay amyaru / Nekk ad ssefruɣ / Ma d kečč aru. Muḥend mi as-yesla akka, yecmumeḥ wudem-is, yers lxaṭer-is, iserreḥ ufus-is, yuɣal ad ikemmel tira. Dasin yellan ɣef yirebbi-s, tettawi-as-d am leεwayed-is timucuha, timucuha-nni ur nettfakka, tid n at zik d tid n at tura d tid n yimal iɣer mazal ur newwiḍ ara. Wwin-d akken tanafa deg usikel-nsen armi i tensa tcemmaεt i asend-yettaken tafat. Tεedda imiren Dasin ad tezzer di lqaεa i wakken ad as-tanef i Muḥend ad yeṭṭes. Muḥend yellan ur yeεyi ara yebɣa


- 101 -


ad ikemmel tira, ihi iεedda yemaẓẓed akken ad yecεel llamba n trisiti ; ɣas ulamma netta yekreh tafat s waṭas, yesmenyaf axir ad yaru ɣer umezɣiɣed n tcemmaεt, meεna terra-t tmara imi iḍes iruḥ fell-as yerna ccmeε yekfa-as. Dasin mi t-twala akken yettenderkal di tallast iεummen akk taxelwit-is, yettnadi di lḥiḍ ɣef teqfilt n llamba, tekcem-itt tuggdi, tebɣa ad t-id-teḥbes imi tḥulfa dakken yella kra n umihi i ten-yettraǧun. Tekker tluεa-t : - A Muḥend, d ayen-ik tura ! Σeddi ad teṭṭseḍ, aql-ik teεyiḍ ! Eg lbaraka deg wayen i turiḍ iḍ-a ma d ayen yeqqimen eǧǧ-it i yiḍ ara d-yasen. Muḥend teɣleb-it leḥrara, Dasin ur as-yesli ara, iεedda yecεel tafat. Siwa kan i d-tebreq llamba, yedda-d yid-s yiwen n ṣṣut amzun d kra n tɣawsa i d-yeɣlin seg ssqef tebbelseq-d ɣer lqaεa ! Muḥend imir yerεaεec seg lxelεa, armi i as-tekkes, yessaked akken ilaq, tečča-t lwehma deg wayen iwala : iwala yiwet n tlemẓit teḍleq di tlemmast n tɣerɣert, nettat telsa llebsa d tamellalt amzun d tislit, udem-is d azeynan am leḥrir, acekkuḥ-is d awraɣ yettarra-d izenẓaren n tafat, allen-is d tiẓerwalin am yini n tegnawt yeṣfan. Muḥend tefka-as axettar, yuɣal yesker deg wayen i as-teεǧeb, iεedda yekna ɣur-s akken ad tt-id-yesɣim ɣas ma mazal-it akken ikukra. Ma d Dasin tbedd kan akken tečča-tt lwehma, tessers afus-is ɣef lḥenk-is teqqar deg ul-is : I ta daɣen amek ara tt-sḍiceɣ ? Tixxer-as kan ad as-geɣ am tmezwarut-nni neɣ ugar, imi εni ur yi-tessin ara d acu-yi, nekk umi sawalen Massa Dasin, win teqqes ur t-ttdawin. Yenṭeq Muḥend ɣer lexliqa-nni yenna-as : - Qesmeɣ-kem-id s Rebbi ma ur yi-d-tenniḍ d acu-kem ? - Nekk d tawkilt i k-izedɣen bɣiɣ ad k-aɣeɣ ! - Amek, amek ?! Tzedɣeḍ deg-i mebla ma εelmeɣ ! D acu εni iyitḥesbeḍ ? - A Muḥend leεfu, ur ttḍunnu ara deg-i ayen n dir acku nekk ttedfifileɣ fell-ak, ḥaca ayen yelhan i ak-ttmenniɣ. Mi as-yesla akka, yecmumeḥ wudem-is, yerra-d nnehta, yebɣa ad as-yini aẓ-d ɣur-i, meεna yessetḥa-tt. Ma d Dasin yellan ɣer tama-s

- 102 -



tayeffust, yettu-tt maḍi amzun akken ur telli ! Yuɣal daɣen yesteqsa tamexluqt-nni : - Isem-im ? Ansi-kem ? - Nekk d Madam Ruza n Umalu. - D acu i kem-id-yewwin ɣur-i ? Nettat terra-as-d s usefru : - Nekk d Madam Ruza / I d-yusan seg Fransa / Bɣiɣ nekk yid-k ad nelḥu / Ad ak-slemdeɣ taɣerma / Taẓuri d tsekla / Voltaire d Montesquieu / Mi k-ḥemmleɣ i ak-d-wwiɣ tussna / Ɣur-neɣ tennerna / Bab-is εziz ɣer ugdud-inu. Muḥend mi as-yesla, yeldi imi-s ; tseḥḥer-it bih nfih, yuẓa ɣer-s mebla ma ifaq. Dasin ur teṣbir ara, tekcem-asen di tlemmast akken ur ttemlilen ara, tuɣal teṭṭef-d Muḥend seg lexnaq tεeyyeḍ fell-as : - Irgazen am kečč uklalen lmut imi ulac ɣur-sen tissas ! Netta daɣen yerra-as s reffu : - Serreḥ-iyi ay aqadum n lmiziriyya ! (Yewwet-as ifassen-is). Nettat mazal-itt akken teckenṭeḍ deg-s, tugi ad as-tserreḥ. Tuɣal tdewwer aqerru-s ɣer Ruza, tenna-as : - I kemm tura, ad teqleḍ ɣer wansa i d-tekkiḍ neɣ tebɣiḍ ad kemsḍiceɣ ? Ruza tessers kan i uqerru-s, tugi ad as-d-terr awal, ma d Muḥend mazal-it ijebbed, Dasin tugi ad as-tserreḥ. Taswiεt kan teẓẓel afusis ɣer teqfilt-nni n trisiti yellan di lḥiḍ, tebɣa ad tt-tesref akken ad tens llamba. Ruza mi tt-twala akken, yekcem-itt lxuf tebda tettḥellil deg-s : - I wumi yeεni i tebɣiḍ ad yi-tesḍiceḍ ? A nnaɣ teẓriḍ argaz-a ḥemmleɣ-t, d ayen i t-inefεen i as-buddeɣ ! Nutenti akken ttemyuzzament Muḥend ur d-yerri s nba, ur yeẓri d acu i as-teqqar tin wala tin, ibedd kan tewwet-it lwehma, iruḥ deg usekkir. Ma d Dasin terra-as lehdur i Ruza, tenna-as : - Ma d ayen i as-d-tewwiḍ, unfeɣ-am sers-it-id da ad t-yeddem, meεna ḥṣu dakken argaz-a yesεa leqrar, madam dreɣ ttwaliɣ d nekk i d tameṭṭut-is, d lmuḥal ad t-ǧǧeɣ ad yi-yebru neɣ ad d-yernu fell-i takna.


- 103 -


Mi d-tekfa awal, teẓẓel afus-is ɣer teqfilt-nni, tin tsuɣ : - Ala ! Dasin, yuɣ-itt lḥal d ayen tesref tiqfilt yellan di lḥiḍ, tensa tafat, tεumm talwit di txelwit amzun akken kra ur yeḍri. Imiren kan yukid Muḥend seg uṣraε, am win i d-yekkren seg yiḍes. Yufa-d Dasin sdat-s, tger-as iɣallen thedder-as cwi cwi ɣer umeẓẓuɣ-is : - Ur ttaggad a Muḥend, madam lliɣ dreɣ d lmuḥal ad k-ǧǧeɣ i umihi. Ḥemmleɣ-k a Muḥend, atan εuhdeɣ-k seg wass-a d tasawent ur qqileɣ ad k-ǧǧeɣ iman-ik. D ayen meεac ad zzreɣ ddaw n tmurt ɣas ad tefju lqaεa. Σuhdeɣ-k ar d-zgeɣ ɣer tama-k i lebda. Tεedda imiren tewwi-t ɣer wussu, terna ula d nettat tgen ɣer yidisis, tebda tettcewwiq fell-as, tezzuzun-it am llufan akken ad yeṭṭes : - As-d, as-d ay iḍes / Ɣer uεziz-iw, ad yeṭṭes / Akken ad yaki tafejrit / Ad yexdem ccɣel-ines / Asemt-d, asemt-d a tirga / Akken ad kent-yaru azekka / Agdud yuyes ad tent-iɣer / Yettraǧu-tent s ccehwa.

- 104 -


Lmelzum Saïd CHEMAKH

Y

ennayer 2009, di Tizi Wezzu. Kra yekka wass d ageffur d rrebɛa n tmeddit mi d-ṣekkreɣ lbiru. Ad d-ttedduɣ ɣer la cités n temdint tamaynut. Iberdan ttfeggiḍen d aman, igenni tuɣ-it tagut. Qrib ad d-aɣent tillas igenni. Ɛyiɣ, nniɣ-as ad sellkeɣ ad d-qḍuɣ, syin akkin ad ɛeddiɣ ɣer Salah yesɛa ddipu n ccrab ad as-nawi yiwet neɣ kra n tebyirin lɛali s wayes ara nečč imensi. Uɣeɣ-d aɣrum, lxeḍra, iɣi, aksum... Mazal kan ad d-rnuɣ taqerɛet n uzeggaɣ, aman n tẓurin iɣef yura Xeyyam acḥal d asefru neɣ ma yehwa-awen aman i d-yesnulfa urebbit Bacchus ! Ɛeddaɣ ɣer tberna-nni, teččur d imdanen ; ad as-tiniḍ Tizi Wezzu akk tettes ḥala ccrab. Llan warrac n at Dwala, kra n yirgazen n Yiḥesnawen, sin n yinelmaden akked tnelmadt si tmura n Tefriqt n Saḥel, yiwen umattar yumes yal yiwen yettraǧu nnuba-s. Llan wid iḥaren axaṭer sserbayen akken d-myezwaren. Ulac maḥyaf gar yikelyanen ! Aslugu n uxxam-a d wa : D udi, ur mmal ara ! Ikelyanen ẓran belli d udi dɣa mmalen ! Segmi tikwal ad d-cihwin kra n tissit ad d-afen belli d wid-nni i wumi tt-mlan i tt-yewwin ! Ihi ! kecmeɣ, nniɣ-asen azul fell-awen i wid yellan din. Wa yerra-d sslam wa xaṭi. Wicqa, yal wa d acu ideg yezder ! Yal wa d acu d tamda i t-yeččan ! Ikelyanen ttxelliṣen, ttaddamen akumisyu-nsen, tteffɣen... akken akken armi d-neggra nekk Salah akked Mourad. Yesteqsa-yi-d Tamaziɣt tura – Un 11 – H.C.A / yebrir 2013

- 105 -


Salah ɣef uxeddim, nniɣ-as belli ça va pas ṣṣbeḥ ttassen-d yinelmaden, tameddit aṭas i yettabṭalen. Tullas zik i d-ɣellint txuṣṣ rrekba, llan aṭas n yibundiyen i yesqiṭṭiɛen i tullas, ttekksen-asent tizrarin, les portables... lḥaṣul mačči d yiwet neɣ d snat n ssebbat i yellan akken ur d-ttasen ara ad ɣren tameddit. Llant kra n tullas mi tewweḍ d rrebɛa ad ffɣent si tzeqqa n yisaragen. Tuggdi n uɛerri, azal n rrebɛa... mačči d yiwet... Nettqeṣṣir, tikkelt-nni yenna-ak Salah : - Bɣiɣ ad k-steqsiɣ a Mass, d acu i d lmelzum ? D tikkelt tamezwarut i sliɣ i wawal-a. Ḥeṣleɣ imi ur zmireɣ ara ad as-d-fkeɣ anamek n lmelzum nniɣ-as : - Wellah ma ẓriɣ a Salah, ad nadiɣ deg umawal n Dda Ɛli, akken i as-neqqar i le dictionnaire n Jean-Marie Dallet ad ak-d-rreɣ mbeɛd... Ddmeɣ takarnit-nni yellan ɣur-i, uriɣ awal i yi-d-yenna ; lmelzum, aẓar-is, √LMZ yekka-d si taɛrabt, seg wawal «laazim», anamek n wawal-a s taɛrabt : «ayen ilaqen, ayen iwulmen…», maca d acu-t anamek-is di le contexte et le co-texte ? Sin yisteqsiyen i wumi ur d-ufiɣ tifrat. Anef ɛad ar «lmelzum». Nniɣ-as i Salah : - Tikkelt, ad d-zziɣ ad ak-d-iniɣ d acu-t, ad d-nadiɣ deg umawal, ad nadiɣ di tezmamin yellan, neɣ ad ssiwleɣ i sin lecyax n Tmaziɣt i iẓewren di temsal-agi n umawal ad iyi-d-ɛiwnen... Salah yenna-k : - Wellah ar ɣas axaṭer aql-i ḥareɣ !... - Ɣef wacu ? - Iḍelli qbel ad ṣekkreɣ lmaḥel, yusa-d yiwen umdan yenna-k : ilaq ad iyi-tefkeḍ lmelzum. Lḥaṣul ma ẓriɣ d acu. Imir i d-yewweḍ gma, nṣekker nekker ad nruḥ yenna-d umdan-nni : azekka mi ara duɣaleɣ ad iyi-tefkeḍ lmelzum-iw ad d-uɣaleɣ... steqsaɣ ur d-ufiɣ win yeẓran d acu i d lmelzum, dɣa yefka-k-id Rebbi nadi-aɣ-d d acu-t wawal-a. - Ih ! azekka, tameddit, ad ak-d-rreɣ ɣef usteqsi-k. Mi ttedduɣ s axxam, ttxemmimeɣ. Aẓar n wawal d √LMZ. D awal imreṭṭel neɣ d areṭṭal akken qqaren kra, si Taɛrabt. Anamek-is «d

- 106 -



ayen iwulmen, ilaqen i wumdan ad t-yexdem». «Melzum» yezmer ad yili unamek-is s Tmaziɣt : «ilaq !»… Atan wanda i nessaweḍ deg uxemmem. Akken i yi-tefka tewwurt, uzzleɣ s amawal n Dallet nudaɣ √LMZ deg usebtar 472 ufiɣ yura wayen yuran. Mazal yella cwiṭ n lexṣaṣ. Maca, llan lecyax i yi-yesseɣren Tamaziɣt, llan yimdanen imeqqranen i nessen, tilifun. Bdiɣ asiwel. Yal wa acu i yi-d-yenna, yal wa d acu i yi-d yerna, maca kullec ijerred di tkarnit. Ssneɣ yiwet n teqcict tessen mliḥ Taqbaylit sawleɣ-as. Dɣa tennayi-d ayen ur iyi-d-nnin wiyaḍ neɣ ur ɣriɣ di tezmamin : lmelzum d ayen iwulmen i urgaz ad as-t-yexdem yal tikkelt mi ara tebɣu tmeṭṭut neɣ ma yebɣa netta ; neɣ mulac tissulya ad tefsex... ! Wehmeɣ, ziɣ d ayen, lmelzum-agi ccɣel n wumi qqaren s Tefransist le devoir conjugal…. Ziɣ mazal ar tura tussniwin n Teqbaylit ur nettwajerred ara s tira, yiwen wass ad yeglu yis-sent ujlal n tatut. Ziɣ… Ihi, azekka-nni mi fukkeɣ axeddim, ɛeddaɣ ɣur Salah. Nniɣas deg wul-iw ad d-awiɣ tabyirt neɣ snat ad d-zziɣ yerna ilaq ad asd-sfehmeɣ d acu i d «lmelzum»-agi s wayes i as-yerwi winna aqerrus. Wwḍeɣ, am zik, nniɣ-as azul, mi ulac ikelyanen sfehmeɣ-as-d d acu i d inumak n wawal. Yewhem.Qeṣṣreɣ yid-s cwiṭ, ikelyanen keččmen, qeṭṭun, tteffɣen... Tillas uɣent-d igenni mi d-ibedd yiwen umdan ɣef tewwurt. yuẓa-d s akuntwar. - Acu i tebɣiḍ, a sid ?... Winna yessusem, yezzi ɣer Salah, yenna-as : - Bɣiɣ lmelzum, usiɣ-d ad yi-tefkeḍ lmelzum- iw, d aya. Salah yuzwaɣ wudem-is, yenna-as : - D acu daɣen waya ?... Amdan-nni yerra-as-d imiren. - Lmelzum-iw. Mourad si tama yenṭeq-d : - Bu, acu ara tawiḍ ? Sellek !... Amdan-nni yezzi ɣer-s yenna-as : - Mačči d kečč i bɣiɣ, bɣiɣ Musṭac !... D Musṭac i bɣiɣ ! Ha !... Ruḥ tura af-d tawwurt i umdan am wa !


- 107 -


Salah yenna-as : - Ma d asundwič, ad ak-t-nxelleṣ !... Ur d-ifukk ara awal, amdan mi yezzi ɣer-s yenna-as : - Mačči d asundwič, d kečč ara ixellṣen asundwič ?... bɣiɣ lmelzum. Awi-yi ɣer l’arrière boutique efk-iyi lmelzum, ternuḍ-iyi yiwen ubuciḍ n ccrab n bu-wacciwen. Ẓriɣ di tmuɣli-s mačči d win ara yettun ɣas akken ccrab n ubuciḍ n 25 alef santim. Bu-wacciwen, yelḥa-d uḍar neɣ «Mouflon d’or». Maca, amdan-a d lewhayem. Riɣ ad d-neṭqeɣ mi walaɣ taswiɛt terwi, nniɣ-as : - Ma d učči, ad ak-nxelleṣ imensi, henni-aɣ kan... Amdan iruḥ am win yerfan, yezzi-d ɣur-i yenna-k : - Kečč, a ccix susem, d Musṭac i bɣiɣ ad iyi-yefk lmelzum. Bɣiɣ lmelzum... Mačči d kunwi ara yi-ixellṣen imensi... Salah yenṭeq-d yenna-as : - Ad k-yehdu Rebbi, nekk d argaz s uxxam-iw, ruḥ nadi anda ara ak-fken lmelzum-agi-inek... Amdan-nni yenn-as : - Tḥeqreḍ-iyi imi nekk n Bgayet. Ayɣer libarman akk n Tizi Wezzu ttmuddun-iyi lmelzum. Ad nɛeddi ɣer l’arrière boutique ad iyitɛelleḍ iḍarren-iw deg yigenni, ad iyi-tɛelleḍ iṭṭaren-iw deg yigenni, tɛelleḍ-iyi-t lewra-lewra… Tefkeḍ-iyi mbeɛd abuciḍ n buwacciwen2. D ayen ur qebblen yimeẓẓaɣ ad t-slen. Ikelyanen yellan din ttaḍsan, kra ad ak-qqaren : d acu-t umdan-agi ? D aderwic ? Wiyyaḍ qqarenas :axi... axi !... Netta yerfa isuɣ : - Bɣiɣ d kenwi i bɣiɣ, ur ken-ḥwaǧeɣ ara… Nekk, bɣiɣ Musṭac, ad iyi-yefk lmelzum, tura… Salah yerfa, la irekkem. Taḥanut teččur d ikelyanen, llan ula di berra. Amdan yettsuɣu s wayen i as-d-yefka ujaɣuɣ-is, ad as-dtesleḍ ula seg ubrid. Tikkelt-nni, Salah iɛedda-d si deffir n ukuntwar, yeffeɣ ɣer umdan sdat tewwurt, ilewwez-as yiwet n lbunya ɣer wudem, yessemkerfaf-it. Atan Sufyan yezzazel-d. 2

Yebɣa ad d-yini Udad n wureɣ neɣ «mouflon d’or» s Tefransist.

- 108 -



Amdan yeɣli iruḥen am win iwehmen : ur d-yerri ɣef tyita, ur dyenni awal… yekker-d, iruḥ ɣer tama n lḥiḍ-nni i d-iqublen lmaḥel, yeqqim. Kra yekka lmaḥel yeldi netta ad d-yessikid amzun d win yenɣa uɣbel. Azekka-nni, akken iruḥ ad d-yeɣli yiḍ, yuɣal-d s amkan-nni diɣen, yeqqim armi iṣekker Salah iruḥ. Seldazekkayen, kifkif. Maca ussan nniḍen mačči iban-d, yiwen ur t-iwala di lemsaq-nni… Sin n yiseggasen mbeɛd, yekcem-d yiwen ukelyan iḥeḍren ass-nni n tedyant yenna i Salah : - Ur tesliḍ ara amaynut ? Yenna-as Salah : - Ala, d acu ? Yenna-as urgaz-nni : - Tecfiḍ ɣef winna yessekkren yiwen wass ṭanṭanu ɣef lmelzum ? - Yenna-as Salah : - Ala, ur sliɣ ara… Yenna-as winna : - Ihi, atan yufa lmelzum-is : ufan-t deg uftis di twilayt n Bgayet, yemmut, ur d-iban ara anwa i t-yenɣan…


- 109 -

Daɛwessu n yimawlan Islam BESSACI

U

dem-is kerzen-t wussan, iḍarren-is ččuren d tifexsa, ileḥḥu i leḥfa deg tegrest neɣ deg unebdu, lqedd-is yekna am useḍru, ẓẓayet teɛkemt i iɛebba, acḥal n yiseggasen-aya i yettɛebi taɛkemt n leɛtab akked yiɣeblan. Calwaw yeɣli-d ɣef wallen-is, ɣef waya ur yettwali ara, ixuṣṣ deg usekkud. Aglim yettaɛ ɣef yiɣes, tazmert-is kerzen-tt yiseggasen, akka i d win terẓa ddunit, yeggra-d uɛebbuḍ sdeffir n tezmert. D tagi i d liḥala n Dda Bujemɛa, akka i as-yura, ulac win izemren ad yerwel i lmektub. Dda Bujemɛa d argaz yesɛan, muḥal yessuget awal, tudert-is tbedd ɣef tidet, ɣas akken yeṛwa tidak yuran, maca iqubel kra i d-yusan s tebɣest, muḥal yecceḍ ɣer yir abrid. Yunag ɣer tmurt n Fransa asmi yella d ameẓyan, temẓi-s merra yesɛedda-tt dinna, ayen yugaren 20 n yiseggasen. Asmi tefra tegrawla n tmurt n Lezzayer, 6 n yiseggasen kan yuɣal-d ɣer tmurt-is, ɣer yidurar n Leqbayel ɣer wakal n lejdud-is, ɣer taddart anda ilul. Dda Bujemɛa yufa-t-id lḥal yezweǧ yesɛa dderya, snat n teḥdayin akked sin n warrac, irebbaten-id akken iwata armi meqqrit, yesker-iten-id s lḥif, muḥal yexdem maḥyaf gar-asen. Ixeddem tamurt yerna sennig n tezmertis, awi-d kan ad d-yessas talqimt ara ččen warraw-is akked tmettutis. Ɛeddan yiseggasen lulen-d wiyaḍ, tarwa n Dda Bujemɛa wwḍen i zzwaǧ, iga-asen ixxamen, zewǧen merra, yal yiwen deg uxxam-is. Yeqqim-d Dda Bujemɛa yettidir netta akked tmettut-is, ttdeggiren tudert s tmara, ggran-d weḥḥed-nsen am yiqermen, arraw-nsen - 110 -



srafgen am yifrax n lɛecc. Yiwen yunag ɣer tmurt n Kanada akked tmeṭṭut-is ma d wayeḍ iruḥ ɣer Lezzayer tamanaɣt akked twacult-is tamecṭuḥt. Ma yella d yessi-s, ttidirent deg taddart acku dinna i zewǧent. Qqaren at zik, yelha win yettarwen aṭas n dderya acku win i qessiḥen wayeḍ ad d-yiḥnin, d ayen i as-yeḍran i Dda Bujemɛa asmi i d-testeqsa fell-as temɣer iḥuss i leǧwareḥ-is neqsen, yal tama anda i d-tettcekti, teǧǧa-t tezmert, maca yezga yeḥrez asirem xerṣum mi yettemsefham netta akked tmeṭṭut-is, muḥal tesnuɣna-t neɣ yesnuɣna-tt netta, anɛam yirbaḥ gar-asen, maca mi ara d-mektin arraw-nsen i yesrafgen seg yirebbiyen-nsen tjerreḥ tasa-nsen, ttkawen yifadden-nsen. Tameṭṭut n Dda Bujemɛa, tečča tiyita meqqren, tettara kan ɣer daxel, tecweḍ tasa-s ɣef warraw-is i tt-yeǧǧan, yennulfa-d deg-s waṭṭan yuɛren deg ccedda, iɣeblan akked wurfan, yeṭṭef-itt deg ussu, maca ur tɛeṭṭel ara temmut, truḥ am targit, tuker-itt lmut d takerḍa, ulac win yebnan ɣef lmut-is, truḥ s ucayaḍ n warraw-is ur teẓri acḥal n yiseggasen. Ulac win ur tɣaḍ ara, imezdaɣ n taddart ttrun akk fell-as, acku d yiwet n tmeṭṭut d wawal, ḥemmlen-tt merra medden, ttadren-tt-id kan deg wayen yelhan. Tikkelt-a ula d arraw-is usan-d ɣur yemma-tsen, win yettidiren deg Lezzayer tamanaɣt yufa-tt-id am uqejmur teḍleq deg tesga n uxxam, ma d win i d-yusan seg Kanada yufa-tt-id d aɛemmur n wakal, ur d-yelḥiq ara tamḍelt. Ttrun sawalen anwa ara yettrun yidsen, mmektan-d yemma-tsen i ten-id-irebban, mmektan-d temẓi akked wussan yelhan i sɛeddan yid-s rran-d ccfawat ndemmen deg wayen i xedmen, maca ulac d acu i zemren ad d-rren, ayen iruḥen ur d-yettuɣal, ula d awal ma yeffeɣ-d seg yimi am teldunt ur tettuɣal. Sɛeddan kra n wussan akked baba-tsen, yessetma-tsen, ɛuhden-tent ad d-ssefqaden fell-asent. Syin uɣalen ansi i d-kkan, yal wa yuɣal ɣer lɛecc-is. Yeqqim-d Dda Bujemɛa deffir tmeṭṭut-is, i lmerta n wussan, arrawis uɣalen yal wa yettwali kan sdat n yiḍarren-is, ẓran liḥala ideg ǧǧan baba-tsen, ulac win i yewwi nnif ad t-yawi neɣ ad as-yeg leqrar, wa


- 111 -


yettkel ɣef wa, ifuk usirem deg wul n Dda Bujemɛa, ifeddix n tmeṭṭut-is yerna tirɣi n warraw-is, tluɣ tudert-is, yeggra-d deg yir ddunit, maca ɣas yura fell-as waya, Rebbi muḥal yeǧǧa lɛebd-is, yettak-d talwit, yetteg-d tawwurt. Deg tallit-agi ideg nella, qqaren win ur nesɛi tiḥdayin yenger, ɣas nettmagar-itent s yimeṭṭi ass ideg ara d-lalent, d nutenti i isefḍen imeṭṭi n yimawlan mi ara imɣuren, dima ɣer yidis n yimawlan akken yebɣu yili lḥal. Rray n warraw n Dda Bujemɛa d uzlig, d uɛwij, yexleq-iten Rebbi d izelmaḍen, maca yessi-s d tiyeffusin ččurent d tayri n yimawlan, ttuɣalent-as s lmendad akken iwata lḥal, ttaǧǧant tilufa-nsent fell-as, yessaḥen-d Rebbi ulawen-nsent, uɣent-t d nnuba, yal ass anta ara yilin yid-s, mɛawanent taɛkemt, ttwanasent-t, buddent-t, akken tebɣu taẓay teɛkemt, ṣebrent-as, acku imawlan ayen i sent-txedmeḍ ay amdan drus, muḥal yiwen yezmer ad yerr lxir n yimawlan. Dda Bujemɛa yemmed deg leɛmer, teǧǧa-t tezmert, yeggra-d gar yifassen n yessi-s, maca ur yeɣli ara, ur t-yeṭṭif ara wussu, yesɛa zzher, rnu yesɛa rrateb, yettaɣ iṣurdiyen n Fransa acku yexdem aṭas dinna. Yal tikkelt mi ara d-ixelleṣ, arraw-is merra aqcic taqcict ad yesɛu amur-is, muḥal yexdem maḥyaf gar-asen, ɣas akken ǧǧan-t warraw-is muḥal yeǧǧa-ten, neɣ iɣunza-ten, zeddig wul-is ɣer-sen, ddɛa-as siwa s lxir, yal ass yessaram ahat ad ten-id-yehdu Rebbi, ad ten-id-yerr s abrid n lewqam. Ɛeddan rebɛa n yiseggasen ɣef tmettant n tmeṭṭut n Dda Bujemɛa, yiwen deg warraw-is ur yuggad Rebbi ad yessefqed ɣef baba-s, yewwi-ten zzhu n ddunit, baba-tsen ugin-t, idrimen-is lhan, dagi i as-yenna : Ɛli rẓag, lqsem-is ẓid. Yiwet n tikkelt, yessi-s n Dda Bujemɛa xedment imensi anda i dɛerḍent Caɛban ɛemm-nsent ameqqran, baba-tsent ur yelli ara d lɣafel, yessaf tamsalt, iḥulfa s kra ad yili, nnejmaɛen-d ttqeṣṣiren, uddren-d akk tiqdimin, syin Caɛban iɛedda srid ɣer yeswi yenna : - A Bujemɛa a gma, ilaq tura ad tgeḍ leqrar i yiman-ik, yessi-k ǧǧant ixxamen-nsent fell-ak, lwaǧeb-nsent xedment-t, tura yewwi-ak-d kan ad tzewǧeḍ, d tameṭṭut-ik kan ara k-irefden, ara ak-igen leqrar,

- 112 -



d Rebbi i yebɣan akka, mačči d kečč i d amezwaru mačči d aneggaru, mačči fell-ak i d-yebda lmut, ma d tameṭṭut-ik yemmuten yif-itt Rebbi, fell-as yeɛfu yerḥem. Dda Bujemɛa ibedd ccɛer deg uqerru-s, yeccuɛben uksum-is imi yesla i wayen yenna gma-s Caɛban, yeɛreḍ ad yeṭṭef iman-is ur yezmir ara, yeṭṭerḍeq d imeṭṭi, yerra-t llǧen d amger, yugi ad yeqbel maca ḥerṣen-t mačči d kra, tebɛen-t armi i d-yefka mayna. Awal yuzzel deg taddart, yuɣ am lebraq, slan merra s zzwaǧ n Dda Bujemɛa, ula d mmi-s yellan deg Lezzayer tamanaɣt yewweḍ-it yisali. Asmi yesla tfuk fell-as ddunit, am win iɣef d-yeɣli udrar. Azekka-nni taṣebḥit yekker, yeṭṭef-d abrid ɣer tmurt, yerra srid ɣer taddart, anda yella uxxam-nsen. Akken yekcem deg yimi n tewwurt, Dda Bujemɛa akked yessi-s ur uminen ara, wehmen, bedden deg ttewḥid, dɣa yemmeɣ yemsalam d baba-s, yessetma-s, yerra iman-is ur yeẓri kra, syin yenṭeq ɣer baba-s yenna : - Suref-iyi a baba, surfemt-iyi a yessetma, ǧǧiɣ aṭas seg lwaǧeb-iw armi ɛeddaɣ tilas, yewwet-iyi wucuḍ, yeqmec-iyi Rebbi allen-iw, ur ẓriɣ anda ttedduɣ, d yemma as-yeɛfu Rebbi i yi-d-yesfaqen deg targit, tennuɣ-iyi merra, tura ncallah ad teɛyu ccedda, aql-i usiɣ-d ɣur-k a baba ɛzizen ad k-awiɣ ad tiliḍ yid-i. A rebeḥ a tafat, ansi akka i d-tecreq ass-a. - Amek ! 5 n yiseggasen aya ulac win yuggaden Rebbi ad yessefqed fell-i am kečč am gma-k, lemmer mačči d yessetma-k ur ẓrig anwa asif ara yi-yeččen, tura ur tesseḍḥaḍ ara, tesɛiḍ udem s wayes i dtruḥeḍ ? i as-yenna Dda Bujemɛa. Din yessi-s refdent awal, ur bɣant ara ad snuɣnint gma-tsent ssutrent deg baba-tsent akken ad-yefk mayna, ad yeddu akked mmi-s ɣer Lezzayer tamanaɣt xerṣum ad yekkes ciṭuḥ n lxiq, rnu bɣant ad iruḥ ɣas ɣef wallen n medden. - A baba, ddiq deg wulawen, ḥemdullah ul-ik yewsaɛ, ma yella d axxam-ik ɣas kkes aɣbel fell-as, aql-aɣ ad t-id-nessefqad yal ass, ad yeɛfu Rebbi ayen iɛeddan iṣeggem ayen i d-iteddun. Ncallah, i nnan merra, ma d mmi-s yeqqim yeggugem ur t-id-yuli wawal, yeẓra d acu ara yexdem i baba-s ɣer sdat, akken i as-yenna


- 113 -


uɣyul : ǧǧet-iyi kan ad ssiwḍeɣ icenfiren-iw ɣer waman imir ssneɣ d acu ara xedmeɣ. Yessewǧed Dda Bujemɛa lekwaɣeḍ-is akked lqeccis, ihegga akk iman-s akken ad yeddu d mmi-s, maca sennig wul-is. Syin yekcem ɣer ṭumubil n mmi-s, yessaked ɣer yessi-s s yiwet n tmuɣli, allen-is ččurent d imeṭṭi, ɛemrent am tegnawt. Akken tqelleɛ ṭumubil tuɣ abrid ɣer Lezzayer, teǧǧa-d aɣebbar ɣer deffir, tiḥdayin rrant-tt i lweɛd n yimeṭṭi. Iɣaḍ-itent baba-tsent i tent-yeǧǧan, rnu am wakken ur ttkilent ara ɣef gma-tsent akken ad as-yexdem lewqam. Akken qqaren at-zik : zik nettidir nsell, maca tura nettidir nettwali. Yewweḍ Dda Bujemɛa ɣer Lezzayer s axxam n mmi-s, ɛerḍen ad as-xedmen akk ttawilat ilaqen i wakken ur yettḥulfu ara s lexṣaṣ, maca deffir waya heggan-as taxazabit, ḥeylen-as armi i as-kksen lekwaɣeḍ-is, uɣalen d nutni i yettḍebiren fell-as. Qqaren ; yekka-d lexdeɛ seg laman, d ayen i as-yeḍran i Dda Bujemɛa, yettamen aṭas mmi-s, anda yebɣu yini-as ruḥ ad iruḥ, akken i as-yenna ad yexdem, mmi-s yufa-tt d lemzeyya, idrimen n baba-s yerra-ten fell-as, ur yesseqneɛ ara s wayen yettaɣ baba-s, rnu yexdem-as lekwaɣeḍ s zzur, icehhed fell-as d ameɣbun, ur yesɛi ḥedd ad as-yeg leqrar, yerna ur yeksib ara leɛqel-is, asmi yessaweḍ ɣer lebɣi-s, yundi-as tasraft i baba-s. Azekka-nni ṣṣbeḥ mi d-kkren swan lqahwa yuɣal yenna-as i Dda Bujemɛa : - Ass-a ad k-awiɣ ɣer sbiṭar a baba, ad k-dawin akken iwata lḥal, d annuy ara ak-anin tafekka-k, anda ara d-afen aṭṭan ad t-sseḥlun ad k-id-rren d ilemẓi. Yumen baba-s s wayen yenna mmi-s, yefreḥ mačči d kra, ffɣen-d uɣen abrid am lebraq, yuggad ad yendem baba-s. Ttedun abrid yugi ad yekfu, Dda Bujemɛa ixaq yenna : - A mmi ! sbiṭar-agi yebɛed aṭas, am win yetteddun ɣer lefni n ddunit ? - Ur ttxiq ara a baba, drus maḍi i d-yeqqimen. Kemmlen abrid-nsen, cwiṭ akka wwḍen s amḍiq, dɣa yenna : - Hatan a baba, newweḍ-d ɣer sbiṭar.

- 114 -



Akken wwḍen, terked ṭumubil deg ubraḥ n uxxam-nni. Mmi-s yekcem ɣer tmehla n uxxam, yefka ayen iwulmen akken ad yeǧǧ bab-s dinna. Cwiṭ akka yuɣal-d mmi-s n Dda Bujemɛa yedda-d yids yiwen n umɣid n uxxam-nni, ruḥen srid ɣer-s, dɣa iluɛa-t mmi-s yenna : - A baba ! - Anɛam a mmi. - Ers-d tura ad tedduḍ akked ufremli-agi, ad ak-yesken ṭṭbib, nekk aql-i ad ffɣeɣ, sɛiɣ ciṭuḥ n ccɣel d amecṭuḥ, ad t-id-xedmeɣ sya ad d-taweḍ nnuba-k, ad d-uɣaleɣ ɣur-k ad k-awi. - Yirbeḥ a mmi. Mmi-s n Dda Bujemɛa yecɛel ṭumubil, asiked ɣer deffir ulac, yeṭṭef abrid s axxam. Dda Bujemɛa yedda akked uxeddam n uxxam-nni yeṭṭef-as afus ɣer unemhal, cwi kan yufa-t d aqbayli am netta ! akken yekcem Dda Bujemɛa yenna : - Azul fell-ak a mmi. - Azul fell-ak a lbaraka, acu akka i k-d-yecqan ɣur-neɣ ? - Ruḥeɣ-d akken ad dawiɣ a mmi, xuṣṣeɣ deg usekkud. - Yirbeḥ a baba, maca anwa i k-id-yewwin ɣer dagi ? - D mmi. Akken yesla unemhal s tririt i usteqsi ɣef yiles n Dda Bujemɛa, yewhem, yettweḥḥid kan Rebbi, iɣaḍ-it, yejreḥ tasa-s Dda Bujemɛa, iḥar amek ara t-id-yesefhem, anda yella d axxam n yimɣaren mačči d sbiṭar, din kan yessawel i yiwen n umejjay n tnefsit i wakken ad yemmeslay akked Dda Bujemɛa, mi i d-yewweḍ, yehḍer akked Dda Bujemɛa, yufa-t yesɛa leɛqel dayen kan, ḥṣan mmi-s agi yebɣa kan ad iḍegger baba-s, yeskaddeb ɣef yimḍebbren n uxxam-nni. Amejjay n tnefsit iwekked-as-d s wudem unṣib i unemhal Dda Bujemɛa ur t-yuɣ wacemma, leɛqel-is d win iṣeḥḥan, yewwi-d kan fell-asen ad as-d-inin tidet, imi akka i d-yenna lqanun. Anemhal n uxxam n yimɣaren iluɛa Dda Bujemɛa i tikkelt niḍen yenna : - Ay amɣar ! teẓriḍ anda akka i k-id-yewwi mmi-k, neɣ xaṭi ? - Aql-i deg sbiṭar a mmi neɣ ala ? Anemhal yerkeḍ ɣef wul-is s tebɣest yenna-as :


- 115 -


- Ihi tuffra fell-ak ur telli, zzwer-d leɛqel ɣer sdat-k, tesɛuḍ tabɣest, aql-ik deg uxxam n yimɣaren. Dda Bujemɛa yeṭṭerḍeq deg imeṭṭi yefhem taluft din kan, yenna : - Wekkleɣ-ak Rebbi a mmi, anda i tt-tundiḍ ad k-teṭṭef. Yuɣal umejjay n tnefsit yemmeslay akked Dda Bujemɛa, yekkes-as kra n yiɣilifen, syin wwin-t ɣer wanda ara yettili s tmara, fkan-as akk ayen i t-iwulmen, yeṭṭef amḍiq-is gar yimɣaren. Mmi-s n Dda Bujemɛa, deg tuɣalin i d-yuɣal s axxam-is, yessemlal-it-id Rebbi akked wayen yexdem, yedɛa-as baba-s yelḥeq-it, tasraft-nni i asyudi i baba-s teṭṭef-it netta, terza-d fell-as twaɣit ur yebni fell-as, deg ubrid-is yegrareb s ṭumubil, ur sen-yeqqim kra, ama d netta ama d ṭumubil-ines, ur yemmut ur yeddir, ur yeẓri anda yella, s tmara i t-id-kksen ssrabes n usellek seg ṭumubil, wwin-t ɣer sbiṭar. Dda Bujemɛa yugi ad yamen ɣef tedyant i as-yexdem mmi-s, ur yečči ur yeswi, kra yekka yiḍ ur teqqin tiṭ-is ɣef ultma-s, yettxemim kan amek armi i d-yeɣli deg taluft am tagi ! Anda yexdem daɛwessu yettxelliṣ-itt ? Yerna netta deg temẓi yezwar lxir, ama i lwaldin-is ama i yimdanen nniḍen. Yal ass Dda Bujemɛa yettemlil-d d yimɣaren i yellan deg uxxam-nni, ttemyeḥkun iɣeblan akked wayen i ten-iceɣben, ssedhayen ulawen-nsen i wakken ad ttun yir tudert ideg llan, win i wumi d-yeḥka wayeḍ ad as-d-yeḥku ayen yugaren iɣeblan-is akked wuguren-is. Ɛeddan wussan, Dda Bujemɛa yesmed aggur ideg yella deg uxxam n yimɣaren n Lezzayer tamanaɣt, kra yekka dinna ulac win i dyesteqsan fell-as, ixaq aṭas, yenɣa-t uɣbel n yessi-s ur yeẓri acḥal aya, yexdeɛ-it mmi-s, ur yeddi akked mmi-s ur yerbiḥ yessi-s, maca Dda Bujemɛa d win yeṭṭfen deg Rebbi, yumen yis-s ad t-yessuffeɣ seg tesraft-agi ideg yella. Anemhal n uxxam n yimɣaren yettuɣal s lmendad i Dda Bujemɛa, iwala-t d yiwen yettḥizin iman-is, yettuɣal deg rrif, yettxemmim ad yaf tifrat. Dɣa yiwet n tikkelt, anemhal-agi yexdem yiwet n temlilit ɣef ddemma n uḥareb ɣef yimɣaren, anda i d-rzan aṭas n yimejjayen n tnefsit akked leɛqel, akken ad sqerdcen timsal ɣef wuguren i d-ttmagaren yal ass, anemhal n uxxam n yimɣaren ifures tagnit, iger-d aɣbel n Dda Bujemɛa ɣer usqerdec

- 116 -



akked yimejjayen yellan dinna, dɣa sawlen-as-d yusa-d. Yekcem Dda Bujemɛa ɣer ugraw n yimejjayen, yekker-d yiwen deg-sen ibedd-d, udem-is yexsef, icudd yiles-is yeɛreq-as wawal, ur yumin ara ayen ttwalint wallen-is, dɣa iluɛa-t : - A Dda Bujemɛa ! d kečč aya ? D acu i k-id-yecqan ɣer dagi ? - D nekk a Meẓyan a mmi, yeǧǧa-d uɛebbuḍ leɛǧeb, rebbaɣ-d azrem s iri, d mmi i yi-iɣurren. Meẓyan d mmi-s n taddart-is, yessen Dda Bujemɛa akken iwata, yekker-d yunez ɣef uqerru-s ffɣen-d ɣer berra mmeslayen kra n lweqt, yuɣal yessuter Meẓyan deg Dda Bujemɛa akken ad iruḥ ɣer texxamt-is, ɣer deqqal ad yesteqsi fell-as, yerna yekkes-as aɣbel ad t-yessuffeɣ s axxam-is ad t-yerr ɣer tmurt-is. Amejjay yuɣal ɣer ugraw unejmuɛ, iqenneɛ-iten ɣef temsalt n Dda Bujemɛa, syin yessuter deg unemhal n uxxam n yimɣaren akken ad as-d-yefk zzmam n Dda Bujemɛa ad iwali anwa s tidet i t-id-yewwin ɣer din ? Melmi i t-id-yewwi ? Zzmam yers-d ɣef ṭṭabla, yufa d mmi-s i yestenyan fell-as, yufa ass-nni kan yegrareb netta s ṭumubil, yeqqim d iɛibi 100%, dɣa yenṭeq umejjay-nni yenna : - Xdem tafeḍ ! Yuɣal yeḥka-asen-d amek teḍra d mmi-s n Dda Bujemɛa wehmen merra. Meẓyan yerfed tilifun-is yessawel ɣer ṭṭamen n taddart-is, yenna-as s wayen yellan, syin yeffeɣ-d ɣer Dda Bujemɛa, yeqqim yid-s kra n wakud, yekkes-as aɣbel ad t-yessuffeɣ azekka-nni ad yuɣal ɣer taddart-is, ɣer uxxam-is. Lɛarbi akked ṭṭamen n taddart, imiren kan iberreḥ, yexdem anejmuɛ n taddart s lɛejlan anda ixebber imezdaɣ n taddart ɣef tedyant yeḍran akked Dda Bujemɛa, awal yuzzel am lebraq slan akk at taddart, yessi-s n Dda Bujemɛa ttmeǧǧident, ttrunt sawalent i win ara irun yid-sent, syin yuzzel ɣer-sent ɛemmi-nsent, yekkesasent aɣbel n baba-tsent, azekka-nni ad t-id-awin seg Lezzayer tamanaɣt seg uxxam n yimɣaren. Anejmuɛ n taddart yefra, gezmen-tt deg rray azekka-nni kra n win yesɛan ṭumubil ad yeddu ɣer Lezzayer tamanaɣt, s axxam n yimɣaren akken ad d-awin Dda Bujemɛa. Imezdaɣ n taddart akk


- 117 -


ɛezmen-d ad ddun, ḥaren ad d-yaweḍ uzekka-nni. Akken yuli was, imezdaɣ n taddart wwḍen ɣer unnar n temlilit, irgazen tulawin, ilemẓiyen tilemẓiyin, yekker umdegger gar-asen, wa yewwi-d amḍiq yedda, wa ur yezmir ara, dɣa yeqqim. Ṭṭfen abrid srid ɣer Lezzayer, yuɣ lḥal xedmen ttiɛad n temlilit akked umejjay Meẓyan deg tama n Bab Zzewwar, akken ad asenyessenɛet abrid ɣer uxxam n yimɣaren i d-yezgan deg Dali-Brahim. Kra yekka yiḍ, Dda Bujemɛa ur yeṭṭis, iɛawez armi yuli wass, iḥar melmi ara d-yaweḍ Meẓyan ad t-yessuffeɣ. Lewhi n 10 n ṣṣbeḥ, tawwurt tameqqrant n uxxam n yimɣaren teldi, tebrareḥ, tezwar-d ṭumubil n Meẓyan, deffir ḍefrent-d aṭas n ṭumubilat, ta sdeffir tayeḍ, wehmen akk wid yellan dinna, ur fhimen acemma, am yixeddamen am yimɣaren yellan dinna, bedden merra ttmuqulen. Akken ḥebsent ṭumubilat deg ubraḥ n uxxam n yimɣaren, bdan ttrusun-d yimdanen, nneɣlen-d am uweṭṭuf, Dda Bujemɛa yeɛqel d arraw n taddart-is dɣa yuzzel ɣersen ur yezmir, allen-is ččurent d imeṭṭi, yuɣal-it-id usirem, yessi-s uzzlent ɣur-s ṭṭfent-t gar yifassen-nsent ttrunt, syin ɛeddan yirgazen akked tlawin yiwen yiwen sellmen akk ɣef Dda Bujemɛa, ad as-tiniḍ yewweḍ-d seg uxxam n Rebbi. Tagara n tudert d tin yuɛren, akken qqaren at zik : ad yeṣṣer Rebbi tameddit, ad yeg Rebbi tamedditnneɣ d tin yelhan. Meẓyan yessawel i Dda Bujemɛa iɛedda ɣer tmehla n uxxam n yimɣaren, yestenya deg zzmam-is akken ad yeffeɣ, syin iɛedda ɣer yimeɣban akked yimɣaren-nni, wid i yesɛedda kra n wussan, yeǧǧaasen sslam, dɣa yekcem netta akked yessi-s ɣer ṭumubil. Dda Bujemɛa yefreḥ seg tama, yeḥzen seg tayeḍ. Yefreḥ imi yuɣal s axxam-is, yeḥzen imi yeǧǧa imɣaren-nni deg liḥala yecban tinna, yendef wul-is fell-asen, yeẓra merra iɣeblan i ttidiren. Win-d abrid srid ɣer tmurt n Leqbayel, ɣer taddart, simmal tteddun ttalin idurar, simmal iberdan zzin ssawnen, ṭumubilat ta sdeffir tayeḍ yerna ttṣunuyent. Akken wwḍen kecmen taddart, mmuggrent-id yimezdaɣ s lbarud akked teɣratin, acku Dda Bujemɛa d argaz yelhan aṭas, d bab n trugza.

- 118 -



Akken i d-yers si ṭumubil, mmɣen-d akk msalamen yid-s, Dda Bujemɛa yefreḥ mačči d kra, muḥal a t-id-yuɣal lferḥ n wass-nni am wakken iɛawed-d talalit. Kra n wussan kan, zewǧen-as i Dda Bujemɛa, yettidir akked tmeṭṭut-is, yessi-s deg talwit, sser akked liser, ttektilen deg wayen yelhan. Ma yella d mmi-s yellan deg tmurt n Kanada tewwi-t lɣerba am win iɣerqen deg targit, ma yella d mmi-s yellan deg Lezzayer tamanaɣt, yettidir yir ddunit am netta am twacult-is, yuɣal am uqejmur ur yetteddu, ur yettadded ur yettɣimi, ur ihedder, yeggra-d deg yir tudert. Akka, win yebɣan ad yeẓẓu ccfawat deg wallaɣ-is, tadyant yeḍran d Dda Bujemɛa tesmektay, tuɛar daɛwessu n yimawlan.


- 119 -

Tiẓrigin n Usqamu Unnig n Timmuzɣa Editions du Haut Commissariat à l'Amazighité -o-O-oCollection “Idlisen-nneɣ” 01- Khalfa MAMRI, Abane Ramdane, ar taggara d netta i d bab n timmunent , 2003. (Tasuqelt : Abdenour HADJ-SAID d Youcef MERAHI) 02- Slimane ZAMOUCHE, Uḍan n tegrest, 2003. 03- Omar DAHMOUNE, Bu tqulhatin, 2003. 04- Mohand Akli HADDADOU, Lexique du corps humain, 2003. 05- Hocine ARBAOUI, Idurar ireqmanen (Sophonisbe), 2004. 06- Slimane ZAMOUCHE, Inigan, 2004. 07- S. HACID & K. FERHOUH, Laṣel ittabaɛ laṣel akk d : Tafunast igujilen, 2004. 08- Y. AHMED ZAYED & R. KAHLOUCHE, Lexique des sciences de la terre et lexique animal, 2004. 09- Lhadi BELLA, Lunǧa, 2004. 10- Antoine de St EXUPERY, Le Petit Prince, 2004. (Tasuqelt : Habib Allah MANSOURI, Ageldun amecṭuḥ) 11- Djamel HAMRI, Agerruj n teqbaylit, 2004. 12- Ramdane OUSLIMANI, Akli ungif, 2004. 13- Habib Allah MANSOURI, Amawal n tmaziɣt tatrart, édition revue et augmentée, 2004. 14- Ali KHELFA, Angal n webrid, 2004. 15- Halima AIT ALI TOUDERT, Ayen i ɣ-d-nnan gar yetran, 2004. 16- Mouloud FERAOUN, Le fils du pauvre, 2004. (Tasuqelt : Moussa OULD TALEB, Mmi-s n yigellil, Tazwart : Youcef MERAHI) 17- Mohand Akli HADDADOU, Recueil des prénoms amazighs, 2004. 18- Nadia BENMOUHOUB, Tamacahut n Basɣar, 2004. 19- Youcef MERAHI, Taqbaylit ass s wass, 2004. 20- Abdelhafid KERROUCHE, Teɣzi n yiles, 2004. 21- Ahmed HAMADOUCHE, Tiɣri n umsedrar, 2004. 22- Slimane BELHARET, Awal ɣef wawal, 2005. 23- Madjid SI MOHAMDI, Afus seg-m, 2005. 24- Abdellah HAMANE, Merwas di lberj n yiṭij - aḥric I, 2005. 25- Collectif, Tibḥirt n yimedyazen, 2005. 26- Mourad ZIMU, Tikli, tullisin nniḍen, 2005. 27- Tayeb DJELLAL, Si tinfusin n umaḍal, 2005. 28- Yahia AIT YAHIATENE, Faḍma n Summer, 2006. 29- Abdellah HAMANE, Merwas di lberj n yiṭij - aḥric II, 2006. 30- Lounes BENREJDAL, Tamacahut n bu yedmim, 2006. 31- Meziane OU MOH, Tamacahut n umeksa, 2006. 32- Abdellah ARKOUB, Nnig wurfan, 2006. 33- Ali MAKOUR, Ḥmed n ugellid, 2006. 34- Y. BOULMA & S. ABDENBI, Am tmeqqunt n tjeǧǧigin, 2006.

35- Ali EL-HADJEN, Tudert d usirem, 2006. 36- Hadjira OUBACHIR, Uzzu n tayri, 2007. 37- Djamel BENAOUF, Di tmurt uɛekki, 2007. 38- Said IAMRACHE, Timenna n Saɛid Iɛemrac, 2007. 39- Mohamed MEDJDOUB, Baba Carlu, 2007. 40- Nadia BENMOUHOUB, Tafunast igujilen, 2007. 41- Ali MOKRANI, Agama s tugniwin, 2007. 42- Fatma ELKOUCHA, Tamedyazt n Yasmin, 2007. 43- Naima HADJOU, Amennuɣ n tudert-iw, 2007. 44- Hocine LAOUES, Gar umqadmu d umnelti, 2007. 45- Omar KHAYAM, Rubaɛiyyat, 2007 (Tasuqelt : Abdellah HAMANE) 46- Ferdinand DUCHENE, Tamilla, 2007(Tasuqelt : Habib Allah MANSOURI) 47- Slimane ZAMOUCHE, Agellil akk d ineffuten yelhan, 2007. 48- Djamel HAMRI, Anadi di tmedyazt, 2007. 49- Khaled FERHOUH, Ḥku-yaɣ-d tamacahut, 2007. 50- Lhadi BELLA, Awal d usefru, 2007. 51- Omar DAHMOUNE, Agu, 2007. 52- SOPHOCLE, Untigun, 2007 (Tasuqelt : Yahia AIT YAHIATENE) 53- Ahmed HAMADOUCHE, Inzan tiqsiḍin, 2007. 54- Ouiza GRAINE, Isefra n tmaziɣt, 2007. 55- Lounès BENREJDAL, Inzan n teqbaylit, 2007. 56- Akli OUTAMAZIRT, Targit, 2008. 57- Mohamed Salah OUNISSI, Tametna n umenzu, 2008. 58- Ramdane ABDENBI, Anagi, 2008. 59- Ramdane LASHEB, Ccna n tlawin ɣef ṭṭrad 54/62, 2008. 60- Said CHEMAKH, Ger zik d tura, 2008. 61- Tiddukla Yusef U Qasi - Si Muḥend U Mḥend, Tafaska n tmedyazt_1, 2008. 62- Sadi DOURMANE, Abrid n tudert-iw, 2008. 63- Dahbia AMOUR, Tudert s tmedyazt, 2009. 64- TANASLIT, Akli n tayri, 2009. 65- Djaffar CHIBANI, Ddeqs-nneɣ, 2009. 66- Belkacem IHIDJATEN, Iṭij asemmaḍ, 2009. 67- Abdellah HAMANE, Tisri n tayri, 2009. 68- Said ABDELLI, Tidwirin, 2009. 69- Said ZANOUN, Bururu yeḥya-d, 2009. 70- U LAMARA, Tullianum, taggara n Yugurten, 2009. 71- Tiddukla Yusef U Qasi - Si Muḥend U Mḥend, Tafaska n tmedyazt_2, 2009. 72- Chabane OULAMARA, Azamul n tmusni, 2010. 73- Mehenna SEHRANE, Awal ɣef yiɣersiwen, 2010. 74- Mohand Ouali KEZZAR, Tibratin, 2010. 75- R. OULHA, M. BOURIDANE, K. HOCINE, Tamellaḥt n Belɛeggal, 2010. 76- Mohamed Zakaria BENRAMDANE, Iɣsan s teqbaylit, 2010. 77- M. DJEGHALI, S. SELLAH, Amawal n yiɣersiwen n yilel, 2010. 78- Abdellah HAMANE, Tawaɣit n tayri, 2011. 79- Rosa CHELLI, Itran, leḥzen, tirga, asirem, 2011.

80- Collectif, Amezgun s tmaziɣt, 2011. 81- Islam BESSACI, Azal n tayri, 2011. 82- Dahbia AMOUR, Tiɣri n wul, 2011. 83- Said DEBIANE, Ay irfiqen, 2011. 84- Youcef ACHOURI, Aklan n tayri, 2012. 85- Rabah BETTAHAR, Teffeɣ Fransa, 2012. 86- Hamou AMARENE, Ula deg wawal, 2012. 87- Med-Zakaria BENRAMDANE, Amawal n waṭṭanen, 2012. 88- Abdellah HAMANE, Tudert-iw di tegrawla, 20112. 89- Boussad KEBIR, Awfus n tutlayt tamaziɣt, 20112. 90- Hocine LAOUES, Abuciḍan, 2012. Actes de colloques 01- Actes des journées d'étude sur La connaissance de l'histoire de l'Algérie, mars 1998. - Actes des journées d'étude sur L'enseignement de Tamazight, mai 1998. - Actes des journées d'étude sur Tamazight dans le système de la communication, juin 1998. 02- Actes des journées d’étude sur La réhabilitation de l’environnement culturel amazigh et sur tamazight dans l’environnement juridique, 2000. 03- Actes des séminaires sur la formation des enseignants de Tamazight et l'enseignement de la langue et de l'histoire amazighe, 2000. 04- Actes des journées d'étude sur Approche et étude sur l'amazighité, 2000/2001. 05- Actes du colloque sur Le mouvement national et la revendication amazighe, 2002. 06- Actes du colloque international sur Tamazight face aux défis de la modernité, 2002. 07- Actes du colloque : Identité, langue et Etat, 2003. - Actes du colloque : La permanence de l'architecture amazighe et l'évolution des cités en Algérie, 2003. 08- Actes des stages de perfectionnement pour les enseignants de tamazight, mars 2004. 09- Actes du stage de perfectionnement des enseignants de la langue amazighe, 30/31 mars 2004. 10- Actes du Colloque : Le passage à l'écrit des langues et cultures de tradition orale, le cas de Tamazight, 2004. (Voir Timmuzgha N°13) 11- Actes du Colloque : La littérature amazighe : de l'oralité à l'écrit, 2005 (Voir Timmuzgha N°14) 12- Actes du colloque sur Le patrimoine culturel immatériel amazigh, 2005. 13- Actes du Colloque : Tamazight dans les médias et à l'école : hypofonctionnalité et usages du lexique, 2006 (Voir Timmuzgha N°15)

14- Actes des Journées d'étude sur l’enseignement de Tamazight, Région Est, 2006. - Actes de la Genèse de l’enseignement de Tamazight depuis le XIXème siècle, 2006. - Actes du Stage de perfectionnement pour les enseignants du primaire, 2006. 15- Actes du colloque sur Le libyco-berbère ou le Tifinagh ; de l'authenticité à l'usage pratique, 2007. 16- Actes du colloque : L’apport des amazighs à la civilisation universelle, 2008. 17- Actes du colloque sur La standardisation de l’écriture amazighe, 2010. 18- Actes du colloque sur Les Royaumes amazighs de la période musulmane, 2010. - Actes du colloque sur Le Royaume de Koukou, 2010. 19- Actes du colloque, Aslugen n tira n tmaziɣt, 2012. 20- Actes du colloque sur Pierre Bourdieu et l’Algérie, 2012. Revue « Timmuzgha » Revue d'études amazighes du Haut Commissariat à l'Amazighité : N° 1, avril 1999, ----- N°22, janvier 2011. - N°10, octobre 2004, Spécial Mohya, Entretien. - N°12, décembre 2006, Tajmilt i Si Muḥend U Mḥend. - N° spécial en Tamazight : . N°16, janvier 2008. . N°17, avril 2008. . N°19, août 2008. Revue « Tamazight tura » Revue en Tamazight du Haut Commissariat à l'Amazighité : N° 1, janvier 2009, ----- N°10, janvier 2012. Autres publications 01- Chafik MOHAMED, Aperçu sur trente trois siècles de l'histoire des imazighènes, 1997. 02- Annuaire des associations culturelles amazighes, 2000. 03- Idir El-Watani, L'Algérie libre vivra, 2001. 04- Mohand Oulhadj LACEB, La phonologie générative du kabyle : l'emphase et son harmonie. Tome1, Histoire et fondements d'un débat argumentaire, 2007. 05- Mohand Oulhadj LACEB, La phonologie générative du kabyle : l'emphase et son harmonie. Tome2, Analyse et représentation phonologique, 2007. 06- Collectif, Mouloud FERAOUN, Evocation, Actes du Colloque, 2008. 07- Catalogue des publications du HCA, 2008. 08- Catalogue des publications du HCA, 2009.

09- Boudjema AZIRI, Néologismes et calques dans les médias amazighs, 2009. 10- Mohand Idir AIT AMRANE, Kker a mmi-s umaziɣ, 2010. Consultings 01- Kamel BOUAMARA, Nekni d wiyiḍ, 1998. 02- Mouloud FERAOUN, Jours de Kabylie, 1999. (Tasuqelt : Kamel BOUAMARA, Ussan di tmurt) 03- Nora TIGZIRI - Amar NABTI, Etude sur « L'enseignement de la langue amazighe : bilan et perspectives », 2004. 04- Mohand Akli HADDADOU, Dictionnaire des racines berbères communes, 2006/2007. 05- Abdellah NOUH, Glossaire du vocabulaire commun au Kabyle et au Mozabite, 2006/2007. 06- Sadaq BENDALI, Awfus amaynut n tutlayt tamaziɣt, 2007. 07- M'hammed DJELLAOUI, Tiwsatin timensayin n tesrit taqbaylit, 2007. 08- Kamel BOUAMARA, Amawal n tunuɣin n tesnukyest, 2007. 09- Moussa IMARAZENE, Manuel de syntaxe berbère, 2007. 10- M'hammed DJELLAOUI, Tiwsatin timensayin n tmedyazt taqbaylit, 2007. 11- Moussa IMARAZENE, Timɛayin n leqbayel, 2007. 12- Nora BELGASMIA, L'expression écrite en tamazight, 2007. 13- Mouloud LOUNAOUCI, Projet de création d’un Centre de terminologie amazighe, TERAMA, 2007. 14- Zahir MEKSEM, Isuraz n usezdi d tenmeẓla taḍrisant n tmaziɣt : Asnekwu d tesleḍt, 2008. 15- Mohammed Brahim SALHI, La tariqa Rahmaniya : De l’avènement à l’insurrection de 1871, 2008. 16- Fakihani TIBERMACINE, Tanast u kajjuf, 2009. 17- Mohand Akli HADDADOU, Introduction à la littérature berbère, 2009. 18- M'hammed DJELLAOUI, ‫تطور الشعر القبائلي و خصائصه‬, Tome1, 2009. 19- M'hammed DJELLAOUI, ‫تطور الشعر القبائلي و خصائصه‬, Tome2, 2010. 20- Zahir MEKSEM, Tisekkiwin n yiḍrisen, tagmert d tesleḍt, 2010. Coédition ANEP 01- Iddir AMARA, Les inscriptions alphabétiques amazighes d'Algérie, 2006. 02- Kemal STITI, Fascicule des inscriptions libyques gravées et peintes de la grande Kabylie, 2006. 03- Mohand Akli SALHI, Amawal n tsekla, 2006. 04- O. KERDJA & A. MEGHNEM, Amawal amecṭuḥ n ugama, 2006.

ENAG 01- Mohand Akli HADDADOU, Glossaire des termes employés dans la toponymie algérienne, 2011. 02- Mohand Akli HADDADOU, Précis de lexicologie amazighe, 2011. 03- Mohand Akli SALHI, Poésie traditionnelle féminine de Kabylie, 2011. 04- Mohand Akli SALHI, Etudes de littérature Kabyle, 2011. 05- Habib-Allah MANSOURI, La Kabylie dans les écrits français du XIXe siècle, 2011. 06- Mohand MEHRAZI, Dictionnaire d’électrotechnique Français-Tamazight, 2011. 07- A. NOUH-MEFNOUNE & B. ABDESSALAM, Dictionnaire Mozabite-Français, 2011.

Conception et PAO Ramdane Abdenbi © Tous droits réservés

Widen yebɣan ad aɣ-d-arun TAMAZIƔT TURA, Tasɣunt s Tmaziɣt

[email protected] [email protected] www.tamazight-tura.com www.hcamazighite.org

Achevé d'imprimer sur les presses de

Imprimerie Brise-marine

Villa N°18, Brise-marine, Bordj El-Bahri,Alger Tel : 0771-11-10-18 Fax : 021-86-50-05

Tamazight Tura 11

Recommend Documents